LE RIDGEAU OUVRE. UN HOMME ARRIVE SUS LA STRADE, SAN PARAPLUIE OUVERT CONTRE LA PLYIE.
L'homme: Mesdanmes et Messieurs, J'sis bein content de vaie tant d'personnes ichin à ces sé, malgré le mauvais temps et j'espéthe que, coumme d'habitude, j'nos en allons aver un hardi bouon Eisteddfod. J'crais bein qu'ous avez liu sus la gazette que Missis Lizzie la Chique, qui nettisait à l'Opera, a mouorit subitement ichin i' y a un mais et j'allons tous la mantchi. Achteu, ch'est man pliaisi de vos introduithe à not' ajudicateux pouor à ces sé - Moussieu Hardi Charmant!
Hardi Charmant: (ses papiers a sa main): Bouonsouair, Mesdanmes et Messieux! J'ai grand pliaisi d'être ichin à ces se! I' S'ASSIED.
L'homme: Et pis not' ajoint, Moussieu Ben Avisé!
Ben Avisé: Bonsouair, à touos vous! I' S'ASSIED ETOUT.
L'homme: Not damne qu' ecrit si bein les certificats - Madanme Belle Êcrituthe!
Belle Êcrituthe: La beinv'ue à tous! OU VA S'ASSIETHE.
L'homme: Mercie! Achteu j'avone eune pièche de théâtre par les etudiants! I' SORT DE LA STRADE. L'AJUDICATEUX SONNE SA CLIOCHE. DE L'AUTRE BORD DE LA STRADE. TRAIS DANMES ENTRENT.
1ere danme: J'allons-t-i nos assiéthe ichin?
2eme danme: Eh bein oui.
IL' LUS ASSIEVENT.
3eme danme: Tchi belle flieuthes. Tout est si bein arrangi!
LA DIRECTRICE ARRIVE.
La Directrice: Mesdanmes et Messieux, j'sommes ichin pouor vos d'mander de donner genereusement à la charite pouor sauver les p'tits crapauds d'Jerri et j'avons pouor vous eune exhibition d'habits pouor mettre quand i' fait d'la plyie, qu'ou pouorrez acater pus tard! Mercie! DU MONDE ARRIVENT SUS LA STRADE.
Jeanneton: Tch'est que j'avons ichin?
Hilda: Je n'sais pas, mais je crais que je n'sommes pas habillyies pouor eune pliaiche comme chennechin.
Flo: J't'avez dis, M'mée, que j'éthais deu mettre ma bouonne casaque aniet! Mais nannin …
Hilda: Tais-nous ta becque - vite assiev-ous!
La Directrice: Ev-chin not preumiéthe mannequine!
1ere mannequine: J'vos presente ma création en plastique pouor chent louis! Exactement chein tchi vos faut pour la plyie d'à ces sé!
TOUT ARRETE SUS LA STRADE. LIZZIE LA CHIQUE APPARAIT AVEC SAN BOUTCHET ET S'N EPONGE ET OU S'MET A NETTI SUS LA STRADE.
Lizzie: La plyie, la plyie et les mathes d'ieaux! OU S'EN VA ET TOUT ERQUEMENCHE.
Flo: As-tu veu chutte femme-là, M'Mée?
Hilda: Tais nous ta becque, j'tais dis!
1ere mannequine: (en s'touonant) : Chent louis, pouor chennechin!
LES TRAIS FEMMES APPLIAUDISSENT.
Hilda: Ch'n'est que deux-trais pouques!
Flo: Oui mais ch'est la faichon, ma tante!
Jeanneton: Tais ta becque!
2eme mannequine: Ev-chin ma création pouor sus la ferme. Sés coumme tout, seulement dans l'pité! Nonante-huit louis - et vingt pour les bottes.
Jeanneton, Hilda et Flo: Ah magnifique!
3eme mannequine: Achteu pouor l'été. Chent quatre-vingts louis pouor vos couvri contre les plyies du mais d'Juin!
TOUT ARRETE. LIZZIE APPARAIT.
Lizzie: La plyie, la plyie et les mathes d'ieaux! OU DISPARAIT.
Flo: La 'rvéla, chutte femme là!
Janneton et Hilda et les trais danmes: Tais ta becque!
4eme mannequine: Et pouor faithe attention au monde, un veritabl'ye bardgin tchi couote chinq chent-vingt louis! ILS APPLIAUDISSENT.
5eme mannequine: Ch't'i-chin est dans les boutiques achteu! Septante louis! Pour aller proum'ner l'tchian!
6eme mannequine: Mesdanmes et Messieux, pouor en fini, rein que nonante-neuf louis. Un model spécial pour dgetter les p'tits crapauds quand i' fait d'la plyie!
LIZZIE APPARAIT.
Lizzie: La plyie, la plyie et les mathes d'ieaux! OU S'EN VA.
La Directrice: Et bein tout l'monde, j'espéthe qu'ous allez acater nos biaux habits. J'nos en allons passer parmi vous pouor faithe eune collecte!
OU S'TOUONE ENVERS LES FEMMES.
La Directrice: Mesdanmes! Allous acater tchiquechose pouor la charité?
Jeanneton: Nannin d'ga, j'sis mus habilly'ie que chenna!
Hilda: Ch'est vrai, mé etout!
Flo: Charité, bein ordonnée, quemenche siez-sé, même dans la plyie!
LIZZIE APPARAIT. OU CHAQUE SAN BOUTCHET.
Lizzie: Tais ta becque, don!!
TOUT L'MONDE SALUENT L'AJUDICATEUX. I' S'LEVE AVEC SES PAPIERS A SA MAIN.
L'Adjudicateux: Mesdanmes et Messieurs, eune bouonne piéche, bein amusante mais, je n'sais pas pourtchi qu'ils ont tant hésité! J'crais bein que ch'tait la plyie! LIZZIE APPARAIT, L'AJUDICATEUX ARRETE. LIZZIE CHANGE SES PAPIERS ET LI DONNE UN CERTIFICAT.
Lizzie: Hésité, tchi niolin! Ecoutez-lé! OU S'EN VA EN D'RIETHE D'LA STRADE.
L'Adjudicateux: Comme j'disais - i' n'ont pas hésité du tout et ch'est pouor chenna que j'lus ai donné un certificat d'honneu et nonante-trais mèrques!! LES EDUDIANTS ET LIZZIE APPLAUDISSENT.
LE RIDGEAU FREUNME.
Viyiz étout:
