par F.M.H.
Mèrrienne: (a prépather les lédgumes pour san diné, et murmuthant à san tou seu). Chutte caboche ichin est si duthe dépis qu'il a g'le. Oh dans des temps, j'pense que j'epouv'thais bein un patchet de chutte soupe suisse la que nou vait dans les gâzettes. V'la tchi m'sauv'thait de temps, (en hallant eune longue haleine). Mais je n'crai quasiment pas que man bouanhoumme aim'thait d'ité. Oh las, mes roumatisses me font tant d'ma aniet - j'ai bein d'la peine à bouogi mes pouorres viers dés. Si seulement le docteu Oliver était ichin, i' m'doun'nait eune p'tite injection pour me souolagi.
(Le bouanhomme s'en va trantchillement coumme il est v'nu auvec eune cannée d'leau bouoillante. I' choppe en ouvrant la porte - Mèrrienne s'erdrèche en suisant).
Oh, Ph'lippe! Tu m'as presque fait peux. Tchi pouorreté que tu-es à faithe là don?
Ph'lippe: J'm'en allais justement à haut pour me râser ma chiéthe.
Mèrrienne: (surprinse). Té râser aniet? Mais tu n'sais don pas tchi jour que ch'est. Tu t'en vas p't'être c'menchi à r'doter à-ch'teu?
Ph'lippe: N't'en fait pon - je n'sis pas pus bête que té!
Mèrrienne: Mais tu n'té rase qu'eune fais la s'maine, au Samedi au sé! J'ai les milles minséthes à t'faithe te râser, pour que tu s'sais tout fin pour aller à la chapelle le Dimanche.
Ph'lippe: Allons, Mèrienne - sait don raisonablye! Absolument, tu n'crait pas parchance que je sis si bachouard que je n'sais pas tchi jour que j'vivons. J'sai parfaitement bein, que ch'est aniet Vendrédi - et l'Show des Trais Pâraisses étout!
Mèrrienne: Oh j'comprends à-ch-teu! Man pendloque, tu pensais t'estchiver sans m'dithe mot, et t'en aller riboter avec d'autres vièrs bûzards comme té.
Ph'lippe: En v'la assez, de tes insultes! Auprès tout, est-che que je n'sis pus maître siez mé? Crai-tu que j'm'en vais m'laissi c'mander d'la sorte!
Mèrrienne: (sévéthement). Tais-té, et met chutte canne la bas! A-ch'teu, êcoute chein que j'ai à dithe mé! Y'a longtemps que tu méthite un bouan savon. Quand y'a des fêtes ou des Show, tu'y fiche tréjous l'camp, té et m'laisse ichin comme eune servante à faithe tout l'tripot! Le temps passé quand l's avièrs étaient p'tchiots i' fallait bein que j'restisse à les souogni. Mais à-ch'teu tch'i sont touos mathiés, les affaithes s'en vont changi.
Ph'lippe: O véthe! Et tch'est qu'tu crai qu'tu t'en vas faithe?
Mèrrienne: Aller Mé-mème au Show et vaie chein tchi t'y attithe. Je pathie bein que ch'n'est pas rein que pour vaie les vacques et les vieaux que tu'y vais. Il est temps que je t'dgette de près, man vi! Car mémée m'a tréjous dit que l's hommes affolent à tout age.
Ph'lippe: Tais-té, ou bein j'allons aver du brit! J'n'ai accouo janmais mantchi le Show des Trais Pâraisses, et ch'n'est pon té ni d'autres qui m'empêch'chont d'y aller!
Mèrrienne: N't'en fait pas si seux - y'a pus d'eune manniéthe à tuer un tchian. Dis-mé, tchil' habits que tu-avais idée d'mettre?
Ph'lippe: Mes bras en gris flianné et ma néthe casaque.
Mèrrienne: (riant). Ah bein, man vi, tu'es bein joué! Tu n'm'en avais pas pâlé, et j'ai env'yé touos tes habits à netti pour tch'i' saient propres pour l'èrnouvé; comme les réunions 'taient toutes finies ch'tait justement la ma chance. Tu n'as qu'les braies qu'tu porte sus tan co et eune vielle pathe en corderet tch'est à sitchi sus la corde.
Ph'lippe: I'm'semblye que tu l'as fait à l'exprès! Ma garce va!
Mèrrienne: Eh bein, tu n'mé dis janmais chein que tu-as idée d'faithe. V'la tchi t'sert bein, et pour eune fais tu-as 'tait raide bein joué, man vi!
Viyiz étout: