Les Pages Jèrriaises

Sonnet 59

S'i' n'y'a rein d'nouvé, mais tout chein tch'i' y'a
a 'té d'vant, mes esprits entchéthaûdés,
au run d'porter êfant, apportent l'èrtas
d'la deuxième naîssance d'un ancien avé.
Qu'la mémouaithe piêsse êcliaithi en arriéthe,
avaû même chîn chents touônnements du solé,
t'n înmage dans tchique vièr livre pouor mé à liéthe;
des preunmié scrits preunmiéthement composés.
Qué j'vaie coumme tchi qu'lé vièr monde avaient r'chu,
êmèrvilyis, la faichonn'nie d'tan corps;
si j'sommes amendés ou s'i', ieux, sont mus,
si tout a touônné et r'touônn'na d'amors.
Et j'en sis seux qu'les cheins du temps jadis
trouvaient des objets bein piéthes à louangi.


William Shakespeare
Vèrsion Jèrriaise par Geraint Jennings

 

Viyiz étout:

 

Les Pages Jèrriaises