Rachel et Carterette
(Rachel est à dessiné un portrait d'un tchan quand Carterette entre en embrôn).
| Carterette: | Ch'est lé quatorze de févri agniet. As-tu y'eu des Valentines? |
| Rachel: | Ah, man doux, ch'est d'tchi du temps passé chonna. Tch'est-que qui m'en éthait enyié. |
| Carterette: | Oh, j'en ai yieu trais et pis des belles étou. Gâs, je les ai apportées pour té les montrer. |
| Rachel: | Bah, v'la tchi n'vaut pas la peine d'èrgarder. |
| Carterette: | Vèthe, p'têtre pas pour té mais pour mé ch'est vraiment excitant. |
| Rachel: | As-tu autchunne idée tch'est qu'éthait peu t'lès envyié? |
| Carterette: | Eh bein, la pus belle je crai quasiment que ch'est Arnold, le fils au moussieu tch'a acaté la grand' maison au pied d'siez-nous. I' dansit eune fais auve mé au Pavillon. |
| Rachel: | Et crai-tu que pour chonna i t'enviéthait une Valentine? |
| Carterette: | Et tchèstque ti connais, té, i' semblyait bein interêssi quand i' tait auve mé l'aut' sé. |
| Rachel: | Et pis, tchés'que tu crai tchi s'sait interêssi pour t'envyier la deuxième? |
| Carterette: | Eh bein, je'n sis pas trop seûse pour chette-là. Y'a chu biau janne homme tchi prend la bus au carrefour et tchi semblye bein d'sappointé si n'peut pas s'assièthe à côté d;'mé et si par chance tchiqu'un s'lève i' veint bein vite s'assièthe à côté d'mé. Ch'est dommage tchi nes'sait pon pus hardi. |
| Rachel: | Mais tch'est que qui t'fait craithe tchi n'est pas hardi? |
| Carterette: | I semble tchi voudrait m'dithe tchique chose, et ch'est p'têtre chen sa maniethe dé l'dithe. |
| Rachel: | Eh bein, i' faut que j'dische que tu'en as de l'imagination. Allons, la traisième ach'teu; de ouèsque tu crai qu'ou veint? |
| Carterette: | Pour chette-là, j'e'n peux pas réellement décider. |
| Rachel: | Eh bein, i' faut que tu penses que tu peux attither l'attention dé tout l'sexe maschulin. J'n'éthais jamais creu que touos les garçons n'avaient d's yeux qué pour té. |
| Carterette: | Mais t'oublie don qué j'en reste pas siez-nous touos les siers à faithe des manièthes dé portraits comme té et que je'm promène parmi l'monde. |
| Rachel: | Vethe, ch'la s'peut, mais tu n'm'as pas dit tch'est qu'est tan traisième galant? |
| Carterette: | Si ch'n'est pas Harry Smith, et bein ch'est bein seûx qué ch'est Johnny L'Brun. |
| Rachel: | Oh, tu'as mênagi à embiuter un Jerriais don - i' faut tchi s'sait bein aveuglye chti'na. |
| Carterette: | Es-tu à t'motchi dé mé - ou es'sais-tu jalouse par chance? |
| Rachel: | (bouffant d'rithe) - Tu voudras savé - mais chein que je'm'en vais t'dithe s'en va t'rabattre un mio, mad'mouaiselle. |
| Carterette: | Comment m'rabattre? |
| Rachel: | Ecoute, Carterette, je sis ennyiée de tes siffèches, et i' tait temps dé te donner une leçon. Tch'est que tu t'en vas dithe quand tu t'en vas savé que ch'est mé tci t'a envyier toutes ches Valentines-là. |
| Carterette: | Ma vilaine traitr'esse. J'avais téjous pensé qué tu t'es ma miyeu amie et tu'as peut me joué une pathelle salle farce (plieuthant). Mais comment que j'peux êtr' seûse que ch'est té tchi les a envyiées. |
| Rachel: | Veur-tu m'dithe que tu n'èrconnais pas m'n'écrituthe et les trais adresses sont écrites exactement dé la même manièthe. |
| Carterette: | (examinant les enveloppes). - Vèthe, ach't'eu qu'tu l'dis jé l'vais bein. Tu'es la pus vilaine créatuthe en Jerri. Jamais je'n te pardon'nai - (sortant de l'appartement en colèthe). |
| Rachel: | (criant après lyi). - Si j't'ai apprins une leçon j'nai pas perdu man temps ni mes sous. |
Eisteddfod 1952
Viyiz étout: