Les Pages Jèrriaises

Quandi qué d'ta belle fache et d'tan bieau ri

Quando da bela vista e doce riso

Quandi qué d'ta belle fache et d'tan bieau ri
mes ièrs sont à lus nouôrri comme d'pus bé,
mén esprit s'crait si nobliément êl'vé
qué sus la tèrre i' m'fait vaie l'Pathadis.

J'sis v'nu dé vrai du monde si êlouongni
qué d'aut' monde mé sembl'yent raîque lé soûffl'ye du vent
et tch'est qué j'peux faithe sénon pèrdre mes sens
et fidèlement d'ma fôlyie têmouongni?

En t'loûthant, ma belle, jé niole sans raiethon:
lé chein tchi, d'toutes tes grâces, est connaîssant,
n'y r'connaîtrait brîn d'tout chein qu'tu'y dêchèle.

Ta bieauté a pus d'scîn qu'janmais j'saithons
ichîn bas, mais j'savons qué l'Tout-Piêssant
tchi t'griyit, griyit les cieux et l's êtailes.


Luís de Camões
Vèrsion Jèrriaise dé Geraint Jennings

 

Viyiz étout:

 

Les Pages Jèrriaises