'Mais absolùment,' s'fit mon vièr parchounnyi lé Ph'lip Desclios quand jé l'rencountri l'aut' matin du bord d'La P'tite Falaise, 'mais absolûment, chu pèrrot là dans l'Estâts, i' dé être cratchi'.
'Ph'lip,' j'lis dis, 'l'Estâts en sourit couâsus, d'pèrrots, et y'en a eunne tappée d'cratchis. Du tché qu'tu pâles?'
'Ma fé' s'fit l'Ph'lip, 't'as bein raisoun qu'y'en a eunne tappée d'cratchis, même bein des pièches qui dévraient être à l'âsile. Mais lé sien qu' j'avais dans l'idée ch'est ch't achocre là qui voudrait bâti eun' aëroport sus les rotchérs à La Rôcque'.
'Maît' Ph'lip', j'lis -dis, 'V'là tchi m'éstounne qué tu pâles dé même des membrés d's Estâts! Tu n'dé pas les' traiter d'achocres, dé bachouards, dé bégauds, dé happes-la-leune. I' sount messieus et dames d'êducatioun, i's'ércounnaissent, à chein qu'nou m'dit, dans la politique, y'en a même qu'ount lu l'Escritûthes. Et pis, y'en a étout qui sount angliais, ou éstrangiérs dé j'n'sai pas d'iou, tandi qu'té ét mé, jé n'soummes qué d'pouarres Jèrriais, et v'là tchi n's'adoun'nait jamais si j'lus mantchaîmes dé réspèt ét si j'nos méttaimes dans la tête qué Jèrri appartchein ès Jèrriais'.
'Mais', - ét l'Ph'lip dév'nait dé pus en pus mârri - mais pourtchi qu'Jèrri n'appartchein pas ès Jèrriais? Ch'est not' île, pourtchi qué jé n's'raîmes pas maîtres siez nous'?
'E n'té fais pas trop la bile', j'li dis, 'j'sis d'accord qué Jèrri nos appartchein pus, mais ch'est parc'qué j'nos soummes laissis prendre. Tu t'rappelles l'histouaithe du loup et d'la brébis. La brébis avait eun biau p'tit siez-sé, pas bein grand mais counfortablyè. Lé loup vînt à sa porte li faithe eune tâs d'biaux-biaux. Si i'faisaient mênage ensemb1ye, i'li dit, li, lé loup, i'y'aidrait à faithe son tripot et i's'accordéraient coumme deux clioches. La pouarre pétchotte dé brébis, qui 'tait tout'à la douce et s'ércounnaissait mal dans l's'affaithes du mounde, li fit la beinv'nue et y'ouvrit la porte. Lé loup entre, la déchire et la d'vore.'
Lé Ph'lip sé gratti la tête. 'J'sais bein', i's'fit, 'qué ch'est nous,les Jèrriais, qui soummes les brébis, mais, moun pèthe dé grâce, esch'qué les membres d'Estâts sount des loups?'
'Nânnîn,' j'li réspounni, 'pas tous. Y'en a d'ieux qui soun bouans Jèrriais ét qui fount d'lus mus pour nos d'fendre. Mai y'en a d'autres dans l's Estâts et - i'faut bein l'admett' - tchiques Jèrriais parmi ieux, qu n'sount qu'des loups en train d'nos d'vorer. Lie ta gâzette, mon garçoun, tu vêrras bein vite les siens qui veullent nos d'vorer et les siens tchi tâchent dé nos d'fendre'.
Le Ph'lip s'ergratti la tête. 'Mais si ch'est d' même,' i's'fit, 'té, qu'à la langue bein pendue pourtchi qu'tu n"té mêts pas su les rangs et n'prends pas pour l' Estâts?'
'Bah, bah', j'li r'fîs, 'j'm'en vais pas perdre ton temps agnièt à t'racounter pourtchi. Ch'é s'sa pour eunne aut' fais. Dans l'entrétemps, véttan, j'allouns d'scendre jusqu'à la grève, vai si y'a du vraic. V'là tchi vaut autrément mus qué toute la salop'rie qu'les'marchands d'engrais nos vendent, ét l'vraic est bein miyeu marchi. En êffét, quand nou veint à y penser, y'a eunne léçoun là qué l's Estâts fr'aient bein d'apprendre'.
Viyiz étout: