L'Hôpita

Le Ménage ès Feuvres,
St. Ouën.
Lé 30 septembre, 1972

Moussieu l'Rédacteu,

J'm'èrsouveins qué quand j'tais mousse l's anciens avaient horreur d'aller à l'Hôpita. Dans chu temps-là, sans doute, les jannes prannaient soin d'lus anciens. i' n'y avait pon un janne ménage tchi n'avait pon un grand'péthe ou eune grand' méthe, et tchiquesfais les deux, assis auprès du feu quand nou-s-allait les vaie au sé, et i' n'y avait qué l's anciens tchi n'avaient pon pèrsonne à les souangni tch'allaient à l'Hôpita. Dé nouos jours tout est changi. Les jannes veulent lus mathier, acater un moto, eune télévision et Bouan Dgieu sait tchi, tout en mètme temps, et comme les nouvieaux mathiés ont souvent à travailli touos les deux pour pouver payi pour tout chu luxe-là, i' n'ont ni l'temps ni l'enclyîn d'souangni les vièrs. Et pis, étout, i' faut admettre qué les gens vivent pus vièrs que d'aut'fais, et qué quand i' d'veinnent grabataithes nou n'peut pon s'attendre qué la janne femme s'en va pouver rester à la maîson niet et jour à les souangni. et les gens n'ont pus l'horreur dé l'Hôpita tch'il' avaient dans l'temps jadis.

J'peux dithe, auve connaissance dé cause, qué j'en avons eune bouanne Hôpita, ichîn en Jèrri, car j'y ai pâssé eune tchînzaine dé jours à ches drein. J'peux affirmer qu'oulle est à la hauteu d'autcheune au monde. La "Neuve Aile", comme la nouvelle partie est appelée, est absolûment modèrne, lé soin donné par les nosses et lus aîgues est prfait, et la nouôrrituthe est excellent. Touos les jours, nou-s-a l'chouaix d'un ménu pour lé lendemain, et y'a tout pliein d'variêté. Pour un vyi comme mé tchi d'meuthe tout seu ch'tait un bieau c'menchement d'jour d'êt' rêvilyi d'bouanne heuthe par eune belle nosse tch'apportait eune bouanne tâssé d'thée pour vouos huilet l'gôsyi. I' sont mèrveilleuses, ches nosses-là. J'crai tch'il' avaient chouaisi les miyeuthes pouor souangni d'mé dans lé "Le Quesne Ward", et si j'avait 'té janne... enfîn, i' faut laîssi l'affaithe d'en par là. Eune chose est bein cèrtaine, nou n'peut pon êt' janne deux fais. I' faut mouothi janne ou vivre vyi!

Eune chose pliaîsant étout, est qu'les grosses têtes dé nouotre Hôpita prannent un întéthêt pèrsonnel dans les malades. Mad'mouaîselle Renouf, la Matronne, fait eune touannée d'temps en temps et d'mande à tout l'mode comment tch'i' sont et s'i' y'a rein qu'ou peut faithe dé pus pour lus confort. ch'est charmant d'sa part quand nou pense à sa grand' responsabilité administrative.

J'tais dans eune chambre à deux pèrsonnes, et duthant les preunmié dgiex jours qué j'tais-là, j'eus la chance d'aver l'Sieur Alfred Allo, d'St. Jean, comme compagnon. V'la tchi m'donnis l'privilège dé bailli d'ma becque auve li en Jèrriais à londgieu d'jours, et comme jé n'sai pon trop bein l'Angliais ch'tait pliaîsant d'pouver bavardaer dans la langue matèrnelle. et sa charmante femme nouos apportait un bieau souôri sus sa fache touos les sièrs auve des flieurs et des fruits. et j'avais ma châre de vîsiteurs étout - j'n'ai mème pon d'run dans la gâzette pour les nommer tous - et d'mème nou s'gardait au ras d'chein tchi s'pâssait dans la campangne. Pus tard, man compangnon d'chambre fut Messire George Binney, DSO. Un charmant et distîndgi moussi. J'ai r'gret d'aver veu san décès dans la gâzette à ches drein.

Ieune des raîsons qu'nouos anciens n'aimaient pon l'idée d'aller à l'Hôpita 'tait probabliément viyant qu'oulle 'tait pûtôt associée dans les vièrs temps auve lé soin des pauvres. "La Maîson des Pauvres", successeur à l'ancienne Chapelle dé La Madeleine, avait 'té l'èrfuge des pauvres dans les tchînzième et seizième siécl'yes. Un Acte dé la pâraisse dé St. Hélyi en date du 27 septembre, 1767 (nouos dit l'avocat Edmund Toulmin Nicolle dans san livre "The Town of St. Helier"), mentionne qué chutte maîson-là 'tait en ruinnes, et l'24 dé janvyi, 1772, l'Connêtabl'ye fut autorisé d'la vendre.

I' s'adonnit que Dlle. Marie Mauger, veuve de François Bartlett, décédée en 1741 et inhumée dans l'chînm'tchiéthe dé St. Brélade lé 26 d'août dé ch't année-là, avait laîssi trais mille louis dans san testament pour bâti un hôpita. ch'tait un tas d'sou dans chu temps-là, et l'înscription sus san monûment dans l'chînm'tchiéthe nouos dit tch'i' fut êrigi en vèrtu d'un acte des Êtats d'l'île. En 1750, Philippe Bandinel, seigneur dé Mélèches, donnit l'tèrrain nécessaithe pour bâti l'Hôpita, mais ou n'fut pon c'menchi dévant 1765 viyant tch'i' y'eut des causes dévant la Cour entouor lé testament. Enfîn, lé don d'Madanme Bartlett vînt justément en temps. Les pauvres tch'étaient dans la vielle Maison des Pauvres fûdrent havrés dans l'Hôpita qu'sa générôsité avait bâti.

Ou n'fut pon sans avârie, l'Hôpita. Y'avait un tas d'soudards (des rédgulièrs env'yés pour protégi l'Île dépis la Dgèrre dé Jèrri dé deuxans d'vant) louogis d'dans, et ou fut dêtruite pas eune explôsion d'poudre en 1783. Ou fut r'bâtie et ouvèrte lé 8 janvyi, 1793, pour erhavrer les pauvres dé l'Île.

En entrant par la grand' porte dé d'vant, nou vait eune liste des beinfaiteurs et beinfaitrices tch'ont, avau l's années, donné des sou par testament ou autrément pour san maintchein et agrandissement. En 1828, Charles Robîn, Êtchuyer, donnit £3,000. En 1948, Mme. Ann Alice Raynor donnit, par testament, £305,000. Et en 1960 ch'fut Mme. Elvina Ann Hill tchi fut beinfaitrice au montant de £5,739. Y'en a bein d'autres. J'n'ai mentionné qu'les cheins tch'ont contribué trais mille louis et pus. J'vouos asseûthe qué ch'est eune bouanne pliaiche à laîssi des sou quand nou s'en va pour lé drein viage tchi n'a pon dé r'tou, car Jèrri peut êt' bein ordgilleux dé s'n Hôpita!

George d'La Forge