Nou-s'avait trouvé un mannuscrit du Mouoyen Âge. Ch'tait chein qu'nou-s'app'lait un fabliau et ch'tait hardi întèrêssant. J'tais à un collège ou eune unnivèrsité où'est qué j'tais pouor êtudier l'fabliau mais jé n'voulais pon travailli et j'dis qu'j'îthais à la bibliothèque au run d'faithe sèrvi l'mannuscrit. Mais jé n'fus pon à la bibliothèque. J'tais pouor aller en Ville. Pouor tchique raîson j'tais à bord d'un ouadgîn dé d'livréthie tch'avait un engîn en d'vant et eune tchithette en driéthe. Au run d'aller en Ville lé cacheux 'tait à cachi par lé c'mîn à bike parmi les bikes et les piêtons. Ch'tait un reintchivâle tchi cachait san ouadgîn d'amors sus lé c'mîn à bike et pon sus la route. Chein tchi 'tait tchuthieux et pon seûth'tabl'ye ch'tait qu'i' cachait chein d'vant driéthe auve la tchithette en d'vant et l'engîn (et la cabinne) d'un bord. Don l'ouadgîn 'tait vèrtchi en allant. J'pâssînmes lé long d'la côte et arrivînmes dans un village tchi 'tait un mio coumme Saint Aubîn mais pus couleuthé auve des ruettes pavées. Là j'fus dans eune salle où'est qu'i' y'avait eune exhibition auve un discours entouor tchique sujet politique. Jé tchittis la salle et pâssis les bieaux bâtisses du village tchi 'taient peints en des difféthentes vives couleurs et griffouoillis auve du blianc. Lé solé lithait et j'décidis d'raller en Ville à pid.

Rêvé l'26/10/2026
 

Viyiz étout: