| Jo | Hallo Julie! Tchi jamais que tu' es a faithe ichin té? |
| Julie | Par exempl'ye! Tu'en as du touppé, pourtchi que j'né sais pon ichin aussi bein coumme té? |
| Jo | P't'être bein, mais mé, j'aime le Jerriais et j'aime not' p'tit pays! |
| Julie | Tchi-qu'y-a temps a aimé dans not' p'tit Jerry? Y'a autant tchi et pus dans d'pus grand pays. |
| Jo | Oh, vaithe, j'l'avoue bein, mais d'bein pus grand pays ne peuvent pas se vanter d'avair tant sortes de tchi dans une si p'tite pièche. |
| Julie | Dis-mé combein qu' Jerry est grand? |
| Jo | Et bein, étou', veurs-tu m'dithe que tu n'sai pon chounna! |
| Julie | Nennin d'ja! J'né jamais apprins rein entouor' Jerri à l'école, mé! |
| Jo | Ni mé intout, je suppose que nous apprend chounna quand nou-z' est un p'tit pus vièr, ch'est à dithe, par expérience, mais allons, pour erveni à nos moutons, Jerri à d'vièrs neu mille de long et tchic chose coumme chinq de laize. |
| Julie | Dis-mé pour tchi que Jerri est fameux? |
| Jo | Pour bein des choses, prumièth'ment quand les visiteurs arrivent par le bâté, y sont émervill'yies quand y vais le biaue panorama de la baie de St. Aubin qui r'sembl'ye i' dîsent à la belle baie d'Naples. |
| Julie | Et pis pour tchi d'autre chose qu'il est fameux? |
| Jo | Des masses de tchi! toutes les carghaisons d'patates qui sortent d'la cauchie! Les belles vaques que nou' vai' dans les clios, les visiteurs trouvent chounna si drôle de les vaie amathées au bu d'un lyian, à la pièche d'être a bânnon coumme siez yeu, et pis tu sai' bein coumment qu'la vaque Jerriaise est ercherchie pour ses bouannes qualités coumme vaque laitière et beurrière, ou remporte tréjous les pus haut prix. |
| Julie | Tchi-qu'y a d'autre de fameux? N'y-a-t'y que des vaques et des patates? |
| Jo | Oh! y' a des fruits, et des légumes par exempl'ye. |
| Julie | Pardingue! tchi fruits a c'menchi que tu erquémand'dés? |
| Jo | Des figues et des prunes-choeu', des chataîgnes et des fôtelles, des poummes et des paithes, et pis du verjus, et m'affait j'allais oubliai man frui' favori. |
| Julie | Des fôtelles! Ah ha! Tchi qu' eh' est chonna eche des légumes? |
| Jo | Tu n'sai pon tchi quc'h'est des fôtelles! Chu p'tit fruit à treis carre que nou' trouve bas dans les routes souos des grand bouais au s'tembre, ch'est le pus p'tit fruit qui craie sus les pus grand bouais! |
| Julie | Tchi d' autre légumes! tu n'n'as paslé que d'patates? N'en pasle pas d'autr' nou s en a les ouethelles lavées; y'a d's'oignons étou, et ........ |
| Jo | Vaithe d'jà, et des radiches, du céléri, des chives et des pouothets des pais vert, des pais d' mai et des fêves!! |
| Julie | Y'a une chose qu'tu oublie Jo! Chein qu'les visiteurs remportent souvent coumme tchuthiosité Jerriaise. |
| Jo | Et tchi don? |
| Julie | Mais t' oubl'ye les caboches qui disent qui craissent jusqu' a djex pids d'haut? |
| Jo | Mercie Julie, pour m'y'avait fait pensé, souvent les visiteurs s'en vont portant les pus haut d'trou-chours qui l'ont peue errachi en passant le long des gardins, et pis y chante "Cabbages ten feet high." |
| Julie | Mais crai-tu té Jo, qu'y' a des caboches que nous; que j' appelons des chours, qui craissent si haut? Pour de mé, je n'lé crai pon, pense-y don; y faudrait des étchelles pour aveindre au haut pour les tchillyi, y' en éthait-i' des tchulbûtes! |
| Jo | Ch'est vrai! Je s'sai bein qu'v'en a d'bein haut, mais j'doute qu'y'en ai qu'arrive fort à djex-pids, y'n 'faut pas tréjous s' fier à chein qu'les visiteurs disent, y peuvent strétchi tchic fais. |
| Julie | Tchi pièche qu'les visiteurs aiment mus a visiter ichin? |
| Jo | La belle p'tite baie de Bouanne-Nièt et la vallèe des Waterworks, à m'n'idée ch'est la deux des pus belles pièches de Jerri la jolie! |
Viyiz étout: