Gatwick 2014

L'ouaîth'lîn en méta font lus graves gavottes,
gav'lés en plieunmes dé mauves et d'paon;
i' lus spêlent coêffis piéthe qué des pithotes
en gabathant sus l'caud chînment.

I' lus aransent pouor mus lus avoler;
lus ailes atchil'yent ouvèrtement l'air
et bein b'samment i' couothent sans traîngnoler
épis lus lanchent à dgi l'adèrt.

I' vithent en dansant, boulant à châque pas;
châque pithote change dé parchonniéthe
sans jotchuler, châtcheune a san louga,
prannant l'avo ès ailes ligiéthes.