La Tempête

dé William Shakespeare

Où'est qu'la bourde chuche, j'chuche étout

Where the bee sucks, there suck I

Où'est qu'la bourde chuche, j'chuche étout:
couochi dans du jaune coucou;
J'm'y couoche quand lé cahouain crie.
j'vole sus l'dos d'eune caûque-souothis
souotré l'Êté bein heutheux.
Bein heutheux, bein heutheux j'vivthai achteu
souos la branque flieuthie d'un bouais bein ombreux.

Geraint Jennings

Acte 1, scène 2

Ariel	Salut, grand maît'! J'té salue, Messire! J'veins accomplyi tout tan d'si: si ch'est d'voler, d'nagi, dé d'valer dans l'brûlîn, d'cachi les nouages nouachis, tout chein qu'tu veurs d'mander - c'mande Ariel et tout san scîn.
Prospétho	As-tu, faîté, grée recta la tempête coumme j'dis?
Ariel	Jusqu'au picot. J'abordis l'navithe du rouai, drait au nez, pis dans la côsse, sus l'pont, dans châque cabanne, en êmânue j'fliambis, pis j'm'êcliatchis pouor brûler chîn' et là, d'la heuniéthe, ès vèrgues, sus la beauprée, j'y brûlis cliai épis m'rassemblyis. L's êparts d'Jupitèr, ches avèrtis d'ôrage, n'faîthaient pon pus d'frémeu ni d'frédouoillage; les feurs et cras d'la soufréthie souinne sembliaient assailli l'piêssant Nepteune et êlouochi ses louêmes, dêladgi san didget.
Prospétho	Man nobl'ye faîté! Tchi qui pouôrrait sténer un 'té sabbat bravement sans biscâthier?
Ariel	N'y'avait fis d'âme tchi n'tait pon hors dé sé, n'êcanchait pon au m'sespé d's êcappées. Sauf les mat'lots, tous drotchîtent ho'-l'bord dans la boulée d'mé. J'fliambais acanté ieux: l'prînce Fèrdinand, lé fis du rouai, ès g'veux raides en pitchets, fut l'preunmyi dans l'ieau, dit: "L'enfé est viède et touos ses dgiâbl'yes sont 'chîn!"
Prospétho	Bein fait, faîté!

Acte 1, scène 2

Ariel	Y'a-t-i' acouo du train? D'pis qu'ou m'peinez Souv'n'-ous dé vrai d'chein qu'ou m'avez promîns qu'ou n'avez pon ag'vé.
Prospétho	Qué tchi? Ouaînâtre? Tch'est qu'tu peux m'démander?
Ariel	Ma libèrté.
Prospétho	D'vant qu'ché sait tèrmé? Nou-fait!
Ariel	S'i' vos pliaît, N'oubliez pon qué j'vos ai bein sèrvi n'ai nément mentu ni mêprîns, grée tout sans hyie ni honn'nie. Ou m'promîntes dé même dé m'dêmett' un douze-mais.
Prospétho	As-tu roublié dé tchi torment qu'jé t'libéthis?
Ariel	Nânnîn.
Prospétho	Si-fait! Tu crai qu'ch'est trop d'piler la vâse dé l'avanteu saûssée, dé couôrre avaû l'vent tchi coutèle du Nord, dé m'ner man dêm'nîn ès minnes dé la Tèrre quandi qu'il aubegèle dû.
Ariel	Nou-fait, maît'!
Prospétho	Tu mens, brute êmânue! As-tu roublié la chorchiéthe Sycothax, malinne, crotchie les deux buts en iun? L'as-tu don roublié?
Ariel	Nânnîn, maît'.
Prospétho	Si-fait! Où'est qu'ou fut née? Di!
Ariel	En Alger, Maît'.
Prospétho	Oh ch'tait-i'? j'dai tréjous eune fais par mais t'èrdithe chein qu'tu'as 'té, té, chein qu'tu'as oublié. Chutte néthe méthe Sycothax pouor touos ses maûfaits, toute sa chorchel'lie qu'nou n'stène pon d'ouï, fut bannie, coumme tu l'sai, d'Alger. Mais pouor chein qu'ou 'tait à porter nou n'voulait pon la tuer. Ch'n'est-i' pon vrai?
Ariel	Si-dgia!
Prospétho	Chutte vielle haîngre encheinte fut am'née ichîn et laîssie par les navidgants. Et té - m'n escliave, coumme tu m'dis - tu 'tais san sèrvant, et viyant qu'tu 'tais un esprit trop fîn pouor accomplyi ses bâsses quémandes niêsibl'yes et r'fûsait ses hauts affits, ou t'cliouit atout l'pus grand pouver d'ses dgiâbliotîns, sa tchînte dé tchi qu'ou n'put pon s'dêmârri, dans un pîn froutchi. Et dans chu creux-là ès agouîns, tu restis emprisonné eune douzaine d'années. Mais lyi, ou mouothit en t'laîssant là à gronner et grînchi piéthe qu'eune meule tch'êtampe. À chu temps ch't' îlet - sénon pouor chu fis qu'oulle y lapinnit, chu fouôngnot d'chorchillon - 'tait viant d'âmes et dêpeuplié.
Ariel	Véthe, Caliban, san fis
Prospétho	J'té l'dis, ma fé, ch'est li, chu Caliban, qué j'garde achteu pouor m'sèrvi. Tu saithais mus dans tchi ma qué j'té trouvis. Tes houîns faîthaient les loups hueûler et pèrchaient l'tchoeu d'ourses courtes dé pé; ch'tait eune tortuthe ès âmes condâmnés qué la chorchiéthe Sycothax né pouôrrait d'aut' en cachi. Ch'tait man scîn, quand j'arrivis et t'ouïs, tchi fit dêlier l'pîn pouor té libéther.
Ariel	J'vos r'mèrcie, maît'.
Prospétho	Si tu'en gronne acouo, jé choqu'thai un tchêne et t'y fiqu'thai dans sa couothée notcheûthe pouor y braithe douze Hivièrs.
Ariel	Extchûthez-mé. J'rêponn'nai tréjous à vos bouonnes quémandes et chîn' et là f'thai m'n esprit'tie douochement.
Prospétho	Fai d'même, épis à la fîn d'deux journées j't'abanonn'nai.
Ariel	Ah man maît', est-i' nobl'ye! Tch'est qu'jé f'thai don? Dites-mé: tch'est qu'jé f'thai don?

Acte 1, scène 2

Caliban	Ch't' île est à mé, par Sycothax ma méthe, et tu m'l'as volé dgia! Quand tu'arrivis, tu soulais m'fliatter, m'faithe pliaîsi, m'bailli dé l'ieau trempée d'gradiles, et m'ensîngni comme tchi app'ler la grande veue et la p'tite tchi brûlent et niet' et jeu, et j't'aimais bein et t'mouontrais toutes les miyeu pièches dé l'île: les bouoillons, salinnes, dous, d'sèrts et côtis. Dgiâtre sait qu'jé l'fis! Qu'les chorchéthons d'Sycothax tchaient sus té: pouèrs et lînmaches! Car j'sis, raîque mé, touos les sujets qué tu'as, mé tchi 'tais man rouai à mé - tu m'encotte dans chutte rocque-chîn, quandi qu'tu m'en confisque tout l'restant d'l'île.
Prospétho	Tchil escliave dé menn'ties tchi rêpond raîque ès clyippes au run d'caresses! J't'ai souongni, manniéthe dé m'luque, jé t'louogeais siez mé entréchîn qu'tu voulîsse violer l'honneu d'ma chiéthe fil'ye.
Caliban	Pûsse-t-i' êt' ag'vé! Tu m'empêchis. J'éthais peu peuplier ch't' île d'eune câlée d'Calibans.
Mithanda	Maûfait escliave! tchi n'èrchait dgéthe la mèrque d'un brîn d'bouônté, étant rîlyi d'tout ma! J'en eus pitchi, m'en d'mentis dé t'faithe pâler, t'ensîngnais châque heuthe dé tchi - quand té, îngnot sauvage, tu dêrengliais à tort, en brédendgant coumme un bruta. Pis jé t'fis raîthonner en patholes cliaithes et puthes. Mais en êpu, tu dêgouôsilyis tout ch'qu'tu'as peu prêchi pouor l'renvyer sus la maie. Né v'là pouortchi qu'en justice tu'es blioutchi dans chu rotchi, té tch'as bein méthité pus qu'eune prîthon.
Caliban	Tu m'as apprîns ta langue, et j'en profite: ch'est qu'jé saithai t'maûdithe - qu'la mouothinne t'prenge pouor m'aver duit en tan d'vis!

