Les Pages Jèrriaises

DIALOGUE
ENTRE
JEANETON, DE ST. SAOUVOEUX, ET NÉNAI, DE SAINT-OUAN

 

JEANETON.

S'tuavais veu, avansyier, le train quil y av'ait
Dans la ville, ove tout l'monde dans un divers tiné,
Assemblièts pour pliaichi eune grosse pierre dans la mé -
La première pour ergrés la Caouchie d'Saint Héyié.
Chu jour là, Cas et Chians, touos lus en vindre en ville,
Dépis les pus viers homme, jusqu'est pus jeane fille;
Touos êcalés des yiers de vée toute chés sifaiches.
Et chacun s'créponcé pour avé eune bouane pliaiche.
Mais dit mé, ma Nénai, ouétais-tu chu jour-là,
Quêche quite tint hors d'ove nous, étéche pon tan Papa?

NENAI.

Mais oui guia, ma Jeaneton, chés bein d'soeure q'che té li,
l'étais prête à m'nallé quant i man nampaichi;
Man banéte, et man schâle, et mes bottine de vlous,
Que Capeldu me fie à la fin du mé d'Oût,
Etais touos sus man co, quand i m'les fis r'ôté.

" Tu n'iras pon," m'dis ti, "à chute fête te landré:
" La dernière des sotise gue chés Messieux ont fait,
" Sus la Caouchie du Su est êtallaits anniet,
" Et personne de siée mé n'irons l'encouoragi.
" Si touos nos gros tête avais yoeu l'moindre espri,
" Che n'tait pas là la pliaiche qu'il érais d'oeu chouaizi
" Pour bâti chute Caouchie et dêpensé nos sou:
" Le véritable endrait est l'Eta d'Saint Ou.
" Il est vrai qu'note frére Flip, q'est un Saint-Aubinais,
" Cré q'la leur est la chène qérai doeu être ergrais.
" Dans l'Assembliêts d'pâraisse il ont fait ch'qu'il ont peu
" Pour persuadé l'sanglais à rarangi la leu;
" Mais maougret qu'au Conseil il oeure un députait,
" I san est ervenu comme i s'anne té allait;
" Et la grosse somme d'argent qu'il avait dêpensait
" Lus fis pendre la goule comme à un chian fouostait."

Mais ch'nest pon dem zaffaires, je m'botte de tout chonna
I n'avais qu'a la mettre, offûche, dans les Quenvais;
J'érais bailli quatre liards pour avé peu la vais,
Et j'ai bain grand despiet d'navé pas était là.

JEANETON.

Contente té ma Nénai, je m'en vais t'raconté
Toute la cérémonie, si j'peux m'en ramembré.
Déviers diée heures et d'mie, dans la Salle des Etats,
(Ou comme quiquesuns l'appelle, la grande sale des débas)
Chés Messieux s'assemblire, mais jen 'sai ch'quil y fire;
Comme je niétais pon, je n'serais te lerdire.
Ine fure pas bain long-temps devant qued déhallé,
(Atou la belle Masse, que le Vicomte portai)
Envlopaits et cliôquis, comme si craignés la plie -
(Il avais bein raison, il oeure eune fiiére achie)
En arrivant à lus, i srangire doeux à doeux;
(De vais touos chés biauoux biauoux, nou zavé câsi poeux)
I liavé l'Gouvernoeux atou ses Aide-de-Camps,
En outre un fière flieuquet de soudards et d'braves gens,
Des louoges de Franmachons, atout lus p'tits dvantiauts;
Le clobe des Mécaniques, qui portaient des batiauts;
Et chés biaux Grenadiers du Régiment d'la ville,
Lus bonnés sus la tête, arangis si habille,
Comme si les biches du Nord, sus lus pignioles gerquis,
La cous et tête copaits, i i'avais était pliaichis.
Les Membres des Etats, en quittant la Cohue,
Siêzis par touos les aoutres, s'en fure par la grande rue,
Et destouannans à gaouche, filire par sus les quais,
Au son des airs charmans que les musiciens jouais,
Et du brit des canons que les Rayel tirais;
De là cachant tout dret, en drière la caouchie,
I passire sus un pont, qui tremblait souos lus pis,
Et s'rendire au roqui pour machonné la pièrre
Atou du bouan chiman - chene té pas d'la rouoge terre!
Il étais, j'ten asseure, eune fameuse racachis
De toute sorte d'gens, à qu'manchi la Caouchie.
I liavait des hardelles souos les banques acluquies
A dêcroté lus robes, de la bau êcliaquies;
Les Roquiers touos couvert du monde qui sie gerqui,
Les uns êquerfouchis, les aoutre à s'gaoubergi.
Note vaizin en couorant sus les pierres êtravlait
J'nai pas entendu d'pis si s'était estropiet:
I n'en faoudrai pas pus pour l'avé vilennait,
Et la fête des Caouchies, toute sa vie, ergrétait.

NENAI.

Mais grand doux, ma Jeaneton, ch'tait eune terrible pierre
Si falait tant d'monde pour la mettre à l'êquerre.

JEANETON.

Noufait guia, ma hardelle, chene tait que des sifaiches;
I ne fure pas trais minute à la mettre à sa pliaiche;
Un bègaout de Machon, quine tai pas trop malin,
Me dis, en grignotant, que ch'tait tout du gnolin;
Coule était si bain grée, que trais cos de martiaux
De chaqu'un d'chés Messieux, la fixi comme i faoux.

La cérémonie faite, et lus tâche paraîts,
I s'en vinre touos en ville comme i s'en n'tais allaits:
J'erforvï tout d' un co dans le vier marchi,
Et sus les halles à grain bain vite je me gindi,
Pour les vais erpassé, chès belles proccessions.
Des Dames étais grimpaits jusque sus les maisons,
Arangis comme des Reines, atou lus bieaux ribans,
Qui volvotais au vent comme des flieurs de printemps.

Quand je révins siée nous, étais-je ti pon lassaits
D'avé tant sacagi ma pouore corpe affammaits;
Mais je m'ravigoti en mangeant eune beurraits
Et rêvi, toute la niet, le fone de la journaits.
J'ai oui dire quil avais un dîné préparet,
Oué quiqu'un, la séraits, en r'sorti bain guedet;
Bain d'soeure que si ch'tinna avai tait s'engagi.
Parmi les tietotoms, ine sese sai pas bragi.

Bon souer, don, ma Nénai, à la préchaine ervoeux;
Il est tard, et j'man vais m'paqui à Saint-Saouvoeux.

 

St. Aubin, le 1er Octobre 1841.

 

Viyiz étout:

 

Les Pages Jèrriaises