L'oncl'ye Ph'lip et la tante Betsy rencontrent un troupé dé jannes gens, filles et garçons:- y'ià Bella, Janet, Elvina, et Susie; Sam, Jimce, Frainck, et Nicless, (qu'a unn' Gazette à la main)
| L'oncl'ye | Ah, vos v'là, jannes gens, jé sis bein aîse dé vos vais; (ergardant Bella et Janet) Bon, tch'est qu'ou z'avèz vos deux? Ou n'paraissis pon être dans vos cannettes... |
| La tante | Bein seûre qu'i l'ont entendu les nouvelles dé l'engagement à Tom, et chounna lus a fait dèspièt... |
| Bella | (lé nèz en l'air) L'Engagement à Tom? tchi tom? |
| La tante | Mais au janne Tom Avry, dé la "Pièrre dé Bouais". |
| Janet | (lé nèz en l'air étout) Vraîment, j'en soummes bein en peine! |
| Bella | Coumme si l'engagement d'un pareil objèt s'n'allait nos gêner! |
| La tante | Pourtant, nou m'avait dit qu'ou l'y faîsaites toutes les deux les doux yieux! |
|
Janet, Bella |
Quémment! Nous! |
| L'oncl'ye | Mais ou savèz bein qué ch'est un brave garçon qué Tom et qu'i l'a un biaû prospet dévant li. |
| Nicless | (jouant du poing, tappant du pid et criyiant si haût qu'i l'en fait trésaûter la tante Betsy) Jé voudrais bein lé vais pendu, mé; voire, pendu, pendu, pendu, lé vilain emblième qu'i l'est! |
| L'oncl'ye | (Tout surprins) Quémment, quémment! tu vaudrais vais lé pouôre Tom pendu! est-che a caûse dé s'n'engagement? |
| Nicless | Jé m'gêne bein dé vos Tom, mé! Ch'est du fripon dé Kaiseur qué j'pâsle, du Kaiseur, Kaiseur, Kaiseur! |
| Jimce | (à Nicless) Allons, allons, né t'excite pas man vieux; ou viyis, bouann's gens, i n'faût pon prendre avis a tout chein qué Nicless dit. Ch'est dé d'pis la guerre qu'i veint dans chèt êstat-la. I l'a tréjous lé nèz coulè dans les Gazettes, et les r'cits d'hôrreurs qu'i lyièt y'iont touônè un mio lé chervè a l'arbours, et pis chein qui l'a perdu ch'est d'aver 'tait renviè d'Irlande ouèqu'il 'tait ov lé Contingent - à caûse dé san grand appétit et dé sa ronfliérie la nièt - ch'tait pus qué l'Gouvernément n'pouvait endurer! |
| La Tante | Mais... v'là tchi n'empêche pas qué lé panfêque m'a quâsiment touôné les sens!... Enfin, Elvina, té qui counnais si bein l'amouôreuse à Tom, dit nous tchi sorte dé filliette qué ch'est. |
| Elvina | Oui djià la tante, jé dait bein counnaître Herriette Bouannmain des "Taûpinières" (ch'est lé nom dé la maison) et quémment! j'avons tréjous 'tait coumme soeurs, l'yi et mé. (A Bella et Janet) - Ah, ou n'avèz pon bésoin dé pàsler dé l'engagement à Tom, mé - jé n'ai pon 'tait l'y faire la carre coumme vos deux! |
| Sam | Jé voudrais bein saver coumm'est qué Tom s'est laissi happer, l'i qu'avait tréjous peux des filles... |
| Elvina | Eh bein, tu vait, ch'tait un p'tit mio coumme chounchin - La mère a Tom est unn' si triste couque - Ou d'vèz en saver tchiq'chose entré vous, garçons? ou z'avèz tait a la maison du temps des grand' tcherrues. |
| Frainck | Voire d'jià, vraîment! La soupe étout tréjous fraide et trop salèe, et si la viande n'était pon brulèe, oulle 'tait presqué crute, et pour lé poddin... |
| Nicless | (brusquément) S'i l'fait, bein arroûsè partout ov dé la parafinne et qué nou s'y mettrait lé feu... |
| Frainck | Tch'est qu'tu nos contes là? Arrouser du poddin ov dé la paraffinne?... |
| Nicless | Mé, jé n'pâsle pas d'poddins! je pasle du Kaiseur, du Kaiseur dé Prusse, comprenn'ous? |
| Jimce | Voire, voire, man Nicless, jé l'savons bein, mais né nos embâté pon d'aûtre, entends tu? Continue Elvina... |
| Elvina | Eh bein, coumme jé vos l'disais, Missis Avry est unn' bein triste couque: ses gâches sont tréjous alîtèes, quand ou fait du pâtè la crôte en est dure coumme des s'melles dé chavette, et tout chein qu'ou fait a tréjous un goût amierti manque d'y mettre assèz d'chucre - Et pourtant Tom aîme bein lé chucre, car jé l'avons veu, Herriette et me, a nos thées d'chapelle en mettre ou quatre lopins dans sa tasse à la fais... |
| Frainck | Tom a tréjous 'tait pour les douôchin'nies! I l'tait dans not' classe à l'Escole du Dimanche, et quand v'nait lé temps des Examens, i n'yien avait pas yieun à l'battre pour chuchis des peupermeint! i l'en avait les paûtes pliennes! |
| Bella | Et i n'en évait pas seulaement passè unn' pétite poignie ès filles! |
| Elvina | Coumme chounna, i l'est bein aîsi dé d'vinner qué ché n'est pon à la "Pierre dé Bouais" qu'i faût aller pour être bein rigalès... |
| Nicless | Etre bein rigalès! Est-che nos pouôres gens tchi sont prisounniers en All'magne tchi sont rigalès ov du rouôge héreng a mangi tout cru? Ch'est pus-tôt les gros trop pliens dé Boches tchi sont ichin ès Blianches Banques qui sont rigalès! J'ai ouï dire qué chès rein-tchi-vaille là goudallent entré yieux, pus dé quatre chents pots dé lait doux par jour! |
| Jimce | Allons, lyièt don ta Gazette, té Nicless, et porte nous r'pos, j't'en prie... |
| Elvina | Siez Herriette, i y'ià tréjous bouanne tabl'ye, oull' est si aûfaite, car oull' a 'tait apprendre a faire un tas dé bouan fricots, sans pâsler dé la pâtich'rie à l'Escôle Technique en Ville.. la chenne qu'est tout près dé l'Office du Gaz, ou savèz sinon dé l'autre bord du pavè. Tu l'as veue là, té Susie, as-tu pon 'tait dans la même classe qu'Herriette? |
| Susie | Mais oui, dame, et ch'est qu'ou s'en dèshallait bein... Ou gâgnit un certificat pour lé millyieu pâtè a crôte boursoufflièe, et pour les galettes faites ov du self raîsin' et du lait caillyi, sans pâsler d'un H.C. pour sa fricash'rie dé saûciches. |
| Nicless | (tout excitè) Des saûciches! Av'ous ermertchi, bouan' gens, qué dé d'pis qué j'avons tout chu peltas là dé prisounniers ès Quenn'vais qué les saûciches ont renchéri dé sièz sous par livre... qué... |
| Sam | Nicless, Nicless! |
| Nicless | (i continue) Voire, qué les raves ont mantchi, qué les poules ont tchittè a pondre, qué la caboche est plienne dé limaches, et... et... |
| Sam | J't'en prie, Jimce, fait don Nicless sé taire, i n'a qu'bec chèt' empôtumme là!... |
| Frainck | Mais coumm'est qu'Tom trouvi qu'Herriette faisait dé si bouanne pâtich'rie? |
| Susie | Eh bein, ch'tait justément par chance - la filliette lyi même n'eût rein à y faire... |
| Bella | (d'un air motcheux) Ah, nan, p't'être bein, la chière innocente! |
| Janet | Va-t'en conter chounna ès cheins qui n'la counnaissent pas, ma Susie! |
| Susie | (âprément) Ou pâslèz d'même à caûse qu'ou z'en êtes jalouses, vous! Jé sais bein qué Tom s'en fut ès Taûpinnières unn' sairèe pour cherchi dé la pliante dé chours qué lé père Bouanmain y'i'avait promins. I fît Tom entrer dans la bouann' tchuisinne pour bère unn' fais d'cidre, et lé vieux dît à Herriette dé lus apporter unn' assiettèe des galettes qu'oull' avait tchui dans la matinnèe, et v'là coumm'est qué Tom vint a en gouôter pour la preumié fais - J'en sis seûre car j'tais là, mé... |
| Bella | Etait-che pour vais la fille, ou pour mangi des galettes qué Tom r'allait si souvent ès Taûpinnières? |
| Janet | Oh ch'tait au c'menchement pour les galettes mais Herriette prennait tréjous bouan soin dé rester ov li quand'y qu'i mangeait... et j'ai ouï dire qu'oull' en faîsait unn' fouônèe touôs les deux jours, et la flieu' qu'a renchéri! |
| La tante | Taîs'ous, maûvaises langues! Si n'y'iavait qu'à faire des pâtès ou des galettes pour happer un galant, ou s'r'êtes a pêtri et a boulangi lé long des jours, vos deux! Tom nos a contè sé n'affaire - Ch'est un garçon bein modeste dé sa sorte - il 'tait bein èsprins d'Herriette, mais pas trop seûre si ses parents lé voudraient pour lus biaû fils. Enfin, dîmanche passè les deux jannes gens étaient touôs seurs dans lé p'tit parleux en d'vant, et les anciens, yieux, dans la tchuisinne, à s'caûffer au pid du feu - Allons, Ph'lip, contes lu l'restant, car... mé... v'là... toute... hors d'haleine... |
| L'oncl'ye | Eh bein, coumme i n'yià qu'un tenvre châchais entre les deux appartéments et qué é bouan'houmme entend un mio ferme, Tom dans un temps ouït la bouann'femme dire au vieux: "Piesse t'i l'y faire la d'mande annièt!" - V'là tchi lé rasseûrit, et Tom n'y mantchi pas - I n'sait pon trop bein coumm'est qu'i s'y print, i m'a dit, mais enfin i l'en r'pari, et don, v'la coumme l'engagement sé fît - (i r'garde à sa montre) Bon, est-che qu'i l'est dèsja si tard? Allons, Betsy, i l'est temps dé filer - A la préchaine, filles et garçons, j'nos entre erverrons p't'être bein ès neuches a Tom - |
| (i s'en vont) | |
| Bella | (ou prend lé bras a Janet et l'y dit en ritounnant): J'érais bein aver veu lé Tom quand i fît Kiss a sén amouôreuse pour la preûmiè fais!... |
| Janet | Oh, i n'yià qu'à d'mander si vos la ligouaîsi, lé grand babeine! Peugh!... |
| (i' s'en vont tous sinon Nicless) | |
| Nicless | (les r'gardant s'en aller) Et v'là du monde tchi s'amusent a pâsler d'engagements du temps qui va! des engagements! (la colère lé prend, et i l'achiffounne sa Gazette) Ah, si l'infâme Kaiseur avait tint ès siens, i n'yiérait pas tant d'minsère au jour d'annièt. Coumm'est qu'nou s'en va pouver faire un poddin pour Noué ov les oeu's, lé raisin, la corinthe et l's èspices au prix qu'i' sont! Ah, lé gueux de Kaiseur, si j'vos lé t'nais achet'eu, ch'est mé tchi vos l'y r'dressh'rais bein vite sa célèbre moustache, allez!... |
| (i s'en va) |
Viyiz étout: