Moussieu, - J'voudrais féliciter ch't autre Gris Ventre-là - le Dennis Pipon - sus s'n excellente lettre au sujet d'ches bêtes heurlantes qui voudraient nos empester ichin en Jèrri. I'm semblye qu'il est grand temps qu'les gens du Ouest, que s'sait Jèrriais ou Angliais, mettent lus pids bas si j'n'avons pas idée d'aver touos les télés casées et les fondations d'nos maisons disturbées par chu sacquétîn potîn-là.
L'aut'e jour, auprès qu'le B.A.C. 1-11 eut sorti de l'Aéroport faisant un bri comme mille bêtes touozâtres à beuller ensemblye, souffrant d'un mâ à la tête însupportablye, j'm'en fus traithe, mais, du djiablye, i' n'y'avait pas mouoyen d'appréchi d'mes pouorres vacques - il' 'taient là, fixées commes des statues avec la coue en l'air et l's yièrs fixes - comme s'il' avaient veu ou ouït l'djiablye - et ch'fut avec les milles peines que j'parvîns à les traithe. J'finis trais pots d'lait à court ch't'arlévée-là, byeau que j'lus ramonni les cerclyes d'bathi pour éprouver à d'scendre le lait - mais i'n'y avait rein à faithe.
Lé lend'main au matîn quand la bouonnefemme fut au poulalyi pour cherchi l's oeufs, minsèthe, les fichus poules avaient arrêté d'pondre - et en êtes-ous ravis avec un té potîn!
Enfîn, ch'est à espéther qu'les gens d'St. Ou, St. Pièrre et St. Brélade s'en vont lus uni dans un effort d'montrer à nos membres des Etats qu'i' n's'en vont pas lus soumis à chu niolîn-là. J'avons déjà yeu assez d'embarras avec lé fichu aéroport, avec beintôt la maîntchi d'St. Pièrre prînse en routes, etc., sans pâsler des restrictions tch'affectent les gens prèsque jusqu'à St. Louothains, et il est temps que y'est un arrêt. J'sommes bein content d'aver le B.U.A. auve nous à un point, mais j'sommes acquo maître siez-nou ichîn en Jèrri, et ch'est au B.U.A. de s'conformer ès nécessités de l'Ile et pàs nous ès d'mandes du B.U.A.
Ch'est tout bein pour nos messieurs à baithe du champagne à bord - sans ouït l'potîn - mais qu'i' lus méfit, car si l'Jèrriais a d'la patienche, y'a un but à tout et chutte fais ch'est bein seux que s'i' êprouvent à pousser ches bêtes-là sus l'cô - eh bein, i' s'en va y'avait du feu d'satchi!
Mes complyîments, Moussieu,
Gris Ventre
Jersey Weekly Post 9/9/1965
Viyiz étout: