Eune lettre dé 1880
A l'Êditeu d'la Chronique
Moussieu, - Sus votte gâzaitte d'la s'maine pâssais, j'ai veu que 600 pairsonnes ont assistai à unne confairance sus l'Pape ou quique chose d'la sorte. Si j'comprands bain i s'agissait d'unne expôsition dais Jaisuites: -
Hôla! je n'emvais pon prandre un côtai ni laûtre d'la question, car j'sis aussi ranségni sur l'affaithe, coumme la majeuritai des Jerriais l'sont. Chain que je sait chais qu'il existe unne Sociétai d'chu nom la à Paris ai ailleurs, ai qui paraît qui fait qu'les chains qui sont êtablis en France essaîme, ai s'en aillent. La d'sus quiqu'uns ont voulu dithe qui s'en vainnent en Jerri. Quant à mai j'dis all-right, laissez les v'nin Jerri ais grans assaiz, les d'moiselles Westaway et d'aûtres ont oquo dais maisons à louai, ai nai d'mandront pas mûs; oprès tout, unne fais ichin i faûdra bain qu'chès gens vivent, ai nos bouochiers, boulangiers ai aûtres coummairçants an profiteront. Ah! oui m'dithous, mais chais dais gens qui font peux, i prannent dais sairmants terribles. La d'sus j'vos raîpondrai qu'yia d'ossi bouans Catoliques que dai Protestants, ai quand a aître dais gens qui font peux: Ansa! n'vos laissis pon faithe craithe ditai, ûsais d'votre jugement, ai criyiz bain, que ch'nest pon ditais saûvages coumme nou veux vos l'faithe craithe. Quand à lus sairments, i sont au droit, imme semble; dais prendre lai sairment qui veulent tout aussi bain qu'les Francs-Machons ou auchune Sociétai.
Je n'vos d'mande pâs votre opinion, mais j'crai, que si ou savaîtes que 5 ou 600 pairsonnes s'an vainnent d'meuthé dans l'Ile, vous le premi, en sraîtes anchantai, car ou dithaites ovec raison - i lus faûdra la Gâzaitte.
Je n'entre pon dans la question, s'il est naicessaithe ou pâs que Jerri essait occupai par dais Catoliques, j'aimmethais mus coumme dai raïson, qui s'rait occupai par dais Jerriais Protestants, mais d'pis qu'chla n'ais pâs possible, ai que j'soummes dans un pays libre, coumme gens raisonnables, je d'vons tandre la main à touos aîtrangiers, n'importe quesse sait lus nâtionalitai, ou lus r'ligion.
Ai, puisque j'ai qu'menchi par paslai d'la confairance, pairmaittais mai un mo d'pus sus chu sujait là an tairminans. J'veux dounnai craidit au Moussieu qui la dounnais, chai certainemant unne pieume dans san chapai: An prainant vos chiffres, 600 douze sous f'thaient £15 ai an suppôsans qu'il a fai £5 à St. Ouen chla f'thait £20. Chla prouve qu'a chique chose malheur est bon ai que si n'avé pon tait question dais Jaisuites, chla éthait fait £20 d'mains.
Vos r'mairciant d'avanche pour votre obligance, j'sis Moussieu l'êditeu,
Votre obéissant Serviteu,
Un Saint Jeannais
Chu 6 d'Mai 1880
Viyiz étout: