Quat' p'tits garçons, un sé,
S'abûsaient à pâlé
D'l'av'nin, - coum' nou peut vès
Les mous's fair' chlà par-fès.
George.
(s'adrèchant au pus haut du troupé).
Quand tu s'ras grand, dis-mai,
Tchêqu' tu s'ras, - j'veux l'savé ?
John
(d'un ton bain sérieux).
Un Avocat, jé crai ;
Car, coum' châtchun lé sait,
I-l-est util', dé nos jours,
Qu'i y-ait 'rform' dans les Cours,
Et, qu'pour qu'nou-z-ais Justic',
I n'faut qu'y-ait en ofic'
Qué des houm's au tchoeur drouèt -
Touots pliens d'bouann' volontè.
George
Vèr' John, mais l'z-Avocats
Né s'intchêt'nt souvent pas
Dé fair' dé la Justic'
La chos' dé lux délic'.
J'ai entendu ch'qu'i font :
Pour des sous, i pièd'ront,
Abouan d'yeux, bain à l'ais',
Des caus's bouann's ou mauvais's . . . .
John
(atristè un miot par chu d'vis).
Eh-bain, p'têt' bain qu'ch'est vrai,
Mais ch'n'est pas chain qu'jé s'rai :
Jé chouaîsirai, mon-doux,
Lé bouan côtè tréjoux,
Et chlà j'f'rai ov' pliaisi,
Quand j'n'en s'rais pon payi !
Oui ! ossi vrai qu'j'sis nè, -
J'en sis dêtèrminè ! -
J'couor'rai ofuch' les qu'mins
Souotr' les veuv's, l'z-orphélins
Et touots cheux qu'nou voudrai
Chicangny - j'les d'fend'rai
Coume i faut, - tu vèrras !
Et tai, Georg', tchêqu' tu s'ras ?
George
(d'un ton hautain).
Jé s'rai un grand (!) Docteu, -
Pour qué j'piès', gnièt et jeu,
M'fair' porté coum' j'l'entends.
J'f'rai ouvri l'z-yers ès gens ! . . .
Car, tu vé, John, j'crai
Quat' chévaux qué jé f'rai
'Rpétillyis, si pliains d'gi,
Qu' corps-d'âm' n'pouôra en joui . . . .
Touots les jours j'en prend'rai
Un frais, - car, j'té l'dirai,
Jé n'irai pas en vill'
Coum' l'Docteu "Crocodil'" -
Traînè par eun' quédol'
Et jutchi, ma parol',
Dans eun' bijuqu' sus rouell's.
Pour mai, pas d'haridell's :
Mes ch'vaux, à mai, garçons,
S'ront d'véritabl's dragons . . . .
Les yèrs lux pétill'ront,
Et, tant d'feu i saqu'ront
Qu'tout l'mond' trembliéra d'peux
Et dêbrouss'ra d'vant yeux !!! . . . .
Flip,
(qu'a êcoutè ses frères tout l'temps sans dire mot, d'un ton tout-à-fait sérieux, coume s'i-l-'tais dêjà à sa vocâtion).
Dé tes ch'vaux, Georg' Labè,
Jé n's'rai pon êpeurè, -
J'sis prêt à les féré
Tous, s'tu veur m'les envié ;
Car j'm' en vais êt' forgeux
Ov' lé couôsin Jean l'Sueux.
(John èt George s'êgoufent à rire.)
John,
(oprès avé 'rprins san sérieux).
J'n'érai pas d'hont' dé tai,
Flip, tandi qué j'vèrrai
Qu'tu-ès un honnêt' forgeux.
Jè n'sis pas ordghiyeux, -
Tu pouôras v'nin mé vès,
A m'n-ofic', pourvé qu'tu-ais
La fache èt les mains nèt's, -
Tu trouv'ras mes port's ouèrt's.
Flip,
(tout fi èt content).
Oui, John, j'f'rai chain qu'tu m'dis,
Et d'pus - mes bouans habits
Du Dinmanch' jé mèt'rai
Et mes bot's j'biètchin'rai.
John,
(d'eune mîne ritonnante).
Qu' pépè', don, dait avé
Dans sa fenmill' - j'lé vai -
Mais l'Bouan Dghieu sait quand -
Un Avocat, un "grand
Docteu" èt un Forgeux,
Ch'est à tchiqu' chos' près seux . . . .
La Grand'Mère,
(asise tout chu temps dans san fauteul, bain otchupèe à ouvri à eune cauche qu'ou-l'est à fini pour lé p'tit idole dé la fenmille - Charles, qu'est boulè à ses pids à s'abûsé à stitchi d'z-êpîles dans l'gliuxsé d'fi d'la bouanne fenme).
John ! à tchêqu'ou pensèz ?
V'chin yun qu'ou-z-oublièz ;
I n'a pas occouo dit
Chain qu'i f'ra, not' pétit !
J'espèr' qu'i s'f'ra tchiqu' chos'
Hè-tou, s'i vit eun' paus' . . . .
John,
(s'acliutchant èt prennant lé p'tchio dans ses bras).
Ah ! ch'est vrai . . . . J't'oubliais,
Man Charl's ! - ch'tait pas exprès.
- Hè-bain, à tan tou, dit,
Quand tu s'ras grand, man p'tit, -
Un grand houm' - tu m'comprends, -
Tchêqu' tu f'ras ?
Charles,
(mètant ses p'tits bras autou du co à John).
Quand j's'rai grand . . . .
Bain grand, coum' man pépè',
J'eum'rai ma bouann' mémè' ! . . .
La Grand'Mère,
(prennant lé p'tchio èt l'embrachant jeau sus jeau).
Ah ! man cannard, chièr doux !
Tu nos fais vès à tous
Eun' bell' pétit vision
Dé t'n-av'nin . . . . - Tout-à-bon !
J'eum'rais bain mux - ch'est seux -
Qu'tu n's'rais qu'simpl' labouoreux
Ove un p'tit tchoeu tout pliain
Dé bontè, coum' lé tchain,
Qu' d'êt', renfroygni èt frèt,
Sus l'sièg' d'un Jug' montè . . . .
- Nou pouôrait bain vès p'têtr',
John èt Georg' tchiqu' jour êtr',
Dans lus branch's d'z-houm's aufèts,
Et occouo n'êt' jeanmais
Un confort à lux gens
Sus lux vièrs jours ; j'entends :
Amains, don, qu'en mêm' temps
I saient compatisants.
- La grandeu seul' - bain seux -
Né vos fait pas heureux ;
Coum' l'solèt, la bontè
Erprend jouaie èt cliartè,
Et chlà, don, à pliain's mains,
Dans les pus p'tits racoins . . . .
- Oprès chonchin, j'voudrais,
Garçons, quand chêqu' jeanmais
A 'rpianné ou 'rsérèz,
A chain qu'ou s'rèz - ajouôtèz
Les mots qué nos a dit,
N'ya qu'un moment, lé p'tit :
"Quand j's'rai grand coum' pépè',
"J'eum'rai ma bouann' mémè' ! . . . ."
J.D.R.
St.-Héyé, chu 13 Mai 1868.
|
