Par J. J. Le Marquand
Liza Phylis Green
Mrs. Vergot Eileen Le Sueur
Liza Etes ous la Missis Vergot, est y v'nu deux messieurs siez vous a matin.
Mrs. Vergot J'navons pas veut personne ichin … et pourtchi que des messieurs vendraient nos vais, deux pourres viers hermits coumme me et Frainque, n'te gene pas des messieux n'lus genes pas de v'nin visiter d'ite.
Liza Oh pourtant i' s'en vont v'nin!
Mrs. Vergot V'nin ichin! Et tchi faithe?
Liza Pour visiter bein seux …
Mrs. Vergot Visiter! Visiter tchi?
Liza Pour visiter voute lait'tie et l'etablye es vacques pour vaie si tout est propre.
Mrs. Vergot (marrie). Hein! Si tu pense que j'm'en vais allouer deux apotres de lus en v'nin ichin fourrer lus nez ou'est qu'i n'ont qu'faithe … et bein chutte fais la …et bein voudrais bein etout!
Liza Mais veurs ou n'veurs pas, ils ont tout l'drouait. Ch'est d'Inspecteurs du Conmite Sanitaithe qui sont appointees pour vaie que le lait s'sait propre.
Mrs. Vergot Des Inspecteurs! Av'ous jamais oui d'ite! Es-che que j'n'en avons pas ieut assez de ches individus la duthant l'otchupation sans nos en baillyi d'autres a nos enpester. Et tch'es qu'i cherchent ches perrots la?
Liza Je n'sais pas tchi qu'Mess Duclios, noute proprietethe s'en va dithe quand i s'en va l'oui; mais faute que toutes les stalles dans l'etablye es vacques veinge bas et qui s'saient er'baties en chiment et faut que toute l'aithe s'sait erlevee et erminse en chiment etout; faut que toutes les fenetres de l'etablye saient halles et rempliaichi par des f'netres qu'ouvrent en haut. Y faut qu'la trappe iou qu'j'env'yons l'fumi s'sait candannee et bouchie et la maie hallee de iou qu'oulle est en erminse a au mains trente verges de l'etablye.
Mrs. Vergot Pourtchi qu'i' n'abattent pas l'etablye tout a fait tandi qu'ils y sont et qu'i n'vos font pas mettre les vacques dans l'parleux. Et pis, tch'est qui s'en va payer pour touos ches frais la? Ls'Etats accouo j'crai bain. Ar'bruler des milles louis pour un tas d'niolin.
Liza Nouffe, nouffe, ch'n'est pas ls'Etats ch'est noute propritethe Mess Duclios qui faut qui paye les frais. I pathais qui s'en va y'en couater des milles louis.
Mrs. Vergot Que tchi! Tu veurs me dithe que deux individus ont l'affront de lus en v'nin dithe a un proprietethe qui faut abbatre ses stalles et faithe je n'sais tchi a ses frais veurs ou n'veurs pas … Et bein, j'sai me qui vos ecout'thait d'ite bavin … Et tchi qu'est ch'est deux individus la? Accouo deux fermiers ertithees j'crai bein!
Liza Nouffe! Ch'est deux Angliais qu'ont passe lus examins dans la sanitation et qui sont payes quatre ou chinq milles louis par an pour faithe chonna.
Mrs. Vergot Que tchi … tu veurs me dithe que deux manniethes d'objets qui n'connaissent pas la diffaithance entre eune vacque et une brebis, et qui pensent j'crai bein que pour aver du lait d'une vacque, que tu l'y happe la coue et la travaillant coumme nou' fait la brinmballe d'eune pompe met la canne dessous … et le lait veint, ont l'affront de lus en v'nin siez des Jerriais les c'mander siez yieux, et eprouver a lus montrer a fermer. Ah j'te garantis bein que si ch'tait a me qui lus addrechrais … je n'sais pas longtemps a vos ballayi chonna hors du bel.
Liza Oh mais i s'en vont v'nin, n'vos genez pas, s'i' n'sont pas v'nus aniet, i' veindront un autre jour, car i' sont a inspecte toutes les fermes.
Mrs. Vergot Eh bein, qu'i' veinge! Oh le sang m'en bouorre quand nou' pense que j'avons ferme ne v'la quarante siez ans et jamais j'n'ai ieut a bouillyi man lait pour qui gardisse. Et faut etre ramasses de la manniethe … etre c'mandees siez se. Ah, s'i veinnent ichin mettre lus nez dans ma lait'tie … j'lus fiche le nez dans ma pottee d'creme, et pis ma botte tu sais bein iou et j'les fiche a la porte.
Liza Ou savez bein Missis Vergot, j'sais bein qui fait ma d'aver des gens vos embetter d'meme.
Mrs. Vergot Des gens! Appelle tu chonna des gens, j'dithais pus tot des achocres.
Liza Eh bein nouffe. Ch'est des gas d'education et i veullent trouver que ch'est pour le bein d'la sante publyi. I pathais qui y'a eune masse de bacteria qui se fouorre dans l'bouais des stalles, entre les briques dans l'fond d'l'etablye, et meme dans l'air d'eune etablye qui n'est pas propre, et que chu bacteria la entre dans l'lait et …
Mrs. Vergot Du tchi qu'tu m'dit la? Du bactenia! Et tch'est qu'ch'est chonna du bactena? Chonna est t'i grand coumme des crapauds, des souothies ou tchi?
Liza (riant). Nenin, nenin. Ch'est d'tchi qu'est tout p'tit, y pathais que nou pouorrait en mettre des milles sus la tete d'eune epile.
Mrs. Vergot (riant). Pouorre achocre! Ah helas, pourtchi faithe tant d'embarras pour de tchi qu'est si p'tit. Pourtchi s'en gener du tout, quand nou' n'avallait deux ou trais, i' peuvent pas vos engouer.
Liza Oh mais ou' n'comprenez pas, ch'est chu bacteria la qui cause les fievres scarlettes, typhoides et i' pathais la consumption.
Mrs. Vergot Bah du niolin … ergarde ma fille, tout chonchin est bel et bein mais veurs tu m'dithe que les gens d'ach'teu auve toutes lus precautions contre les maladies sont pus sains que les viers de y'a chent ans. Prend par exemplye eune masse de ch'es jeunes drinettes la d'la ville si y'ethait eune forte brise, i' saient capablyes d'etre soufflies jusqu'en Sercq.
Liza J'sais bein qui y'en a qui vont a l'extremite, mais ch'est l's Etats tu vait et i' n'en gagnons.
Mrs. Vergot Oui, n'te gene pas, je n'sais pas grand angliais, mais j'ai apprins deux ou trais patholles de la sorte qui les f'tha bein a saver cha que j'pense de yieux va.
(Oulle ecoute).
Liza La n'evla un moto, chez p'tetre yeux.
Mrs. Vergot Et ben fille et laisse les a me, chez deux manniéthe d'anglyais.
Viyiz étout: