Moussieu l'Editeu,
Je sis dans la minséthe et ch'est la faute à chutte fichue course des môteurs la s'maine pâssée.
Si la Merrienne avait resté ichin comme je voulais j'n'éthais pas yeu tout l'embarras tchi m'a tchais sûs l'co, mais oulle est têtue comme une âne chutte femme-là, et j'fut forchi d'accaté deux siéges, et d'en péyi pûs d'sous que je n'pouvions affordé, et d'm'en allé ôv l'yi de bouonne heuthe pour être seûx d'être en temps.
Ch'tait notre p'tit-fils, le traisième au Bram tch'y nos y portit dans l'môteur que san péthe avee yeu, presque neu, pour djais louis l'année qu'le Rouë et la Reine vintes en Jérri. Il est en d'lacre et nou l'ouai v'nin d'un mille au lien, mais y v'a ocquo par bordée, et heutheusement j'arrivîmes là sans autchune avârie.
J'en eûmes pour pûs d'une heuthe à attendre, mais à la fin les v'la hors, et grand doûx d'la vie, tchi brit. Si l'ancien prédicateur avait tait là il éthait ben peu dithe "tchi patafiâs, mes frères."
Au qu'mench'ment la Merrienne tremblyiait d'peûx. "Oh," comme ou s'faisait, "vé't'en Ph'lip, tout-d'suite. J'pouvons sauté par dessus la muthâille et nos en r'allé par la gréve. Ben seûx tch'y s'en vont s'rompre l'co, et je n'veur pas vais ditet. Hélas, que j'voudrais être dans ma tchuîsine à rabillyi ta qu'mînse."
"Tu f'thas chonna d'main," j'l'y dit. "T'as voulu v'nin; ach'teu rest trantchille et n'fait pas d'ta bête. Le monde s'en vont craithe que ch'est une êcappée d'l'âsile que j'ai am'né ichin. Si tu continue d'même tu t'trouv'thas à la stâtion. comporte-té."
Ma fingre un mio à la fais j'réussit à la trantchilîsé, et quand vint un temps ou qu'menchit à s'excité. "N'en v'la yun tch'y va quédainne," comme ou s'faisait, et "Oh, r'garde ch't'ylà, pourtchi qu'y n'va pas pûs vite?" Bétôt n'y'en avait pas yun tch'allait vite assez. Ou m'nichait châtchun tch'y passait avec san parapluie, criyant que ch'tait une course et pas un entêrrement.
Quand j'fut tout fini j'nos en r'allîmes, mais l'pouôre Bram en attrapit tout l'long du qu'min. Ch'n'tait pas d'sa faute que dan vier tchithiot n'pouvait pas faithe pûs d'sept à huit milles à l'heuthe, mais toutes les fais qu'tchiquechose nos passait sûs la route ou y'en chantait.
Quand, au bas d'Biaumont un gâs avec un hernais not fit un brai pour l'y faithe du run, ou n'eut que d'capuchi sûs l'pouôre laiduthe, et je n'fut pas êtonné quand je r'vîmes dans notre bel, de l'vais r'fûsé d'entré pour béthe une tâsse de tais.
Ach'teu, Moussieu, chen que j'veur vos dithe ch'est qu'siez-nous d'pis chu jour-là tout marche à la grande vitesse. N'y'a autchun r'pos pour personne.
Ch'est "Dêpêche-té, don, Ph'lip," et "Mais bouoge-té, don, Ph'lip," et "Va pûs vite, don Ph'lip," le long des jours. Quand j'vais r'nué les vaques ou veur savé si ch'est pour agniet ou pour la s'maine tchi veint, et hier matin, quand j'crouêsais l'bel avec la chiviéthe, ou m'criyit d'la porte de m'dêcarré parque y'avait un colimachon à ma drouaite tchi tait prêssi et voulait m'pâssé.
Dans la maison ch'est la même chose. Ou m'donne djais minutes pour dêjeuné, un quart-d'heure pour diné, et pour man tais une p'tite dém'ieuthe. Même au liet ou gigotte, de tchi qu'à trais heuthes à matin j'mé sîs trouvé tout man long sûs l'plianchais.
Et tout chonna à cause de chutte maudite course. Nou m'a dit tch'y pâslent d'en avé yunne autre l'année tchi veint. Eh ben, si ch'est d'même quand veindra l'jour, j'attrap'thai un but d'corde, et j'am atth'thai la Merrienne à un bouais, et fiche du restant!
Ph'lip
Viyiz étout: