La dèrrhnièthe et pus nouvelle chose à Londres ch'est l'q'min d'fé électrique - Drole dé bastringue ch'la. Il a à pé près treis milles de long: pus ou mains comme d'la ville à St. Aubin, i'l'y'a sièz stations - all told.
Imagine un grand gas pipe dé d'ghèz huit pids d'giamèttre, septente pids souos tèrrh nou peut d'scendre par dé biyiaux d'grès ou par lé lift: chein q'nou z'appelle en Jèrrhyiais - si un mousieu qu'alli à l'Exposition d'Paris est une autoritèh sus notre bouan vièrrh langage- un encenseur. Y'ieunne des stations est nommèh 'Borough,' - bouan nom ch't'y là, extrem'ment à propos, y dév'thaient tout d'même l'êp'lé burrow car ch'est justement comme un lopin d'lapins: faithe des creux souos tèrrh comme ch'là; sinon qué les lapins n'ont pas la veux électrique - et équé j'ainne sait pas, y disent que les cats en ont: qué si nou prend un nièrrh cat dans un appartément ouést qu'nonne vait lèrrhme et qu'nou l'y frotte lé pé sus l'dos à larbours et pis mettrèh sen dait sus l'but d'une dé ses zouotheilles où sus l'but d'la coue, qué n'ou vait l'êtincelle électrique. Si t'chiqu'zuns veulent expéthimenté y f'thont aussi bein d'enhalôdé l'cat, car y disent qu'inne aiment pas ch'la, et les cats grimment: - ch'est pourtchi t'chèqui 'sait si les lapins n'valent pas souos tèrrh aussi bein, comme j'viyiais à matin à yièthe l'Almounâh d'la "Nouvelle Chronique," aussi comfortaby'iément comme si j'avais 'tait sièz nous sus men sofa dans l'appartément que ma bouanne femme appelle par courrtoiesie lé drawing-room. - Quand nou z'arrive à la station nou paie quatre sous, et nou passe - This way for the lift - et nou z'embèrrque dans une sorte d'appartément; l'homme halle un p'tit miyio sus une corde ét pis dévans qu'nou peut dithe "Jean Râhbinson" vous v'là au bas - par ichin pour la train! par ichin pour la train!: - deus treis pas èt vous v'là sus la piy'iatteforme, une aut'e minute et pis nou ouè un manièthe dé ronnais qu'apprèche èt èr'rgardant dans lé grand gas pipe nou vait les veux qui sont sus l'ingine, ch'est pas un ingine mais enfin. Il'appelle la machine qui halle la train un motor, et comme il entre dans la station nou vait les étincelles b'yieues d'l'électricitêh en d'sous; le motor est grand comme les p'tites ingines du qu'min d'fé dé St.-Aubin, avec la chumnêh abattue, èt cârrêh comme la bouête a schiedam au couôsin Bram, y'ià deux hommes a manoeuvré ch'là, et les veux électriques dessus, men garçon, ch'est comme une illumination un grand jour dé fête; y'ià treis cârosses, nou z'entre par lé but, comme dans les longues cârosses en Jèrrhyié. Y'ià des manièthes dé heiches en fé entre les cârosses et non' peut pas entré dévans qué lé conducteux les ouvres. Il' ouvrent de côtêh èt ouvrent èt frument, comme les pétites machines qué j'avaiment quand j'taimes babies pour mettre des soudards dessus; quand y sont frumêhs y pathaissent comme lé trellis work qué tu mais sus la muthaille dé ten gardin pour empêchi les cats veizins dé v'nin t'è f'g'hi à gardiné, ou dé t'donné des sérénades au cliéh d'la Lune. - "En voiture, messieurs" ding ding, la qu'yioche sonne, èt marche garçon, à pé près douze milles à l'heuthe. - nou s'trouve dans un saloon stoffêh comme une couch. I'l'n'y'a qu'une classe: pas dé first, second et third, ah! nen d'ja. Lé Prince dé Galles alli d'dans l'aut'e jour, èt à matin j'ai y'ieu un chat avec un costermonger qui v'nait dé Billinsgate avec une cassêh de rouoges héthans p'têtre dans la même cârosse; les lampes électriques par dessus la tête sont plyiattes èt grandes comme d'zassiettes à soupe, j'pense qui sont faittes d'chutte faishon là en cas qué t'chiq'z'uns veindraient avec un extra special édition dé 'Bell Topper,' chein qu'les Ang'i'yais appelle un good old fashioned stove pipe: comme le chein qué notre ami pèrrhdi amont la Tour Eiffel l'annéeh passéeh, - "Stockwell! Stockwell!! all out here! - égainne (bouan vièrrh mot ch't'y la) deus treis pas, halle la corde, ét houp la nous v'là sus l'pavéh! Tout chein qu'j'ai à dithe ch'est qu'ch'la marche en papiyié d'musique ch'est mèrrhveilleusement bein'ne arrangi et j'cré qué la ride de la Citéh à Stockwell est pour 4 sous la miyeuthe marchi ride du monde.
J'entends qui sont à faithe une souscription siez nous pour acaté un picot si peuvent en trouvé yiun d'la s'conde main à bouan marchi, et v'la t'chi m'rappelle que ch'est la saison de Good will, etc., etc., ch'est pourtchi: à tous un bouan Noué; et qué tous est une heutheuse èt prospétheuse Nouvelle Annéeh est le souhaith de lus vièrrh sèrrhviteur
"Ch'la S'Peut."
Nouvelle Chronique de Jersey 27/12/1890
Viyiz étout: