| Nency | Bouônjour Betsy, comme est qu'tu'es à ces sé? |
| Betsy | Ah, j'sis bein gênée, mé. |
| Jeanneton: | Tch'est qu'i' y'a? |
| Betsy: | Èrgardez ma pouôrre vaque. |
| Nency: | Mouon Doue d'la vie! Oulle est toute graffiti-ée! |
| Jeanneton: | J'n'ai janmais veu chenna d'vant. Tchi qui a fait chenna? |
| Betsy: | Ch'fut eune dgaîngue d'ches fichus artistes dé siez l'Jersey Arts Centre. |
| Nency: | Lé Jersey Arts Centre - n'en v'là-t-i' eune racachie de reintchivâles! Mais tch'est qu'il ont à faithe auve les vaques? |
| Betsy: | Ch'est eune tchestchion d'la modèrnîsâtion d'la fèrméthie. |
| Jeanneton: | Mais j'sis bein modèrne, mé. Man bannète est modèrne, ma scabelle est moderne - i' taient touos neufs y'a pas pus qu'septante ans. |
| Betsy: | Ah j'sai bein. Mais L's Êtats ont dêcidé qu'i' faut modêrnîser l'agritchultuthe dé Jèrri et nos pouôrres bêtes à cônes daivent êt' faites valer d'eune manniéthe modèrne. |
| Nency: | Mais lé graffiti - ch'est-i' modèrne? Comme tchi qué chenna s'en va amender l'agritchultuthe? |
| Betsy: | Bein, si nou n'veurt pus aver lé bouôn lait d'Jèrri en si grande quantité, i' faut qu'les vaques travâlent en ville pouor donner du fanne ès gens. |
| Jeanneton: | Et des vaques en méta qu'nou peut grîmper sus n'sont pon assez? |
| Nency: | Et la préchaine chose es'sa dé mett' la pouôrre vaque sus eune plianche à rouolettes.... |
| Betsy: | Nou-fait dgia, chenna s'sait riditchule. Chein qu'i' proposent ch'est d'mett' les vaques sus des longues cordes en êlastique et faithe du bungee jumping pouor les touristes. |
| Jeanneton: | Des vaques à faithe du bungee jumping? Tchi niolîn! |
| Nency: | Véthe, véthe... mais chenna saûv'tha du temps. Les vaques es'sont si châtchies qu'nou-s'étha du beurre drait du piéchot. |
| Jeanneton: | Mais dis-mé ma Betsy, pouortchi qu'tu'es ichîn en ville siez l'Sieur L'Boutilyi auve ta vaque graffiti-ée. |
| Betsy: | Ches peûles dé siez l'Arts Centre m'ont dit qu'i' faut chanter ichîn pouor la Fête dé Noué. Voul'ous m'aîdgi? |
| Nency: | Pouortchi pas. Tch'est qu'j'allons chanter? |
| Betsy: | Né v'chîn not' preunmié cantique dé Noué........ |
Viyiz étout: