Gladys - Tch'est qu'tu t'en vas faithe té, Blanche?

Blanche - Oh mais, tu m'fais quâsi peux. Faithe tchi? Tch'est qu'i' y a?

Gladys - Mais pour l'êlection pour Député! Sont-i' v'nus té d'mander ta vouaix? J'espèthe quetu t'en vas voter d'not'e bord!

Blanche - (bain trantchillement) Nennin, j'n'ai pas ocuom veu personne. La vieille Jane Snichon a éprouvé à m'pomper un mio en r'venant d'la ville ch'tte arlevée dans la bus, mais je m'sis bain gardée de satisfaithe sa tchuthiosité. Tu m'pâles de "votre bord," mais tu n'm'as pas dit tchi bord l Pour tchi qu'tu vôtes, té?

Gladys - Eh bain en v'là une tchestion! Pour Tom Grapin, sans doute. Crai-tu que j'vot'tais pour ch't autre apôtre-là? Jamais i'n'vaindrai Député quand i'y êprouvethai toute sa vie!

Blanche - Je n'voudrais pas en dithe autant. Nou m'disait annièt que ch'est li qui s'en va y v'nin, les Pilebos, la famille Trépid et touos les Merlus sont pour li, il a la pus grande partie de la Vingtaine des Grandes Banques de san bord et i'pathaît que ch' est l'Député actuel qui s'en va l'proposer. Chenna s'en va li valer pus d'chinquante vouaix!

Gladys - Bah! un tas d'niollin! Les êlecteurs ne s'en vont pas être si bêtes! V'là un ouaisé qu'était en faveur de l'Income Tax et qui trouvait que Jêrri dev'thait payi bain pus au Gouvernement Anglais. Il est d' cheux là qui voudraient faithe les fermiers payi à la pliaiche de faithe lus c'mins ieux-mêmes! Tout pour la dêpense! J'en avons pourtant bain assez d'chute sorte-là dans l's Etats.

Blanche - J'admets bain tout ch'la Gladys, mais tu n'peux sinon admettre qu'il a pus d'êducation et est pus capablye de faithe un discours que tan Grapin.

Gladys - Man Grapin? En v'là ettou. Man Grapin comme tu l'appelles n'a jamais 'té mins à l' amende pour aver monté du vrèt le Dimanche la nièt. Et i' n'a pas rompu les gambes à personne avec sa motor-bike.

Blanche - Nan, car i'n'a jamais ieu l'moyen d'en acater iune. Mais ma pouorre fille, tch'est qu'tout chu d'vis-là sert? Pourtchi que toutes les fais qu'i' y a une êlection que nou prend san plaisi à dênigrer l'autre candidat et ramener toutes sortes d'choses de dans san passé.

Gladys - Parce que des gens qui n'sont pas absolument irréprochablyes ne dev'thaient pas prendre d'postes. Je n'sais pas si tu t'en vas voter pour Dâvi Gobetout mais as tu oui chein qu'les gens disent entouor san grandpéthe?

Blanche - Au bain par exemplye! s'i' faut ramener san grandpéthe.....

Gladys - Eh bain mais v'là! Pepée m'disait que l'bouonhomme avait tréjous des joudgies d'litcheu siez-li sus tchi qu'lmpôt n'avait jamais té payi!

Blanche - Et j'crai bain qu'i' y en avait d'autres comme li dans ches temps-là. Mais je n'vai pas comment qu'Dâvi peut aver à raîpondre pour les faits d'ses anchêtres. A t'oui pâler nou dithait qu'tan Grapin est un modèle de perfection li. I'm'semblye pourtant aver oui tchique histouaithe entouor...

Gladys - En v'là assez! Je sais bain tch'est qu'tu t'en vas dithe. J'm'attends bain qu'i' y a des gens qui s'sont mêchants assez pour ramener ch'tte affaithe là, mais ma tante m'a raconté la chose et ou souôtchaint que ch'tait tout d'la faute à ses gens. Mais ch'n'est pas tout chenna! Ch'n'est pas la peine d'aver du brit par sus une malheutheuse êlection! Pour le tchèt qu'tu t'en vas voter?

Blanche - Je n'sais pas. Je n'm'en vais pas faithe de promesses. Je sis à même de n'voter pas du tout. Je m'en vais être êlourdée touos les jours par les deux bords, et tout chenna m'embête. Oh pourtchi qu'nous a donné vouaix ès femmes. Nos grandmèthes étaient bain pus trantchilles et n'avaient pas tout ch't embarras-là.

Gladys - Bah! fait comme mé, vote pour le gagnant! VIVE GRAPIN.

G. W de C.