Trenton, Michigan, USA.
Lé 5 dé juîn, 1982.
Moussieu l'Rédacteu,
Sus la télévision d'nouos iours ichîn en Améthique nou vait les pélérinnages dé Sa Sainteté lé Pape Jean Paul II dans divèrs pays. À ches drein san pélérinnage a 'té dans lé Rouoyaume Uni et il a 'té r'chu partout (à l'exception d'eune pétite minnorité) à bras ouvèrts. Ch'est sans doute san charme pèrsonnel tchi l'fait êt' populaithe et beinv'nu.
Ch'est dépis qué l'Pape Jean XXIII otchupit l'trône papal qué l'catholicisme Romain a pûtôt pèrdu la mêfianche qué l'peupl'ye protestant soulait aver quand j'tais mousse. V'là tchi n'veurt pon dithe tch'i' n'y'en a pon acouo un tas, d'mêfianche, parmi cértains, comme, par exempl'ye, lé Révérend Ian Paisley, lé minnistre Presbytérien dé l'Irlande du Nord. I' n'est sans doute pon tout seu d'sa sorte.
Mais i'tais ravi d'vaie la bouanne réception qué Jean Paul eut en Êcosse, où'est qué j'pensais tch'i' né s'sait pon si bein r'chu. L'attitude des Jèrriais en général vis-à-vis du Pape a changi hardi dépis qué i'tais mousse.
L's anciens, évidemment, n'en criyaient pon grand' chose, et quand les mousses 'taient mêchants les pathents les m'nichaient dé "l's env'yer siez l'Pape". Quand eune fil'ye 'tait charmante au point d'êt' même séduîthante, i' disaient: "V'là eune fil'ye tchi tent'tait l'Pape!" Quand un homme voulait s'loûser d'aver ieu l'au-d'ssus dans eune dispute auve un autre, i' disait: "J'l'ai env'yé siez l'Pape!"
Quand tchiquechose sé trouvait mêlachi ou qu' nou n'pouvait pon rêsoudre un problème, nou disait: "L'Pape n'y r'connaîtrait pon sa femme!"
Comme ou l'savez, i' y'a pus d'cérémonies dans les sèrvices dé l'Églyise Romaine qué dans la majorité des sèrvices dans l's églyises protestantes, sustout dans les congrégâtions Wesleyennes et Baptistes. L's anciens appelaient ches cérémonies des chînmagrues! Même la simpl'ye p'lisse (lé "surplis") qué les membres du chant mettent dans l'Églyise Anglyicanne 'tait considéthée ét' pathente à la Papaûté, et j'l'ai ouïe appelée "un cache-mînséthe"' Ch'tait sans doute des survivances calvinistiques tchi faîsaient les vièrs Jérriais qualifier toutes cérémonies d'natuthe réligieuse dé "Papaûté et d'idolâtrie."
Ch'est don r'mèrquabl'ye dé vaie l'changement d'attitude qué l'pâssage du temps a apporté vis-à-vis l'Églyise Romaine. J'y pensais quand j'viyais, sus la tétévision, lé Pape et l' Archêvêque dé Cantorbéry agenouoillis côte à côte en d'vant du grand autel dé la Cathédrale dé Cantorbéry, chef siège dé l'Églyise d' Angliétérre, sîngne du d'si des deux prélats d' eune rêunion êventuelle. Pour dé mé, ch'est natuthel d'espéther vaie telle rêunion car lé catholicisme n'a janmais 'té abandonné dans l'Églyise d'Angliétèrre. La preuve en est dans l' "Credo" tchi nouos dit dans La Litourgie "Et je crois une sainte Église Catholique et Apostolique", ou dans lé livre d'priéthes en Angliais "And I believe in one Holy, Catholic and Apostolic Church". J'ai souvent r'mértchi qu' un tas d' gens l'répétent Dînmanche aprés Dînmanche sans rêaliser tch'est tch'i' sont à affirmer, car i' vouos dithont pus tard qu' ou n'est pon catholique! Oulle est protestante au sujet dé cèrtaines crianches dé l'Eglyise Romaine comme, par exempl'ye, l'înfaillibilité du Pape et "l'Assomption" d'la Sainte Vièrge Marie, mais oulle a tréjous gardé ses vraies crianches catholiques comme la Succession Apostolique dé sa prêtrise, la rémission des péchés et la vie êtérnelle. À m'n idée, ch'est grand damage qué un tas d'nouos minnistres pèrdent lus temps à prêchi des longs sérmons tchi vouos endorment à la piaiche d'instruithe lus congrégâtions au sujet d'l'histouaithe, des crianches et des dogmes dé l'Êglyise.
Les cheins tchi disent qué l'Églyise d' Angliétèrre (ou l'Églyise Anglyicanne, ch'est la même chose) fut fondée par Henri VIII en 1534 dév'thaient saver mus. Oulle existait dêjà en l'année 605 quand St. Augustîn d'vînt l'preunmié Êvêque dé Cantorbéry. Henri n'fît qué d'changi san langage du Latîn à l' Angliais, voler ses trésors et dithe au Pape d'aller s'faithe quatorze. I' n'abolit pon ses crianches et doctrinnes catholiques, et les gens continnuîdrent à la hanter et prendre ses sacréments duthant les "pontificats" dé Paul III (1534--1549), Jules III (1550-1555), Marcel II (Pape pour 21 jours en 1555), Paul IV (1555-1559), et Pie IV (1559--1565).
Pie IV était l'siexième Pape dépis qu' Henri VIIl 'tait supposé aver fondé eune nouvelle églyise, et les Catholiques en Angliétèrre avaient 'té bâptisis, confirmés, r'chu l'absolution et avaient prins la Sainte Communion d'dans pour pus d'trente ans. Peut-i' y'aver pus d'preuve qué même lé Saint Siège né la considéthait pon eune nouvelle églyise? Ch'tait Pie V (1566-1572) tchi, en 1570, ayant pèrdu espéthance dé faithe l's Angliais lus soumettre à la tyrannie d'Rome, prononcit l'excommunicâtion contre la Reine Elizabé et l'Églyise d' Angliétérre et, pour la preunmié fais, défendit ès fidèles dé la hanter.
Jean Paul II s'en va-t-i' êprouver à r'miédgi l'affaithe?