Les Pages Jèrriaises

L'Assembliée d'Jèrriais

La Crouaix d'St. George

 

L'Assembliée d'Jèrriais

 

Eune scène historique

La Crouaix d'St. George La rêunion mensuelle eut lieu l'29 d'avri dans la Salle de la Chapelle dé Great Union Road et au mains 150 membres lus y rêunîtent.

D'vant c'menchi l's affaithes pour la séthée lé Président fit la beinv'nue au Sieur George Lé Feuvre, qui 'tait r'venu d'Améthique pour payer eune aut' visite à "san p'tit Jèrri" et lé r'mercyit pour tout l'embarras qu'il avait prîns à prépather l'index des preumièrs 25 bulletîns. L'Sieur Le Feuvre rêponnit et dit qué ch'tait tréjous un pliaisi pour li d'faithe autchune chose pour L'Assembliée.

Lé rapport dé la rêunion du mais d'mars fut liu et accepté, et dix nouvieaux membres d'êlus.

La Crouaix d'St. George

Comme divertiss'ment pour la séthée lé Conmité Dramatique, souos la direction dé Mme. A. Perchard et Moussieu Ph. Ahier, B. ès Sc., avait arrangi eune scène historique - "La Crouaix d'St. George" - entouor l'învasion d'Jèrri par les Espagnos en 1406.

Moussieu Ahier nos explyitchit au c'mench'ment chein qu'j'allions vaie, et la preunmié scène eut lieu en d'vant d'l'Islet. Ichîn i'y eut eune scarmouche entre l's Espagnos et les Jèrriais et plusieurs des notres perditent lus vie, parmi ieux lé R'chéveux Général (C.P. Billot). Eune janne fille (J. Le Brun) arrivit sus la scène cherchant pour san janne homme, Jean (D. de la Haye), criyant qu'il avait 'té tué, mais Jean, li, avait fait la minne d'être mort pour être laissi trantchille.

Lé Général Espagno, Pero Nino (G. Perchard), et san porteux d'banniéthe (F. Le Maistre) et trais officièrs Bretons (G. Le Masurier, H. Gough et B. Amy) voulaient brûler tout l'paysage de Jèrri, et un messagi angliais (J. le Maistre) fit tout ch'qu'i put pour lé d'fendre. Les Espagnos voulaient prendre chèrge des châtcheaux dans l'Ile, mais les Connêtablyes dé l'Est, St. Martin, St. Sauveux, la Trin'té, Grouville et St. Cliément (Mêssieux H. Maillard, H. Gibaut, W. du tôt, F. Noël et E. Vibert), né voulidrent pas les cêder et têtouangnîdrent bel et bein contre Pero Nino et sa troupe. Les Connêtablyes faithaient lus suppiations bein sincèth'ment, au nom du Bouan Dgieu et la Crouaix d'St. George, et auprès bein d'l'ardgument un offici Breton persuadit Pero Nino dé n'être pas trop dû envèrs les Jèrriais, et finalement lé Général s'atchêssit à accepter eune rançon et trais hommes comme prisonnièrs (R. Cabot, W. de Gruchy et A. Quérée).

Ches scènes 'chîn ayant lieu amont l'Mont d'la Trin'té en route pour lé Châré dé Sédement; mais en acceptant lus rançon les Espagnos né réalisaient pon qué l'Recteu dé St. Cliément (D. de la Haye) lus avait donné des sou qui n'valaient rein.

La dreine scène 'tait au châté même au temps d'à ch't heu', quand trais danmes, la grand'-méthe (A. Blampied), sa fille (E. Le Sueur) et sa p'tite fille (E. Le Brun), 'taient à penser et à dithe tout chein qui s'était passé en 1406, et à réaliser combein près qué Jèrri fut d'être vaintchu et tchi importante partie qué La Crouaix d'St. George prînt dans ch't învasion par l's Espagnos. Et la fîn, quand tous ervîndrent sus la strade auve la crouaix dans la pus importante pliaiche, fut bein impressive.

D'autres qui prindrent part fudrent G. Le Marquand et H. Perchard.

Les habits

Les habits, qu'avaient 'té fais souos la direction à Mme. Perchard, auve plusieurs danmes à aidgi, 'taient hardi bieaux; les soudards, auve lus arméments, et les Connêtablyes, avec lus robes dé belles couleurs, faithaient un bouan contraste.

Les membres présents apprécyitent hardi la séthée, aussi bein comme la tassée d'thée que des danmes lus avaient prépather.

En r'merciaint touos les siens qu'avaient aidgi sus autchun sens, et principal'ment Mme. Perchard, lé Président li fit un p'tit cadeau, et Moussieu Ahier, en r'mersiant touos l's artistes, presentit un touffet d'flieurs ès danmes qu'avaient prins part.

Duthant l's affaithes pour la séthée lé Président avait annoncé ès membres dé r'garder dans la gazette pour la date dé la préchaine rêunion.

1960
La Crouaix d'St. George  

La Crouaix d'St. George  

La Crouaix d'St. George  

La Crouaix d'St. George  

La Crouaix d'St. George

 

Viyiz étout:

 

 

Les Pages Jèrriaises