|
Êt' acouo, ou n'êt' d'aut': né v'là la tchestchion: si ch'est pus nobl'ye dans l'esprit d'suffâtchi la jouôte et la tith'thie d'chutte malforteune, ou d'litter contré chutte mathée d'hèrtchîn et d'en finni d'forche d'armes? Mouothi: dormi; rein d'aut'; et si par dormi j'voulons dithe ag'ver l's ahans épis les mille aheurts qu'j'en héthitons, né v'là eune fîn d'l'affaithe bein-gn-adret à souhaiter. Mouothi, dormi; dormi, ofûche rêver: mais v'là tchi pînche, car dans chu dormi d'mort, à tchi rêver quand j'éthons craînchi l'tchèrnage dé chutte vie? Ch'est d'y penser. Car né v'là tout l'problième dé tchi nou dêrengl'ye pouor eune si longue vie: tchi qui don stén'nait la fouôt'tie du temps, l'ma du malîn, d'l'înjuthe du haut jutchi, d'amour èrbuté, d'justice èrtèrgie, d'abus d'office et d'îndîngne avantage împôsé sus l'chein tch'espéthe pâciemment, quand lî-même i' pouôrrait r'aver sa paix en sé stabbant? Tchi qui sé chèrgéthait d'eune vie lâssante, souos l'fardé d'houîns et d'ouas sénon la peux d'tchiquechose auprès la mort, (chu pays horsain dé iou qu'n'y'a pon d'viageux tch'èrveint janmais), v'là tchi nos badre la tête et nos fait sténer ches malheurs qu'j'avons au run d'happer la pathe vèrs d'aut' qué nou n'sait tchi? William Shakespeare Vèrsion Jèrriaise dé Geraint Jennings |
Viyiz étout: