Fort Lauderdale, Florida, U.S.A.
Lé 24 dé mar, 1973
Moussieu l'Rédacteu,
Les gâzettes dé Jèrri c'menchent à v'nîn pus vite à ch't heu. J'en ai r'chu trais dreinment, les cheinnes du 25 janvyi et du preunmyi et huit dé févri. Chutte dreine-là m'met au couothant des nouvelles tchi n'sont qu'siex s'maines en r'tard. L'affaithe amende!
Chein tchi n'amende pon, dgia, est l'nombre d'accidents dans les routes. La preunmié chose tchi m'frappe en ouvrant la gâzette du 25 janvyi est qu'eune avârie dans la grand' rue Victoria met trais pèrsonnes à l'hôpita. La gâzette du preunmyi d'févri annonce la mort, par accident d'moto, du fis d'un docteu, et des sérieuses bliesseêuthes à sa m'mèe. Un autre homme est sérieusement bliessé quand san moto heurte lé pilyi d'eune lampe à West Park.
La gâzette du 8 févri nouos dit que l's accidents dans les routes dé Jèrri sont acouo pus nombreuses qué janmais - pus d'trais mille èrcordées pour l'année pâssée, onze pèrsonnes tuées et pus qu'huit chents bliessés - 112 dé ches'-là sérieusement.
Combein d'fais qué l'Chef dé Police en ville a dgèrni l'monde dé cachi lus motos en sobrété et prudence? Eh bein, "jé dis et l'dithai", comme nouos l'dîsait l'fanmeux poëte Wace, qué les sérieux accidents sont grandement l'rêsultat d'trop d'vitesses, et qu'la grand' partie des pèrsonnes tuées dans les routes l'année pâssée es'saient p't êt' en vie au jour d'aniet si la vitesse avait 'té trente à la pliaiche dé quarante milles à l'heuthe! Et quant ès cheins tchi sont attrapés à cachi souos l'înfluence dé bouaisson ou d'drogues - y'en eut 145 en 1972 d'après la gâzette du preunmyi d'janvyi - i' dév'thaient êt' condamnés à pèrdre l'drouait d'cachi un moto pour tout janmais!
Il est grand temps qu'les Connêtabl'yes prannent l'affaithe en main pour molli la vitesse à 30 milles ou mains dans certaines routes comme lé fît l'Connêtabl'ye L'Mèrquand à St. Pièrre. Ch'est vrai tch'i' n'y a pon fort dé monde tch'y prannent autcheun avis et tchi cachent à quarante milles à l'heuthe comme s'i' n'y avait autcheune îndicâtion d'réduction d'vitesse. En pâlant à un Offici d'Connêtabl'ye au sujet un jour, i' m'dit qué si la police arrêtait touos les cheins tchi dêpassent la vitesse dé 20 milles à l'heuthe, i' faudrait eune pétite Cour et un Juge d'extra pour les présenter d'vant Justice. Eh bein, à m'n idée, si la police les arrêtait un jour la s'maine, pon tréjous l'même jour, ou même un jour dé temps en temps, les motoristes c'mench'chaient à prendre avis. Quant à mé, j'n'y trouve pon d'peine, à molli d'vitesse à 20 milles à l'heuthe quand j'pâsse par-là quand j'sis en Jèrri.
Et dans touos les cas, pourtchi êt' si prêssis en Jèrri? L'Île est si p'tite tch'i' n'y a autcheune raison d'cachi vite. V'la tchi fait-i' chîn munnutes dé difféthence dé St. Ouën à aller en ville? Pourtchi pon tchitter la maîson chîn munnutes dévant et n'aver pon à cachi comme des fos? Sans doute, en liêsant chennechîn un tas d'gens, même mes bouans anmîns, s'en vont dithe: "I' r'dote, lé vièr George!" P't êt' bein, mais j'sis seux qué si la vitesse 'tait mollie à trente milles à l'heuthe tch'i' y'éthait mains d'morts, mains d'sérieuses bliesseûthes et cèrtainement mains d'frais pour èrgraie les motos sacagis dans l's accidents!
Eune nouvelle dans la gâzette du 8 févri m'a fait hardi pliaîsi - la nouvelle qué l'Conmité des Travaux publyiques s'en va faithe des tranchies dans les Blianches Banques pour empêchi les motos dé stationner partout et sacagi l'hèrbe et les flieurs sauvages tchi soulaient y craître à l'abandon. Ch'est r'mèrquabl'ye comment qué l'monde ont pèrdu l'habitude dé marchi deux pas. I' faut penser qu'les gens prannent lus pliaîsi à sacagi la natuthe.
Mais la miyeuthe nouvelle dé toutes est la cheinne tchi nouos dit qu'au mains trais Membres d's Êtats veulent arrêter l'envahissement commèrcial dé l'Île quandi qué L's Êtats considéthent ch'est qu'l'êconomie adoptée d'en par ichîn s'en va m'ner Jèrri. Comme nouos l'dit l'Brigadgi Lempriéthe-Robîn, "Whither Jersey?" N'est-i' pon grand temps d's'en d'menter?
George d'La Forge
Viyiz étout: