Le R'vénant
Par J. L. M.
CARACTETHES:
Bram L'esfritè (un fermi agi, en s'r'tithant) Stanley Barette
Soukie L'esfritè (sa femme) Alice Blampied
Bella (lus seule fille) Linda Pipon
Maria Fricot (la soeu à Bram) Beryl Barette
Flip L'esbithè (le jeune homme à Bella) Jack Le Marquand
Fisto L'esfritè (le p'tit fréthe à Bella) Gerald Avrill
SCENE I.
La grande tchuisine es L'esfritès a huit heuthes du sai.
SCENE II.
Le même chose a trais heuthes du matin, mais avec un l'yiet d'dans, les
L'esfritès étant a couochi la, duthant que les ouvriers sont a r'grais lus chambre.
SCENE III.
Meme chose, mais sans yiets, le lendemain a sept heuthes du sai.
-----------
SCENE I.
(Soukie et Maria sont à d'viser et Bella est à couôtre).
Maria: N'vlo l'affaithe qu'appreche donc Bella? Dans tchinze jours ou s'est mathiès.
Bella: Vaithe, le temps s'passe si vite, enfin mon trousseau est quasiment fini.
Maria: J'tais justement a penser j'ai acquo deux's-trais ptites affaithes de Frainque, et tu peut l's'aver si tu les veurs.
Soukie: Oh mon doux! - ou n'a pas acquo besoin d'chonna, donne li une chance, - ou n'est pas acquo mathièe.
Maria: Nan, j'sais bein, mais ils s'sont p'têtre bein c'mode pus tard, nou n'sais jamais, - et dit mai, j'ait ouit que Flip a acatè des vaques?
Soukie: Vaithe, il en a acatè deux - yunne donne reuque du lait d'un tranc, et l'autre a l'musè d'travers et la coue comme une faucille - mais t'chest q'tu veurt, y'a un c'menchement à tout.
Maria: Chest bein vrai, y'a un c'menchement à tout, mais enfin si peuvent faithe une raide bouonne saison d'patates, ils pouorront en acatè, de meillieu classe - mais tu t'en vas trouver une difféthance - quand ou s'sez a d'meuther a votr' nouvelle maison.
Bella: Oh ... eh bein! j'craithez, memèe s'ra bein mus, oulle étha bein pus de r'pos, et pepèe pouorra nivlotè dans l'gardin ... et garder deux's-trais bantines pour se passer l'temps.
Soukie: Eh bein, j'n'sis pas d'votr' idée, j'ait té ichin toute ma vie, et y me f'thait ma d'avair à tchitter mon vier siez mai, - en effet, j'tais à dithe a Bram yier au sai, que j'n'crait pas que j'm'en vais tchitter d'ichin du tout, - la maison est grande assez pour deux familles.
Bella: (restant bête): Oh mais memèe, tu sais bein qui n'y'a qui siez appartements dans la maison, en comptant l'cabinet et la dêpance, - tu sais bein que j'n's'sait pas c'mode, - et pis j'n'crait pas que Flip voudrait ditet.
Soukie: (mârrie): Ch'nest pas à Flip à decider. Ou pouorrez menagi avec une chambre et une tchuisine, et la dêpance pour laver tes cannes à lait et faithe le beurre, - et pis si la famille vos veint, et bein n'ou pouorra p'têtre vos ceder l'cabinet. Tch'est qu'il vos faut d'pus? un palais, j'pense bein!
Maria: Mais tchi que Bram en dit de tout chonna?
Soukie: Oh, li ... j'n y'ait pas d'mander, - j'y'ait dit que j'allous rester ichin, chest tout.
Bella: Pouorre pépèe, y n'a mot a dithe, pouorre vi.
Soukie: Que tchi. Oh, j'craithez bein que ton Flip voudrait bein m'vais clairgi d'ichin, - tai qui n'est acquo q'unne gamine, - y pouorrait t'rammasser comme y voudrait.
Bella: Oh mémèe, tu sais bein qui n'y'a pas d'dangi avec Flip - li qui m'adothe du fond d'son tchoeu.
Soukie: J'n sait pon donc! touos l's'hommes sont d'une sorte, - devant être mathiès, ils vos font des biaux-biaux, mais un coup qu'ils vos tcheinnent l'affaithe change de chanson.
Maria: Flip m'a l'air d'un bouon gamin.
Soukie: Vaithe, p'têtre bein, - mais tout d'même ch'est mus que j'reste ichin avec yeux, - j'pouorrait lus montrer l'bouon c'min, et au mains j'verrais qu'il n'abuse pas d'ma fille. Et pis y faudra qu'il marche drait, j't'l'garantie, ou bein j'en rêpondrait.
Bella: Eh pis, tchi q'ou f'thez avec "La Ruche de M'yi'?"
Soukie: Oh, j'la louethont à tchique Angliais pour un bouon prix.
Bella: Helas! ... n'en v'la une belle affaithe, - tchi que Flip s'en va dithe?
Soukie: Y n'y'a pas d'soin tchi que Flip s'en va dithe; il aitha à s'contenter.
Maria: Eh bein, Souky, tu m'surprends, j'n comprends pas comment q'tu peut t'nin tant à chutte maison ichin, tu n'as pas jamais veut rein donc?
Soukie: Veut tchi?
Maria: Eh bein, n'ou m'a dit que chutte maison ichin est r'cherchie, - et ...
Soukie: Y'est tu tai r'cherchie?
Maria: - et qu'un r'venant veint s'promener en bliancq de temps en temps, faisant des hoêules comme une bête feroce, - et y pathais que chest trejous d'viers trais heuthes du matin qui s'promene.
Bella: Que tchi? un r'venant ichin dans la maison? Oh, mon doux!
Soukie: Des r'venants ... des r'venants ... (en s'en fichant) : tu r'dotte donc?
Maria: Nouffait, j'n r'dotte pas, et y pathais q'chest trejous ichin dans la grand' tchuisine qu'il s'promene, et qu'il faut trejous lis donner tchique chose devant qu'il s'en raille - et ch'est trejous sus l'coup d'trais heuthes qu'il appathais.
Bella: Oh, mon doux! estche terriblye tout d'même - et pepèe et memèe qui sont à couochi ichin dans la grand' tchuisine tout chut temps tandit que les t'cherpentchiers son ten travas dans lus chambre! Oh, mon doux, j'ethais t'il peux si j'tait mè.
Soukie: Turlette, Turlette, ma fille, le seul r'venant que j'ait jamais veut en bliancq, j'tait Bram dans sa c'minze, a piechi ses maudites trappes a souothies dans l'mitan d'la niet, - qu'il veinje se montrer par ichim, - le r'venant, - et pis j'tè garantie, qu'il n'y r'veindra pas une deuxième fais, - va!
Fisto: (rentrant avec un pâtè à la main) : Ne-v-v-v-v'chin, tout p-p-pâtè memèe, il est ac-ac-ac-acquo tout caud.
Soukie: Met le bas d'tchique bord, et couvre-le pour qu'il s'garde caud. Bella pouorra en donner un mio à Flip si veint à saissè, - Tu n'as pas mangi à même, as-tu? ptit pendeloque.
Fisto: (y met le pâtè sus une chaise et l'couvre) : Nan m-m-m-memèe ... j-j-j-'n y'ait p-p-p-pas touchi.
Soukie: Oh chest bein ravissant, va crier à ton pèthe; j'crait bein qu'il est acquo entouorre ses minsethablyes trappes, a s'remplyi d'puches.
Fisto: Oui memèe, mais faut que j-j-'f-f-f-faiche mes leçons, car le maitre m'a dit qu'il m'don'na la c-c-c-cane si j-j-j-j'les sait pas d'main.
Maria: Pouorre Bram ... mon seule frèthe.
Bella: Tu vait ma tante, pepèe à un tel intelligence, chest dommage qu'il ouait si haut.
Soukie: D'l'intelligence, - vraithe, j'pense bein à ... faithe des trappes pour attraper des rats et des souothies qui n'sont pas la.
Bella: Oh mais memèe, tu sais bein que pepèe a quatre sous pour toutes les coues qu'il porte au Connetablye.
Soukie: Vaithe, si n'y'avait que ton pèthe et ses coues d'rat, y'a longtemps que j'sethions sus la chairge d'la paraisse.
(Fistro entre et s'met a faithe ses leçons Bram le suivant).
Bram: (entre) : Et bein, ma pouorre Maria. Jimse n'est pas v'nu avec tai à saissè? (I s'assied dans la chaise sus l'pâtè).
Maria: Nan, car il est à soigni notr' vieille grise poule, ou n'a pas ponnu anniet, et ou n'pathais pas trop bein.
Bram: Oh ch'est p'têtre une fièvre d'lait?
Soukie: Pouorre imbecile, une poule q'ou t'dit, pas une vaque. A nou jamais ouit pasler d'une poule a avair une fièvre d'lait?
Bella: Pepèe ouait si haut.
Maria: Eh bein! faut que j'm'en raille, car Jimse s'sa à arreter pour mai.
Bram: Oh mais, j'trouve t'il caud, - j'men trouve tout failli.
Maria: Mais tchi q'tu'as mangi pour ton thé donc, mon pouorre Bram, qui t'à restè sus l'estoma?
Bram: (ouait haut) : Quatre rats et sept souothies. O mais, j'sis t'il failli.
Soukie: Ch'n'est pas ravissant, tu'est à t'tracasser parmi les trappes, - et la fièvre t'à montè au chervè.
Bram: Oh, ch'n'est pas à la tête que j'ait caud, chest ailleurs ...
Fisto: Oh! oh! ch'nest pas ravissant. R'garde memèe, p-p-pepèe est assis dans l'p-p-pâté, un bouon p-pâté d'pathé.
Soukie: Achocre, et bein n'en v'la un biau pitè. Sapristi de vieille emluque - tu n'en f'thas pas d'deux sortes.
Maria: A bétôt bouonnes gens.
Bella: Pouorre pepèe, - y n'dait pas être trop à s'n'aize.
Soukie: La fièvre! ch'n'est pas ravissant si tu l'avez la fièvre, yun d'ches bouons jours j'té trouvthont assis dans une bachinée de g'lèe.
Flip: (entre) : Ha-ha ... Hello Bella, - bon, tchi que Mess L'esfritè à yeu, - nou dithait qu'il aithait yeut une avarie.
Soukie: Y'n y'à pas rein en rithe, j'm'en vais en avair un biau pitè à r'pathè. Allons, va cherchi l'bain, et lave-tè dans la boulangthie, vier saloppe que t'uest. Allons au yiet mousse, - chest d'ta faute éttout, tai, p'tit imbecile, - attends, j'm'en vais v'nin t'settler dès q'tu s'ras couochi, j't'apprendrait à mettre le pâté a un milieu pieche la prechaine fais, ne s'sait pas trop longtemps ilo avec Flip, Bella, car des que j'men vais avair scrobbè ton péthe, faudra mettre les ptits yiets pour nos couochi, - y s'ra temps que ches tcherpentchiers-là finisse nos chambres ettout, yeux.
Flip: (s'assiévant sus l'sofa avec Bella) : Oh, ma pouorre Bella, tchi maisonèe! Oh, mon doux! Ah bonheur le jour que j'sont mathiès! (Entre Fisto, qui s'muche en driéthe du sofa). Tu dait conter les jours acheteu donc ma p'tite, - quand nou pense que dans tchinze jours j'sont mathiès! - touos seurs ichin - reuque tai et mai, - heutheurs pour trejous! Ecoute, y'm'semblye que nou ouait tchique chose (viyant Fisto muchi) - Ah, sapristi, t'r'vla à ecouter - attends, j'm'en vais t'en bailli ...
Fisto: Tu-tu-tu m'avez promint douze sous s-s-si j'n'écoutez pas, mais t-t-tu m'n les as pas donnès.
Flip: Prends, les v'la tes fichus douze sous, - mais promet-mè, que tu n'le f'thas pas d'autre.
Fisto: Oh, ch-ch ch'nest pas assez de douze sous, j'veurs un sh'lins.
Flip: Oh, t'est comme toute la marchandise aujourd d'anniet, - tu hauchie de prix toute les fais. (Nou ouait la vouaix a Soukie qui crie au mousse), la bouonnefemme s'en va t'en bailli une vieille slingeuse. (Il cliairgie l'mousse hors de l'appartement) : As-tu jamais veut ditet! Enfin, dans tchinze jours j'sont mathiès ... et ichin touos seurs reuque tai et mai.
Bella: "Flip"!
Flip: Oui, tchique y'à? tu n't'en vas pas m'abandonner acheteu? t'en vas tu?
Bella: Nan, nan, y n'y a pas d'dangi d'chonna, tu sais bein que j't'aime trop pour chonna, mon chier, - mais tu n'sait pas. Memèe a decidi à la dernier' munute q'ou n's'en va pas d'meuther à "La ruche de myi," mais qu'ils s'en vont rester à d'meuther ichin avec nous, et qu'ils s'en vont reuque nos ceder deux's appartements.
Flip: Hein? Ah pas que j'sache dga. Crait-tu que j'voudrez rester a d'meuther ichin avec la bouonnefemme par les c'mins? j'sait pour aver une vie d'tchan donc! Si n'y avait que l'bouonhomme acquo, - mais yi, - "la vieille garce" - la premier' niet que j'séthions mathiès, ou s'sait capablye d'être à écouter a la sétheuse d'la porte, - et l'mousse s'sait p'têtre muchi souos l'yiet! - rester à d'meuther ichin avec yeux ila! Oh, mais nennin, et pis bein seut ...
Bella: Oh mais, Flip, tch'est q'jallons faithe?
Flip: D'giatre j'n sais pas, et il est trop tard pour trouver un autr' ferme acheteu - et pis, ou sais bein, chonna, la vieille garce, - mais enfin, p'têtre q'ou changea d'idée.
Bella: Nouffait, malheutheusement, j'n crait pas - la tante Maria y'a jusqua dit ... tchique tu crait ... que la maison ichin 'tait rcherchie, et que y'a un r'venant qui veint s'promener tout en bliancq, faisant des houêles comme une bête feroce, à trais heuthes du matin, et s'ouodisant chest dans ch't'appartement ichin qui' s'promene, - et faut trejous lis donner tchiquechose devant qui' s'en raille.
Flip: Tchi! un r'venant?
Bella: Vaithe, crait-tu que chest terriblye, tout de même! crait-tu que ch'est possiblye, tai, Flip? - memèe dit que ch'est du gniolin et que ch'n'est bein seut pas chonna qui la f'tha sorti d'ichin.
Flip: (en riant) : Un r'venant! un r'venant! Ha ... ha ... tu dis que s'ouodisant la bouonnefemme ne bouogea pas ... Hum ... j'n'sais pas donc?
Bella: Mais crait-tu es r'venants, tais, Flip?
Flip: Nennin, bein seux, mais enfin n'ou n'sait jamais. Y'a d'tchi bein drole dans la vie (en pensée) - un r'venant qui veint s'promener tout en bliancq à trais heuthes du matin. Ha ... ha ... ha ...
(RIDEAU)
-------
SCENE II.
Le rideau ouvre avec le bouonnehomme et la bouonnefemme couochis. Nou ouait l'horlouoge de l'églyse qui sonne trais heuthes, une blianche forme entre par la f'nêtre et s'couoche au pid du lyiet.
Soukie: D'escarre tes pids donc ... y sont fraids comme d'la marblye ... ouait-tu donc?
Bram: Hein ... laisse-mé dormi, tchi l'heuthe qu'il est?
Soukie: Trais heuthes.
Bram: Hon ... (y s'touonne de bord).
Soukie: Ecoute! nou ouait tchique chose.
Bram: Hein! chest p'têtre un rat; j'm'en vais ramasser ma trappe.
Soukie: Oh! laisse tes maudites trappes trantchille! La, tu t'en vas acquo me glé! Oh, l'diatre, j'sis pitchie souos l'pid! chest tai qui nos remplye d'puches avec tes maudites trappes.
Bram: Hon ... l'nez m'pique.
Soukie: Eh ... signe de bouonne soupe ... mais chest drole ... nous ouait tchique chose.
(Le r'venant se leve au pid du lyiet et s'met à faithe des hoeules).
R'venant: Huh ... Huh ... Beux ... Beux ... Beux ... Whinns ... Whinns ... Hee ... heins ... Hee ... heins.
Soukie: Bram, r'garde ... un r'venant. Oh ... au meurtre.
R'venant: I ... I ... hi ... yee ... yee ... yee.
Bram: Tchi q'tu barbelotte la donc? hup ... oh, mon doux!
R'venant: Whênns ... Whênns ... Hi ... Hi.
Soukie: Oh Bram, chest un r'venant.
Bram: De ouest qu'il veint ... et tchi qui veurt?
R'venant: (fait des hoeules).
Soukie: Maria m'a dit qui' faut lis donner tchique-chose devant qui s'en raille.
Bram: Tchi q'tu veurt?
Soukie: Baille-li l'carillion.
R'venant: Whinns ... Whinns ... heins.
Soukie: Oh, mon doux, j'm'en vais m'evanni.
Bram: (prenant le cotillon d'rouoge flianné a Souky) : La, prends ... et n'r'veint pas.
Soukie: Bram ... Bram.
R'venant: (prend l'cotillon, pousse Bram et sort de la chambre).
Bram: Ah ... ma pouorre vieille Soukie! la v'la evannie! vite, de eaux!
(Y verse l'eaux d'un vase d'flieurs sus Soukie et la rescucite).
Soukie: Oh ... Oh Bram ... est t'il ort?
Bram: Oui, j'y'ait donné ton cotillon.
Soukie: Hein ... mon bouon cotillon d'rouoge flianné!
Fisto et Bella: (entrant) : T'chest qui y'a?
Soukie: "Le r'venant," j'l'avons veut.
(RIDEAU)
SCENE III.
Bella: Comment q'tu t'trouve acheteu memèe?
Soukie: Oh ma ptite, y'm' semblye q'tout m'à t'chais dans les gambes, et ... oh j'sis toute sus mes ners ... y'm' semblye que j'voudrais faithe des cris. Oh, si fallait r'passer une autre niet ichin j'affollèe.
Bella: Enfin, n'tè gene pas memèe, la tante Maria s'en va être ichin devant longtemps, et pis Flip à promint de v'nin ... pour vos y porter dans son moto.
Soukie: Ah acquo bein ... pouore Flip ... Oh, mais, la niet ... la niet; j'hahie la niet ... Oh mes pouorres gambes! (A Fisto) : Ou'est qu'est ton pèthe donc? vav ais si'l est acquo parmi ses trappes.
Fisto: Oui memèe, mais j'ait p-p-peux. Oh, j'ait si peux ... Y'a p'têtre un r'venant dehors.
Bella: Pouorre mousse. Ch'est assez pour lis touoner les sangs ... pepèe dait arriver.
Maria: (entre) : Oh, mes pouorres êfants! t'chest q'ou avez yeu donc? estche terriblye! quand nou ...
Soukie: Oh Maria! Maria! j'n'en sis pas la même du tout.
Maria: J'té crait bein, ma pouorre fille, - quand Bella est v'nue me l'dithe j'avais d'la peine à l'craithe, - biau que j't'lavez bein dit que chutte maison ichin 'tait r'cherchie ... et que y'avait un r'venant ...
Soukie: Vaithe, j'le vait bein acheteu ... mais pour rester ichin une autre niet ... Nennin, pas pour tout l'or en Jerri. Quand y faut passer l'travers de ditet Maria, chest assez pour vos touoner l'sangs en lait d'beurre.
Bella: Pouorre memèe en a tè épouvantèe, j'espéthe q'uu n'en s'ra pas d'piéthe.
Soukie: (en plieuthant) : Oh, tu vait Maria, faut passer l'travers pour saver tchi q'chest. Oh, j' la vait acquo chutte villaine grande êmanue-la ... à dansicoter et faisant des Hahs ... et des Hons ... et des braits comme si j'avait tè une vaque touothâtre.
Maria: Et Bram, li, tchi qu'il en dit de tout chonna?
Soukie: Li ... quand j'y'ait dit de bailli le carillon a l'êmanue, n'a t'il pon té lis bailli mon bouon cotillon d'rouoge flianné!
Bella: La n'vla Flip.
Flip: (entre) : Me v'la bouonnes gens, le moto est à arreter pour vous dans l'bel. Mess Lesfritè est justement à mettre sa casaque dans l'alée et à ramasser ses trappes pour les prendre avec li.
Soukie: Oh mais, Flip, tchi terriblye affaithe!
Flip: Mais, ma pouorre Mrs Lesfritè, tchi jamais q'ethait creut ditet?
Maria: Enfin un coup que Bella s'ra mathièe ou n'etha pas d'peux d'couochi ichin avec Flip.
Bella: Oh, mon doux! jamais j'n pouorrait r'couochi ichin.
Flip: (de côté) : Dgiâtre, me v'la pathè acheteu, mé.
(Entre Bram et Fisto).
Bram: La, j'm'en vais mettre mon grand piege ichin, et pis si l'er'venant veint chutte niet, y s'ra happè.
Soukie: Fiche de ton piege, j'm'en vais bein seux pas r'venin vais s'il est happé! Non ... jamais j'n veurt rentrer dans chutte barraque ichin. Oh, mon doux! J'la vait acquo d'vant mes yiers ... la villaine êmmanue! (Exit Soukie, Bram et Fisto).
Flip: Faut t'il vos aidgi, bouonnes gens? J'men vais aidgi à Bella à barrer les portes. Montais dans l'moto.
Bella: Oh, mais Flip! tchique j'allons faithe?
Flip: Bella, ma chiethe (en riant). "Le R'venant." Sais-tu tchi qu'est "Le R'venant"?
Bella: Si j'sait tchique chest qu'un r'venant? Eh bein! un mort, j'pense bein qui veint visiter sa vieille démeuthe.
Flip: (en riant) : Un mort! Ha ... Ha ... Ha ... un mort, nouffait - ch'tis la 'tait bein vivant va. Ch'tè mè.
Bella: (restont bête) : Tai ... t'est fo donc?
Flip: Nouffait, mais quand tu m'dis hier au sai' que la bouonnefemme avait decidè d'rester ichin, et que souodisant y'avait un r'venant, eh bein, j'm trouvit gênè, - mais j'eut une idèe, - et d'même a trais heuthes dans la niet j'ait rentrer par la f'nêtre habillyi tout en blianc, - et j'sis vnu faithe "Le R'venant." Tu pasle d'un êpitaclye! Le bouonnehomme et la bouonnefemme tais couochis la - avec les pids touos descouverts - mais quand y m'ont veut ... et bein ... tu pasle! et quand ta memèe a dit au bouonnehomme de m'donner le carillon, - li qui ouait si haut, - y m'a donné son bouon rouoge cotillon! ... le v'la la ...
Bella: Oh mais Flip! assez pour lus touoner les sangs! Oh, mais Flip!
Flip: Tchique du veurt - fallait bein faithe tchique chose pour se cliairgi d'la vieille. A grands môts, grands r'miédes! Me pardonne-tu, Bella ma chiethe?
Bella: Oui, Flip, j'té pardonne.
(RIDEAU).
Chutte farce ichin, présentée par St. Ouen, a gagni la Coupe des Enfuntchis à l'Eistedfodd en Novembre 1948.
Viyiz étout: