Lé thiâtre (nou dit étout théâtre) ch'est l'art dé présenter eune histouaithe dans eune espèce atout des patholes, d's actions, ofûche d'la chant'tie et d'la danse. Nou peut présenter des pièches dé thiâtre en pliein air ou dans eune salle conv'nabl'ye, mais y'a des bâtisses grées tout partitchuliéthement pouor la présentâtion d'pièches tch'ont nom étout thiâtres.
Lé quatorze dé Novembre 1778 l's Êtats d'Jèrri votîtent un acte pouor întèrdithe la présentâtion d'pièches dé thiâtres et d'farces sans la pèrmission du Bailli. Logiquement don y'avait tant d'itelles pièches tchi gênaient l's autorités, mais i' n'en a pon d'èrcord dé tch'est qu'i' 'taient. Sans doute des pièches satiriques ou scandaleuses ès fêtes et faithes dans des tentes. En 1786 y'a eune mention d'un clobe d'amateurs tchi proposait présenter des pièches d'auteurs fanmeurs. Les preunmièrs tchi prénsentîtent du thiâtre professionnel dé tchi j'avons l'Information 'taient eune dgaîngue d'acteurs Français tchi vîntent présenter des pièches dans la Longue Salle au d'ssus d'la Halle à Blié dans l'Vièr Marchi - dêcrite coumme la salle dé la conmédie - en 1788. Des compangnies d'acteurs vîntent dé l'Angliétèrre en 1792 et 1793, et en 1795 et 1796 des amateurs présentîtent des pièches dé Voltaire. Ch'est r'cordé qu'des compangnies d'acteurs d'l'Angliétèrre présentîtent des pièches à la Faithe dé Saint Jean en 1793 et 1795, mais auprès chenna l's Êtats supprînmîtent la faithe en 1797 (la raîson 'tait pus à co l'ivrouongn'nie qu'lé thiâtre mais sans doute les deux choses allaient d'pathe).
Ch'fut en 1802 qu'lé preunmié bâtisse dé thiâtre fut ouvèrt en Jèrri - dans chein tch'a achteu nom Ruette dé la Conmédie à Saint Hélyi. Ch'tait probabliément eune grange ou aut' bâtisse convèrti en thiâtre au run d'êt' un neu thiâtre, mais ch'tait l'preunmié bâtisse dêdié ès présentâions thiâtrales.
Viyiz étout:
lé thiâtre, lé théâtre
theatre
l'opétha, l'opéra
opera
la pièche
play
la strade
the stage
l'audienche
the audience
lé scrit
the script
un acteu
an actor
eune actrice
an actress
lé fard
make-up
les costeunmes
costumes
lé dgialogue
dialogue
la conmédie
comedy
la tragédie
tragedy
la farce
farce
