Eune chose qui m'pliait hardi quand i' fait bé est dé pouver vaie la côte dé Sèr. Dépis mes pus jannes jours j'ai tréjous aimé vaie chutte pétite île-la! D'ichin à St Ouën, i' n'faut tch'i' faiche bein cliai pour n'pouver pon vaie au mains partie d'sa côte et d'ses falaises.

Dé nos clios d'fèrme lé tou d'Iouville, jé n'vai pon toute l'île, mais un bouôn mio quand même. Du bord des Landes, dgia, ch'est un pliaisi hors dé chu monde. Près du vièr ancien Châté dé Gros Nez, ch'est là, dans m'n opinnion, ieune des miyeu pliaiches pour vaie Sèr spécialement quand i' fait bé et qu'nou piêsse vaie pour des milles au liain en plieine mé. Même tchiquefais, nou dithait quê la p'tite île de Sêr èthait apprêchi d'St Ouën d'un seul coup - ou pathaît si près. Nou pens'sait quâsi qu'oulle a bouogi d'pliaiche, tandi qué nou-s-a ieu l'dos touônne!

Deux ans auprès l'Otchupâtion, en dgiêx-neuf chents quarante-sept, lé vîngt-quatre dé mai pour être exact, l'officyi et soudard, Field-Marshal Viscount Montgomery payit eune visite officielle à Jèrri. Eune fais qu'il eut rencontré et pâlé ès mousses d'êcole, jé n'sis pon seux si ch'tait sus la Caûchie ou lé long d'partie de l'Avenue Victoria, iou qué j'taîmes, mais le Field-Marshal Montgomery annoncit qué pour célébrer sa visite en Jêrri, i' voulait d'mander, même c'mander - après tout i' 'tait officyi - qué touos l's êfants d'êcole eûssent un jour de vacance.

Le jour fut chouaisi et lé maître d'êcole ichîn à l'êcole Wesleyenne à St Ouën (nou trouvait l'êcole dans l'temps entre la Fosse au Bouais et les Siex Boules, pas liain du Haut du Mathais) dêcidit d'faithe eune p'tite excursion d'un jour en Sèr, auve tchiqu'uns des êfants dé d'dans sa clâsse.

Lé jour arrivit, i' faîsait bé et j'tais l'vé dé bouonne heuthe lé matîn et bein vite en route, à pid pour c'menchi, amont l'Mont dé la Grève dé Lé, pour mé trouver à l'êcole. Là, not' maître, lé Sieur A A H Downer, tchi bein d's années après fut êlu Juré-Justicier dé la Cour Rouoyale, nos rencontrit.

Lé charabanc 'tait dêjà arrivé, tout prêt pour nos emm'ner à la grand' Caûchie d'la Ville. Touos présents et comptés i' 'tait temps d'embèrtchi sus l'baté, app'lé l'Brittany. J'sis quâsi seux qué pour touos nous mousses dé la grand' clâsse a St Ouën, ch'tait la preunmié fais à sorti d'Jèrri!

J'taîmes tous trop jannes pour aver sorti d' l'Ile d'vant qu'la dgèrre fûsse décliathée en dgiêx-neuf chents trente-neuf, et pas moyen d'faithe chenna duthant les chînq années d'Otchupâtion ni n'tout. Pour touos nous, not' preunmié fais à bord d'un baté tchille excitâtion - la mé d'vait être calme car j'n'ai pon autcheune mémouaithe d'autchun tchi souffrit dé chu sérieux malaise-là, té ma d'mé! Lé baté arrivé près d'Sèr, j'ancrînmes en d'hors en plieine mé, mais pas trop liain d'la vielle caûchie au Creux. Fallait d'valer du grand baté avaû les d'grés en montée, pendus et amathés l'long du bord du grand baté et d'sembertchi dans des p'tits batchieaux pour la courte travèrsée à la vielle caûchie, d'vant mettre not' pid sus nouvelle terre.

Touos comptés acouo eune fais, j'ramontinmes amont l'mont (en Sèrtchiais La Tcherrîre du Creux) touos excités, comme rein qu'des mousses d'êcole peuvent ètre, auve des ièrs comme des souôtâsses, prèts à tout vaie. Eyou qué j'fumes et tch'est qué j'vîmes jé n'sis pon trop seux; lé pâssage du temps joue un mio auve la mémouaithe. Eune chose, dgia, reste aussi claithe à ch't heu comme si ch'tait hièr; ch'tait d'mangi not bouochie, am'née auve nous, au pid du Vièr Moulin, assis sus un p'tit fôssé, au solé, touos heûtheurs. La bouochie finnie et, en route pour du nouvieau terrain. J'trouvis qu'j'avais laissi ma bouonne câsaque - la preunmiéthe d'pis l'Otchupâtion - sus l'fôssé iou qu'j'avions mangi not' bouochie. J'vos garantis qué j'pouvais couôrre pus vite dans ches temps-là qu'à ch't heu, et dans p'tit d'ségondes la mêprînse et l'oubli futent regliés et tout finnit bein.

Ervénus en Jèrri chu sé-là, tous 'taient bein lâssés; not' preunmié p'tit viage avait 'té hardi intérêssant not' preunmié fais en mé sus un grand baté et hors Jèrri!

Aujour d'aniet, quand j'm'appraiche dé Sèr, qué ch'sait d'nos clios d'fèrme ou d'Gros Nez, j'pense tchiquefais à ma preunmié visite hors Jèrri au p'tit Sèr. Sav'ous bein, y'a pus d'chînquante ans dé chenna à ch't heu. J'c'menche à vieilli!

Ted Syvret