Pouor contchéthi la Nouormandie y'a bein d's années, nos anchêtres Nouormands tchittîtent les portélets d'la Norouague. En deux mil chînq, j'mèrtchons l'chent'naithe d'l'îndépendance dé chu pays Scandinave.
Dé mil huit chents quatorze jusqu'en mil neu chents chînq, la Norouague 'tait dans la même situâtion fache à la Suède, à tchiquechose près, qu'Jèrri au Rouoyaume Unni. Ch'est en tchi l'Rouai d'Suède 'tait en même temps l'Rouai d'Norouague, mais la Norouague avait san parlément, ses louais et s'n êcononmie et l'gouvèrnément Suédouais n'avait rein à faithe auve les Norvégiens. Mais tout coumme Jèrri au jour d'aniet, la Norouague n'avait pon l'drouait s'lon la constitution d'aver d's ambassades s'pathées d'la Suède.
En mil neu chents chînq, lé Storting, lé parlément Norvégien, pâssit eune louai pouor êtablyi un sèrvice diplionmatique, v'là tchi fut bliotchi par l'Rouai Oscar. Lé sept dé Juîn, les Norvégiens dêcliathîtent qué l'Rouai Suédouais n'tait pus l'Rouai d'Norouague viyant qu'i' n'pouvait pus asseûther l'gouvèrnément du pays. Chutte décision fut confirmée par un référendum. Lé souôtchein pouor l'unnion avaient tchée d'pis qu'lé gouvèrnément Suédouais avaient întroduit des restrictions sus l'conmèrce entre les deux pays à seule fîn d'protégi l'èrvénu en Suède – auprès tchi y'avait mains d'avantage finnancyi pouor les Norvégiens dans l'unnion.
Les Norvégiens r'votîtent au mais d'Novembre pouor settler la tchestchion s'i' voulaient un nouvieau rouai ou eune républyique. Quâsiment huiptante pouor chent chouaîsîtent la monarchie – et même des républyitchains avaient voté pouor, car nou-s'espéthait êt' aîdgi par lé Rouoyaume Unni viyant qu'lé candidat au trône 'tait l'Prînce Carl dé Dannemar dé tchi la bouonnefemme 'tait la Prîncêsse Maud, fil'ye du Rouai Douard VII, not' Duc.
La nouvelle fanmil'ye rouoyale arrivit en Norouague lé vîngt-chîn d'Novembre et deux jours pus tard l'Prînce Carl dévînt l'Rouai Haakon VII.
Et siez nous, si les supporteurs d'l'îndépendance dé Jèrri gângnaient un référendum, tchi qu'j'învitêmes, nous, dé dév'nîn not' nouvieau Duc dé Nouormandie?
Geraint Jennings
Viyiz étout: