EN D'VANT D'LA STRADE.

TRAIS J'VAUX ARRIVENT.

Preunmyi j'valyi:        J' sommes-t-i' prêts pour la course d'eune heuthe et d'mie don?

Deuxieme:        Oui d'dga! Tch'est qu'est le nom à ton j'va?

Preunmyi:        Ch'est Papillon! Et l'tchein?

Deuxieme:        Bijou. I S'TOUONNE AU TRAISIEME. Ch'est un biau j'va!

Traisieme:        Ch'est eune jument et ou s'appelle Chérie!

        UN QUATRIEME CHEVA ARRIVE SUS LA STRADE.

Preunmyi:        Tch'est que j'avons ichin, un vier carcan? I' LUS METTENT A RITHE!

Quatrieme:        Man Champion, un vier carcan! Arrêtez jusqu'à la course et j'm'en vais vos montrer! I' SORT DE LA STRADE ET LES AUTRES LE SUIVENT. LE RIDGEAU OUVRE. J'SOMMES DANS L'ENCLIOS. DEUX DANMES SONT A VENDRE DES TITCHETS POUR LES COURSES.

Danme:        Acatez vos titchets ichin - deux louis chaque!

Danme numetho Deux:        Chinq louis par ichin, si vos pliait!

Le monde:        Deux/trais/quatre titchets, si vos pliait!

Moussieu Ordgilleux:        Deux titchets à chinq louis pour nous!

Sa femme:        Danme oui, je n'voulons pas être parmi les p'tits tchians!

D'autres gens:        Danme non, ni nous!!

Georges:        Depêch'-ous don, Bella, Gladys! Titchets à chinq louis, tchi vol'lie! Gladys, as to oublié la pelle et l'boutchet?

Bella:        Pourtchi qu'tu veuthe chenna?

Georges:        Pour ramâsser d'la bouse de ch'va pour man gardin, bein seux!

Bella:        J'm'en vais pas aller en cherchi, mé, tchi honte!

Georges:        (a la danme): Trais titchets, ma fille!

Honnête Davi:        V'nez gagi auve Honnête Davi! I' pais tout l'temps mus qu' les aut'es! Allons, Mesdanmes et Messieux!!

        NOU' OUAI EUNE VOUAIE.

La Vouaie:        Mesdames et Messieux, ev-chin les j'vaux tch'arrivant! Trais tch'appartcheinnent à Madame Labelle! Papillon, Bijou et Cherie! MADANME ARRIVE SUS LA STRADE TOUTE FARDEE ET PASSE AUVEC SES J'VAUX.

La Vouaie:        Et pis, oh mon doux, j'avons un aut' chéva tch'appartchient à Moussieu L'Perdant tchi s'appelle Champion! Champion? Le pouorre vier Champion! Eh bein, Messieux et Mesdanmes, achteu qu'ous avez veu les ch'vaux, j'espéthe qu'ous allez gagi dessus car la course s'en va stèrter dans chinq minnutes!

        GEORGES ET SA FANMILLE LUS EN VONT EN D'VANT D'LA STRADE.

Georges:        Bella, j'ai oui que chu j'va-là est vraiement un champion!

Bella:        Est-tu aveuglye? Il est fichu, chu pouorre vyi!

Gladys:        Mais m'mée, tu sais bein que p'pée connais les j'vaux!

Bella:        Oui, et i' perd touos ses sous!!

        LE MONDE VONT GAGI.

        Un louis sus Papillon! Chinq louis sus Bijou! Dgiex louis sus Chérie!

        GEORGES DEHALLE CHINQUANTE LOUIS DE D'DANS SA POUCHETTE! I' VA A HONNETE DAVI.

Georges:        Chinquante louis sus Champion, si vos pliait.

Bella:        I' s'en va perdre touos nos sous!

Honnête Davi:        Ch'est eune belle bête, Moussieu Georges! I' S'MET A RITHE.

La Vouaie:        La Course s'en va c'menchi!

        LES J'VAUX ENTRENT SUS LA STRADE.

La Vouaie:        Et les v'la hors! Ch'est Bijou en d'vant, Chérie et Papillon tête-à-tête et Champion en d'riéthe, mais ev-chin Champion tchi s'ravigotte et qui passe touos les j'vaux pour aller preunmyi!

        TOUT L'MONDE LUS METTENT A CRIER.

        Papillon!
        Chérie!
        Bijou!

        GEORGES ET SA FANMILLE SONT A G'NOUORS SUS LA STRADE.

Georges, Bella et Gladys:        Champion! J'vos en prie, Champion!

        LES J'VAUX ARRIVENT EN D'VANT D'LA STRADE.

La Vouaie:        Et ch'est Champion en d'vant, mais tch'est qui s'arrive? Champion a tchaie!

        LES AUTRES J'VAUX ARRETENT ET LUS METTENT A COUORRE ALENTOU DU VIER J'VA. LES J'VALIERS LUS METTENT A RITHE! MAIS CHAMPION SE BUTTE.

Le j'valyi à Champion:        Allons, man biau vyi!

        LES AUTRES J'VAUX LUS METTENT A COUORRE MAIS I' COUORRENT DU MAUVAIS BORD.

Le Monde:        Ch'est du mauvais bord!

Bella et Gladys:        Champion! Champion! Tu as fini preunmyi!

Georges:        J'ai gâgni chinq milles louis!

        HONNETE DAVI EPROUVE A S'EN ALLER SANS PAYI GEORGES.

Georges:        Ah! Davi! Mes chinq milles louis, si t' pliait!

Davi:        J'sis ruinée! Mais ev-chin les sous! I' S'EN VA.

Gladys:        P'pée, t'en va-tu dêpenser tes sous?

Bella:        Nannin, mais j'y pens'sons siez nous.

Georges:        Ramassez vos affaithes. J'nos en allons parmi les grosses têtes achteu que j'avons tout pliein s'sous!

        I' CHANGENT DE PLIAICHE.

Bella et Gladys:        Extchusez, Extchusez!

Touos les p'tits tchians:        L'ordgi vint d'vant la ruinne!

Georges:        Pas chutte fais! Chatchun a son tou à monter en carosse!!

***********