Trenton, Michigan,
USA
Lé 21 dé mai, 1977
Moussieu l'Rédacteu,
J'tais êtonné d'liéthe, dans la gâzette dé Jèrri du 24 dé mar, qué la qualité d'êducâtion dans l'Ile a dêtérioré né v'la tchiques années. Un bantchi nouos dit qu'en visitant eune êcole i' fut surprîns d'vaie l'nombre d'machinnes à cartchuler dans les clâsses. Et un aut' nouos dit tch'il est absolûment "en horreur" dé vaie tant d'ches machinnes à cartchuler, d'grandeu pour la pouchette, parmi l's êtudiants, et qu'un janne homme tch'avait un cèrtificat du nivé "O" d'êducâtion n'pouvait pon additionner eune colonne dé chiffres correctément sans l'aîgue dé ieune dé ches machinnes-là quand i' lî donnit un sîmpl'ye examen à pâsser pour travailli dans sa banque.
L'articl'ye donne, comme raison, lé manque dé disciplinne en général dans l's êcoles, mais principalement lé manque d'întéthêt et d'ambition des êtudiants ieux-mêmes, et lé fait tchi n'pathaissent pon lus gêner de chein tchi l's attend à la sortie d'l'êcole et d'vouler lus prépather pour l'av'nîn. Eh bein, i' faut qu'j'admett' qué lus criaill'lie et rithie, et convèrsâtion bêtasse quand i' y'en a du tout, dans les beusses en Jèrri à la sortie d's êcoles né m'a donné eune bouanne împression d'lus întelligence et d'lus condite quand j'tais en Jèrri ches dreines années.
A m'n idée, ieune des raisons est qu'la vie pour les mousses d'à ch't heu est trop aîsie, et qu'les pathents les gâtent trop et tch'il' ont trop d'sou dans lus pouchettes à dêpenser. V'là tchi lus donne un sentiment d'sécuthité dans la vie actuelle tchi l's empêchent dé sé d'mander tch'est qu'l'av'nîn s'en va lus apporter, et i' n'lus en gênent pon.
Quand j'tais mousse en Jèrri chu problème n'existait pon. A mains qu'les pathents fûssent riches assez pour vous env'yer au collège, nou-s-allait à l'êcole êlémentaithe jusqu'à l'âge dé treize ans, et pis nou-s-allait en travas ou nou-s-apprennait eune vocâtion. Ch'tait hardi eune affaithe dé fanmil'ye. Dans man cas, j'tions eune fanmil'ye dé forgeurs et fétheurs dé j'vaux. D'habitude, les garçons continnuaient dans l'mêtchi du péthe, et les filles apprannaient à couôtre ou à féther. S'i' n'y'avait pon d'mêtchi d'fanmil'ye à siéthe, nou-s-allait travailli dans les clios.
Mais s'ou criyiz qu'l'êducâtion a souffèrt, affaithe dé qualité en Jèrri, ch'n'est rein à compather à chein tchi s'pâsse en Améthique. Dépis qu'la badgette a 'té d'fendue, la disciplinne a dispathu. L's êcoles sont supèrbes comme bâtisses et êtendues d'tèrrain pour "football, baseball, tennis, track, stadium", etc. Moussieu l'Sénateu Jeune n'éthait pon d'problième â ch't êgard-là si L's Êtats pouvaient affaûrder les forteunes qué tout chenna couôte ichîn. Ch'est l'contribuabl'ye tchi paye pour et tout l'monde sé pliains ses împots tchi faut payi pour les êcoles, sustout comme les mousses sont apprîns un tas d'choses tchi n'ont rein à faithe ès trais "R" ("Reading, 'Riting & Rithmetic") Les filles apprennent à coutchi (dans man temps ch'tait la m'mèe tch'apprannait ch'la à ses filles!), à faithe les lyits et tchiques aut' affaithes. Filles et garçons apprannent la mûsique, (nou ouait l'tambour et la trompette souvent dans l'vaisinné). Et les garçons à jouer à football et tennis et aut' sports.
Mais affaithe d'înstruction? Ch'est bein r'connu ichîn qué même un tas d'"B.A's" né peuvent pon êp'ler comme i' faut, et j'ai veu des rapports dé l'Armée disant qu'un tas d'jannes hommes tch'avaient des diplômes d'êcoles s'gondaithes né pouvaient pon pâsser les sîmpl'yes examens qu'un soudard est supposé d'pouver pâsser en entrant l'Armée comme èrcru. Et j'avons des "B.A's" à la douzaine à marchi les c'mîns viyant tch'i' dév'thaient c'menchi comme présidents des compangnies d'îndustrie à la pliaiche dé c'menchi au bas d'l'êtechelle. Mais un homme dé vocâtion gângne souvent pus qu'touos ches supposés êdutchis, et nou sé d'mande pourtchi aller à l'êcole à la maintchi d'sa vie si un ramonneux d'cheunm'née peut gângni pus qu'un "B.A."
Tout chennechîn n'veurt pon dithe qué touos les mousses sont d'eune sorte. Y'en a tchi sont consciencieux et tch'apprannent bein à l'êcole maugré tout. Ch'est dans l'caractéthe de l'individu d'êt' têtu d'un bord ou d'l'autre! Et l's Améthitchains tch'ont 'té à la leune, et les scientistes tch'ont fait les cartchuls nécessaithes pour l's env'yer là-haut, sont d'la généthâtion tch'allait à l'êcole dans l'temps qué l'maître d'êcole avait l'drouait d'lus êcaûffer l'driéthe des braies atout la badgette. Et j'ai ieu la chance d'aller à l'êcole dans chu temps-là étout!
George d'La Forge
JEP 2/6/1977