Èrgardez, dans chutte grande salle, les longues tabl'yes
Chèrgies d'pliats d'or et du miyeu
Travas d'orfèvre, véthe, du pus admithabl'ye!
…..Et des bananes pendues ès veues.

Lé méta r'lit. Toutes les tchaîses sont mèrtchies:
“Né v'là vot' pliaiche, man chièr Moussieu!”
Ch'est l'assembliée ès gens du Vendrédi
Souos les bananes pendues ès veues.

I' lithent en or, les frits! La lueu étout:
Mille chandelles cachant la nièrcheu
Des faches dorées des tchéthauds et ouothous,
Toutes jaunes coumme les bananes ès veues.

Ev'chîn des vièrs changlièrs couvèrts dé frits.
Nou craithait qué ch'est dangereux
D'mangi siez ches gens-chîn sans êt' mangi
Coumme les bananes pendues ès veues.

Un sabbat souos des bananes? J'peurs-t'i' vaie
Des vampithes? Jé n'l'éthait pon creu…
Ches malîns m'chuch'chaient bein lé sang. Ah! Mais
Y'a des bananes pendues ès veues!