Acte 5, scène 1

Vous, p'tits faîtchieaux d'monts, dous, mathes et bouaîs'sies
et vous tch'ès sablions sans y mèrtchi d'pas
chassez Nepteune au r'tchiyant, et au fliot
happez la pathe; d'mié-poupettes tchi dansez
au cliai d'la leune les rondasses sus la bliête
où'est qu'la gèrche né paît pon; et vous tch'aimez
soûfflier des vênes-dé-loup à mînniet, tchi
jouez auprès l'couvre-feu; atout l'aîgue dé tchi
ouaithe qu'ou séyiz faillis, j'ai embliâsé
l'solé d'méjeu, moûtchi les brises dé d'bat,
et mârri la vèrte mé d'auve la bliue votte
pouor faithe tréfi: et j'ai satchi du feu
dé pathe auve l'ôrage pouor g'liver l'fort tchêne
auve l'êpart du Bouôn Dgieu, et l'dû rotchi
j'ai fait drotchi, et êtèrré les trous
ès pîns et cèdres; à man c'mandement les fôsses
ont dêtâné lus dormeurs à banon
par man scîn. Mais chu pouver-chîn d'chorchi
j'èrnonche ichîn, et quand j'éthai envyé
du chant des hauts cieux, chein qué j'fais achteu,
pouor mett' en affit lus esprits sus ch't air
à les charmer, épis j'bûch'chai ma chouque,
l'èntèrr'rai tchiques braichies avant souos tèrre,
et à dêmain d'autchun pliomb à sonder
j'nyêthai man livre.

Acte 3, scène 2

N'ayiz pon d'peux; l'île est remplyie d'tinné
et d'tînt'tie tchi rêjouit et n'fait pon d'ma.
Par bordée des milles cordes tréssonnent tout l'tou
d'mes ouothelles, et par bordée des vouaix sonnent
tchi, si jé m'tais rêvilyi d'eune tânée,
mé f'thont rendormi, épis en rêvant
j'craithais qu'il en tchèrrait du ciel dé l'or
si les nouages lus ouvraient; en m'rêvilyant
j'plieuthais pouor èr'rêver.

Acte 4, scène 1

Not' rêvillon veint à fîn. Ches acteurs
coumme j'vos ai dit 'taient touos d's esprits épis
ont dêpensé en l'air, en aûtchies d'air:
et, coumme la bâtithie sans bas dé chutte vîsion,
les tours enhathinnées, les bieaux mangnièrs,
les templ'yes dé noblièche, et même chu grand gliôbe,
véthe-dgia, tous tch'y d'meuthent en s'sont dêcachis
et, coumme chutte pathade d'appathences passecrite,
n'y laîss'sont pon d'ouaîrage. Nous j'soummes d'ité
dé tchi qu'les rêves sont grées, et not' p'tite vie
est r'cèrcliée d'eune sommé.

Chîn braiches ava, tan péthe gît là

Full fathom five thy father lies

Chîn braiches ava, tan péthe gît là;
ses os sont touônnés en corâl;
en pèrles, ses ièrs ont pâssé l'pas;
sén atonmie, toute sén ossâle
changies par l'touônnement d'la mathée
en dé tchi chi et chifathé.
Les séraines sonnent sa clioche d'amors:
clyînclias.
Êcoute! J'les ouai - i' sonnent sa mort.