Le Chef me dit l'aut'e jour,
“Caouain, je sommes à laissi “Les Chroniques” traîner drièthe les autres gâzettes!”
“I' y a longtemps que je m'en sis aperchu,” je lis raiponni.
“Tchest qu'tu veurs dithe par chenna?”
“Eh bain,” j'li dis, “I' nouos faudrait d'abord un nouviau rédacteur; le sien qu'j'avons n'est pas .........”
Mais i'n'me laissi pas continuer.
I' happi un encryi qu'était sus l'conteux et me l'pitchi à la tête. I'm'mantchi par un pouce ou deux seulement, sans chenna j'aithais ieu l'crâne en minchôns.
“Espèce d'insolent!” qu'i' m'dit, “est-che que tu n'as pas pus d'respé pour tes supérieurs?”
Je li fis mes extchuses, et je li d'mandi de m'explitchi sus tchi point que la Chronique avait déterioré.
“Eh bain, ch'est comme chennechin. V'là tchique temps que j'avons dans l'Ile un aéroplane qui fait des extchursions dans l'air touos les jours. Les autres gâzettes ont fait voler iun d'lus représentants. L'”Evening Post” y envyi iun d'ses rapporteurs, l'Editeur du “Critic” y a 'té li-même, et “Jack of St. John's” ettou, et ils ont tous publié lus expériences. Nous, j'n'avons fait rain.”
“A tchi la faute?” je li d'mandi, “I'n'en tchaient qu'à vous. Il est oquo temps et i' fait bé annièt, allez-y!”
Mais i'n'vouli pas en oui entouor ses nombreuses otchupations, les ordres de san docteu, et ainsi d'suite.
Mais mé, je savais bain que che n'tait pas aut'e choses que la peux qui le t'nait.
Je suggéri Mess Pain, not'e foremainne, mais l'Chef objecte à cause d'une masse de travas qu' y avait à faithe dans l'imprimethie.
“Ch'est lé Caouain, qui faut qu'i' y aille !”
Je nouos entre disputimes pour une démieuthe, mais finalement je fus obligi de céder.
“Allous payir les sept chelins et d'mi vous?” je li d'mandi.
“Oh!” qu' m'dit, “montre ta carte au Cap'taine.”
Je m'trouvi don au Bel Royal et je d'valli le slip et m'mins à examiner la machine qu'était à se r'poser trantchillement sus l'sablion.
Un moussieu mé d'mandi si j'voulais aller faithe un “flight.” Ch'tait l'Cap'taine li-même.
“Ch'est pour chenna que j'sis v'nu,” je li raiponni.
I'me d'mandi si j'voulais aller liain ou bain justement faithe un vol de deustrais minutes.
Je li dis que j'voulais faithe le touo d'l'Ile, et je li montri ma carte.
I' pathu tout êtonné et dit comme chenna,
“What! Another one?”
Et i'me d'mandi combain qu'i' y avait d'journalistes en Jerri.
I'me'dit qu'il avait une carte ettou li et il en dêhalli iune de dans sa pouchette et l'êpili sus l'côté de sa machine. Il 'tait mins d'sus,
“Free List Suspended.”
Par chu temps-là le brit avait couothu que l'Caouain des Chroniques était sus la grève et s'en allait voler dans l'Aéroplane, et tout l'monde du vaisinné s'attithi sus l'pliain.
Comme i' n'y avait pas moyen de voler “franco,” j'aithais bain voulu m'en r'aller, mais les gens aithaient pensé que j'avais 'té prins d'peux.
Ch'est pourtchi je m'en fut parmi ieux et je lus explitchi qu'à cause d'un p'tit malentendu entre le Chef et mé je m'en étais v'nu absolument sans sous.
Là-dessus Ned Hamon, le Chef-de-Gare au Bel Royal, suggéri de faithe une collecte et hallant sa castchette de sus sa tête i'mins douze sous d'dans et s'en fut parmi la crowd. Au but d'un quart d'heuthe il avait ramassé chinq chelins que je m'en fus offri à l'aviateur.
“Jump in!” i' m'dit.
Et san mécanicien ayant pliaichi une êtchelle contre la machine je grapini amont et je prins man siège drièthe la pilote.
Le mécanicien bailli un 'swing' au propelleur, la machine se mins à ronner et au milieu des hourras de la multitude, cache nos v'la aller le long d'la grève dans la direction de St. Aubin.
Je n'm'aperchus pas quand je tchittîmes la terre mais en êpiant par sus l'bord je viyais les maisons qui rappetichaient à veue d'yi et ch'tait à chu moment-là que j'réalisi que j'étions à pus de chinq chents pids en l'air et que je montions tout l'temps.
Les révolutions du propelleur et la raideur à tchi qu'j'allions causaient un couothant d'air comme je n'avais jamais sentu d'ma vie, et comme ch'est à chute saison ichin qu'les Caouains perdent lus pliumes je viyais les meinnes qui luse n'allaient drièthe nous à poignies!
“Ah!” j'pensi, “si chennechin continue je m'en vais être tout nu dans chinq minutes!”
La peux m'print et je tappi sus l'épaule au pilote et j'pointi en bas pour li faithe à saver que j'voulais mais i' s'écryi,
“Hang on!”
“I'm going to loop!”
Je n'comprenais pas t'chest qu'chenna voulait dithe mé, mais quand je nos vi aller le nez en bas dret d'apic je pensi que m'n heuthe était v'nue et qu'à la fin Marie Hibou, le Chef et bain d'autres s'en allaient être débarassés du Caouain une feis pour toutes.
Tout d'un coup je r'fimes un saut en haut et je touanimes à la renverse.
Je m'sentais dêcoller graduellement de d'sus man siège et je m'trouvi la tête en bas à r'garder un homme qu'était à foui pour du ver dans la grève.
“Ah!” j'pensi, quand i' s'en va m'vaie tchaie i' s'en va êprouver à me r'chever sus les daigts d'sa frouque et j'm'en vais être enfilé comme un crapaud!”
Par un mithaclye que j e n'peux pas explitchi la machine se r'dréchi et je nos r'trouvimes à peu près de nivet, mais dame! chute feis j'en avais ieu assez mé, et penchant en avant j'enfonci mes griffes dans l'co du pilote et je li heurli dans l'ouotheille, “Sous avez le malheur de r'faithe ditèt, je m'en vais l'ver la Clameur de Haro, mé! Mettez-mé à terre immédiatement.
Heutheusement pour li i'm'obéi sus l'coup car je m'en allais l'êtranglyi, et tchiques secondes oprès la machine vint se poser sus l'sablion au pid du slip, exactement d'iou que j'avions starreté.
Je fus applaudi par la foule pour man couothage et félicité d'aver 'té le prumi journaliste Jerriais à “looper the loop.”
Mais i' n'savaient djèthe la sensation que j'avais êprouvé.
Caouain
Les Chroniques de Jersey 3/9/1927
Viyiz étout: