En Améthique,
lé 29 dé mai, 1964.
Moussieu l'Rédacteu.
Quand j'vai les gens condithe lus mousses à l'êcole en moto dans les villes ichîn, et les "School Bus" pliennes dé mousses en campangne, j'pense à m'n êcolage quand j'marchais des Landes au Haut du Mathais à St. Ouën y'a souoxante-chinq ans!
À l'âge dé sept ans j'avais c'menchi siez Missis George L'Boutilyi (Mabel Maugi dans chu temps-là) auprès d'l'Églyise dé St. George, et ch'tait lyi tchi m'apprîns m'n ABC. Dans ma dgiêxième année j'allis à l'Êcole Wesleyenne au Haut du Mathais. Jean L'Cornu d' "North West", d'l'aut' côté du Ménage ès Feuvres, dé pathents Méthodistes, m'y condisit l'preunmié jour. Ch'tait d'même qué j'mé trouvis à la Wesleyenne à la pliaiche dé l'êcole dé l'Églyise!
Y'avait un but à marchi des Landes et nou v'nait à connaître la route comme i' faut. Si ma mémouaithe né m'joue pon d'farces, Maît' Abraham Le Ruez d'meuthait dans la preunmié maison quand j'touannais à gauche dans la Rue à la Pendue. La préchaine, au Carrefour, tait la cheinne à Franço L'Cornu, l'pârrain d'man fréthe Frainque. À drouaite, Maît' Tanminne Le Cornu, organiste d'l'Églyise dé St. George. À La Fontaine, la boutique à Frainque Sélous et la fèrme où-est qu'John Hamon fèrmait. Et pis la boutique à Missis du Hieaume à gauche et la maîson et tchèrpent'tie à Maît' Fred de Caën à drouaite.
Dévant v'nîn à la Ronde Cotte, eune pétite maîson habitée par un bouan'homme Giot dit La Source. À la Ronde Cotte, Cap'taine Le Blianc. Un p'tit pus liain, à drouaite, la belle maîson au Sieur Le Maistre, la Maison d'Trodez à gauche, et l'Sieur Ph'lippe Le Feuvre (Lé "Gros Marté", pilyi des Rosièrs) à Morville à drouaite. Eune belle vielle typique maîson Jèrriaise, démeuthe du sieur Coutanche, pus tard Chent'nyi, 'tait la préchaine à gauche, et "Woodbine" fèrme dé la fanmille solide des Viberts, à drouaite. Et pis la maison au p'pèe à Clarence Le Boutilyi (Clarence 'tait chétif et avait des leunettes), et la maison au Sieur Bailhache à gauche. À drouaite, eune maison atout un nom Angliais, "Vanilla", dans l'fond d'un gardin, où-est qu'un Jean Mahé d'meuthait. Et pis l'bieau Champ Donné à Moussieu Syvret à gauche dévant v'nin à la Chapelle Wesleyenne. Jé n'mé r'souveins pon si "Terra Nova" 'tait bâtie à ch't êpoque'là. Endrait la Chapelle, i' m'sembl'ye qu'eune longue cache ménait siez Moussieu l'Connêtabl'ye Henry Philippe d'Auvergne. Rein d'aut' dévant v'nin ès Siex Boules.
La route nouos pathaîssait longue, mais nou trouvait l'aventuthe en c'mîn. Quand un fèrmyi nouos passait au trot dans sa vainne, nou couthait souotre pour sé pendre sus l'driéthe et mett' les pids sus l'êsseu. Si y'avait des mousses tchi n'pouvaient pon couôrre vite assez pour l'attraper, i' criyaient "Whip behind" au fèrmyi sus lé d'vant d'la vainne. S'il 'tait d'mauvaise heunmeu, ou tch'i' n'aimait pon les mousses, i' faisait la minne dé vouos fouetter, et nou laissait-couôrre! Si nou s'en criyait capabl'yes, nou fichait eune tournéoualipe ès cheins tch'avaient criyé "Whip behind!" Lé Sieur John Hamon d'La Fontaine aimait les mousses, et à la pliaiche dé nouos bailli l'fouet i' nouos faisait monter dans sa vainne. J'n'ai janmais oublyiyé sa bouanté à nouot' êgard, et j'eus l'pliaisi pus tard dans la vie d'lî ramémouaither quand j'allis l'vaie siez li, au Coin à St. Brélade - pas longtemps d'vant tch'i' mouothisse - en compangnie du Juge Francis Vibert Le Feuvre.
Pour un temps, les cèrcl'yes fûdrent populaithes. Papa m'en fit iun dans la forge et jé l'fit sèrvi en allant à l'êcole pour des mais. Nou les poussait atout un maniéthe dé cro fait à l'exprès, mais i' fallait couôrre pour les garder en allant et Manman s'pliaingnait qu'j'ûsais mes bottes pus vite qu'à marchi! Ch'tait des bottes à cliou qu'nou faisait sèrvi. Les cheinne faites à la main par un cordonn'yi duthaient pus longtemps qu'les cheines d'acat.
Ch'tait Moussieu Harry James Carter tch'était l'maître à l'êcole, et il 'tait rude atout la badgette. Si nou v'nait tard au matin nou n'pouvait pon aller s'assiéthe en classe. I' fallait s'mett' début l'long d'la muthâlle à côté d'sa tchaise, et nou-s attrapait eune ouappe dé sa badgette dans la main. I' n'y avait pon d'extchuse, et nou n'éthait pon pensé à en inventer! Il 'tait quand-même un bouan maître et nou-s apprannait bein.
En r'vénant au sé nou prannait san temps. Nou jouait auve l's aut' mousses à s'entre pitchi eune balle d'un côté d'la route à l'autre. Nou s'abûsait à grîmper les muthâlles, et nou-s avait des courses à vaie l'tché tch'arriv'thait l'preunmyi au préchain carrefour. Dans touos les cas nou-s ûsait ses bottes trop vite, sustout l'but quand nou grîmpait les muthâlles! Et pis nou n'dêchithait pon mal d'habits en jouant à Saute-Mouton dans les carrefours! I' n'y avait pon fort dé vouaituthes dans les routes dans chu temps-là.
Quand nou-s arrivait siez-sé nou 'tait gronné pour aver prîns si longtemps à r'vénîn d'l'êcole. auprès souper fallait faithe ses léçons pour lé lendemain. J'tais bein lassé par lé temps tch'i' fallait s'couochi. Est-che ravissant qu'nou n'avait pon l'temps d'faithe mînché?
George d'La Forge