Les Pages Jèrriaises

Sonnet 135


Whoever hath her wish, thou hast thy Will

Des p'tits maît's graient lus femmes - tu'as tan Gérant,
Un grand Gérant qué tu'as même agrandi.
J'sis-t-i' pouor té assez fort, assez grand?
J'té garantis-t-i' un pus grand pliaîsi?
Ta dgéthande est la d'meuthe à man lapîn;
Lé garanti dé chaleu dans tan creux.
Si tu'as dêjà caûffé des p'tits, ch'tî-chîn -
J'té garantis - caûff'tha bein ma grandeu.
La mé est ieauseuse, mais atchil'ye la plyie
Tchi tchait, les pus grandes mathées arrouôsant;
Même si ta dgéthande est grande coumme Jèrri,
Jé ris s'oulle est pus grande qué tan Gérant.
Les aut's tchi t'graient né sont qu'des p'tits êfants:
Lé grand tchi t'graietha mus est l'vièr Gérant.
 

William Shakespeare
Vèrsion Jèrriaise par Geraint Jennings 2002

 

 

Chu sonnet d'Shakespeare joue auve lé nom du rînmeux - Will - tchi peut sîngnifier tchiques difféthentes choses. Dans chutte vèrsion Jèrriaise j'ai joué auve man nom un mio en faîthant sèrvi des mots tchi rappelle man nom.

 

 

Viyiz étout:

 

Les Pages Jèrriaises