Les Pages Jèrriaises

Sonnet 113 d'Shakespeare

Dépis qué j't'ai laîssi, mén yi s'arroute;
et chein tchi dévthait m'ner man va-et-veint
est hors d'la vaie d'un bord - d'l'aut' n'y vait goutte,
fait l'feint d'vaie cliai, mais est dé vrai dêteint,
car i' n'env'yie pon d'forme à mén esprit
ni d'ouaîth'lîn r'gardé, ni d'flieur: rein d'ité.
M'n esprit n'comprend pon chein tch'est veu en vie,
ni n'peut garder nitout chein tch'est happé.
Car s'i' vait tchique mèrvelle ou êmânue,
d'la bieauté haut-bottée, ou bein d'la crache,
la colombe ou l'corbîn, lé blianc ou l'bliu,
la niet ou l'jeu, i' les r'forme en ta fache.
En fait d'heuner ou bein accomblié d'té,
mén esprit s'vait l'tchu à la véthité.

William Shakespeare
Vèrsion Jèrriaise dé Geraint Jennings
20/5/2012
Annivèrsaithe d'la publyicâtion des sonnets d'Shakespeare.

 

Viyiz étout:

 

Les Pages Jèrriaises