Un endrait d'sèrté D'l'ôrage et d's êparts. Trais chorchiéthes entrent
Preunmié Chorchiéthe	Les trais d'nous, j'nos r'vèrrons-t-i' en ôrage, êparts ou plyie?
Deuxième Chorchiéthe	Quand tout l'hèrtchîn s'sa finni; qu'nou-s'ait pèrdu et gângni.
Traîsième Chorchiéthe	D'vant qu'lé solé sait couochi.
Preunmié Chorchiéthe	Eyou don?
Deuxième Chorchiéthe	Ès landes, ma fé.
Traîsième Chorchiéthe	Là j'rencontréthons Macbé.
Preunmié Chorchiéthe	J'arrive, man vièr Nièrmiton.
Deuxième Chorchiéthe	Man crapaud m'crie.
Traîsième Chorchiéthe	À tantôt.
Toutes	L'bé est laid et l'laid est bé: cache, dans la bliâse et l'pité.

 

Acte 1, scène 3

Preunmié Chorchiéthe	Té, ma soeu, par iou qu'tu'as 'té?
Deuxième Chorchiéthe	À la tueûthie d'bêtes.
Traîsième Chorchiéthe	Et té?
Preunmié Chorchiéthe	Eune femme dé mat'lot mangeait des châtaines, les grugeait et grugeait. "Donne-m'en!" qué j'fis. "Paque-té, chorchiéthe," qu'ou fit, la grôsse topie. S'n houmme, lé cap'taine du Tigre, fut à Alèp; mais j'y'îthai dans un craîncheux, et piéthe qu'eune ratte dans san creux, j'graiethai, j'graiethai et j'graiethai.
Deuxième Chorchiéthe	Jé t'bârr'rai l'vent.
Preunmié Chorchiéthe	Tchi présent!
Traîsième Chorchiéthe	Et mé étout.
Preunmié Chorchiéthe	J'ai assez pouor qu'la mé broue; i' vent'ta jusqu'ès caûchies dé touos l's ars tchi sont mèrtchis sus la carte au mathinnyi. I' s'sa chuchi sé et creux, sans dormi ni niet ni jeu, sans aver d'paix dans san liet. I' vivtha dêmîns, èrné, lâssé neu neuvaines dé s'maines, vengi d'paleu, pliaies et peines. Ouaithe qué nou n'piêsse pon lé nyer, la tempête boul'la l'baté. Èrgardez chennechîn.
Deuxième Chorchiéthe	Mouontre-m'lé.
Preunmié Chorchiéthe	D'un pilote, 'chîn j'ai l'pônchet, tchi fut naûfragi en mé.
Traîsième Chorchiéthe	Tapez! Tapez! I' veint, Macbé!
Toutes	Les soeurs du scîn, patte à coue volent par-d'ssus et par d'ssous, lus touônnent et ratouônnent ainchîn: Trais à dêtre, et trais à s'nêtre, et trais: v'là neu à pathaître. Lé chorchéthon est ag'vé.
	(Macbé et Ban'co entrent)
Macbé	J'n'ai janmais veu un jour si laid, si bé.

 

Acte 1, scène 7 Si ch'tait ag'vé un co ag'vé, bein mus d'l'ag'ver dêliêment. Si ch'est qu'la tueûthie empêqu'thait tout r'êffet pouor en gângni dans sa cêsse, lé succès - qué chu co-chîn sait l'tout et l'adgève-tout, pis ichîn-bas, ichîn sus chutte bâsse et tenvre banque du temps, jé saut'têmes la vie à v'nîn. Mais ch'est l'cas qu'les mêfaits sont peunnis; nou prêche dé même des lichons sanglieûthes tchi, un co apprînses, èrveinnent vengi l'prêcheux. Véthe, la justice nos pousse à nos lèvres not' tâssée d'pouaîson, împartialement. I' s'fyie deux fais sus nous: à c'menchi, j'sis san couôthîn et sujet, lié fort contré l'mêfait; pis qu'j'l'ai convié, j'dévthais freunmer l'us contré l'assâsîn, au run d'porter l'pouongnard, mé. Chu Duncan a porté ses pouvièrs bein humbliément, sans r'proche tant dans s'n office qué ses beinfaits pliaigu'thont comme des tchoeurs d'anges à vouaix d'trompettes contré la chèrge maûfaite dé s'n adgèvement; et l'pitchi, coumme un p'tchiot tout fîn fraid nu jutchi sus la tempête, ou des p'tits anges êtchèrfroutchis sus l'aveugl'ye ventâl'lie soûffliéthont l'âffreux mêfait dans châque yi, qu'les lèrmes nyient la touothâle. J'n'ai pon d'êp'thon pouor pitchi les fliancs d'man vouler, mais raîque mén ambition j'vaûchante tchi m'êlîngu'tha jusqu'à l'aut' bord. (La Danme entre)                          Qué tchi? Tchi nouvelles, don? William Shakespeare Vèrsion Jèrriaise dé Geraint Jennings