| Betsy: | Ma Jeanneton, tch'est qu'tu pense d'la tchestchion du lait pouor les mousses dans l's êcoles? Ch'est-i' vrai qu'i' lus en vont l'aboli? |
| Jeanneton: | Jé n'm'en vais stanner pouor chenna! |
| Nency: | Mais tch'est qu'i' faut faithe? |
| Jeanneton: | Ah j'ai mes idées pouor chenna. J'tais justément à pâler à man nouvieau Député entouor les mousses et comme tchi qu'i' lus en vont saûver l'agritchultuthe en Jèrri. |
| Nency: | Les mousses lus en vont saûver l'agritchultuthe? |
| Betsy: | Comment chenna? Comme tchi qu'tu t'en va explyitchi chenna? |
| Jeanneton: | Bein, ou savez qu'les fèrmièrs dithent qu'i' faut donner du lait ès mousses à seule fîn dé souôt'nîn l'îndustrie? |
| Nency: | Né v'là chein qu'i' dithent. |
| Jeanneton: | I' m'est avis qué si ch'est les mousses tchi gardent la production d'lait en allant en b'vant du lait châque jour, i' dév'thait en êt' dé même auve les lédgeunmes étout. |
| Betsy: | Des lédgeunmes dans l's êcoles? |
| Jeanneton: | Exactément. L's Êtats lus en vont payi à seule fîn qu'les mousses mangent des lédgeunmes et chenna s'en va saûver l'agritchultuthe. |
| Nency: | Don, les mousses lus en vont baithe lus carton d'lait, et pis tchi? Mangi eune patate? |
| Jeanneton: | Et du brécolîn, et des cârottes... |
| Betsy: | Et un pouothé châque jour, j'înmaginne. |
| Jeanneton: | Véthe, né v'là m'n idée. |
| Betsy: | Mais s'tu t'en va stoffer les mousses auve touos ches patates, et cârottes, et pouothieaux et brécolîn, chenna s'en va prendre toute la journée. Quand tchi qu'i' lus en vont faithe lus léçons? |
| Jeanneton: | Ah, jé n'sis pon bête - j'ai pensé à chenna étout. S'il est nécessaithe d'aver un mio d'temps duthant la journée, j'propose dé rempliaichi des léçons. |
| Nency: | Rempliaichi les léçons auve la mang'gie d'lédgeunmes? J'n'ai janmais ouï d'ité! Tu r'dote, ma vielle. |
| Jeanneton: | Nou-fait. Nou sait bein qué l'algébra est compliètement innutile, don j'm'en vais rempliaichi l'algébra par la mang'gie d'cârottes. Ch'est eune bein miyeuthe idée. |
| Betsy: | Et t'en vas-tu rempliaichi la géographie auve d'la gouôt'tie d'brécolîn, et l'histouaithe auve deux'trais bouochies d'pouothé? Tchi niolîn! |
| Nency: | Et s'i' proposent dé rempliaichi les clâsses du Jèrriais dans l's êcoles? Tch'est qu'tu t'en vas faithe auve chenna? |
| Jeanneton: | Oh dgiâtre sait! J'n'y'avais pon pensé! |
Viyiz étout: