Acte I
S'cène: Le Marchi à Lédghumes.
Bonjour Missis, j'apporte l'beurre
Et deux-trois oeux que j'ai 'tai t'cheurre,
Devant m'en v'nin, dans l'vier soyi;
Commest-qu'i vent? Un ch'lin et d'mi!
Pour ditêts oeux!! Pas pus? Pas pus?
Est-ch 'là un prix? j'en sue j'en sue.
Tout d'bon, Missis, tchesqu'et vot' prix
Pour chè biaux oeux? Sans pus de d'vis
Dites quarante sous: ch'est bouan marchi
Et ou sy f'thais un biau profit!
Ou n'voulez pas? A mé! A mé!
Ch'nest pas un prix, dé vrai, dé vrai.
Ou s'en va à une autre vendraisse.
J'voudrais avé deux-trois oeux d'France
Pour faithe d'la gâche; car, pour mé, j'pense
Qué l's'oeux d'Jerri sont bein trop bons
Pour faithe servi. Combein qui sont?
Ch'est vingt-deux sous? Qu'ch'est chi! Qu'ch'est chi!
Prenez-en vingt. - Mais si, mais si!
I' sont si p'tits, i n'ya qu'la cruque
Et i n'sont bons qu' faithe des m'luques.
I sentent la paille; y'en a d'gâtés.
Et vingt-deux sous! Oh bein mettez
M'en une douzaine; de biaux, de biaux!
Et pas des p'tits, des gros, des gros.
Le beurre dé d'hors; combein qu'ilest?
Si n'tait pas chi. - Eh, j'en prendrais
Y'une ou deux livres. - Pour la servante
Car ou'l en mange!- T'ch'est qu'tu nos chante?
Ch'est vingt-treis sous; chest trop, chest trop,
J'n'en aithai pas. Prix fo! prix fo!
Là, mettez l'z'oeux dans man pann'yi;
Faut qui s'saient biaux; - N'en v'la un p'tit
Et j'ne l'veur pas! - Ah dame, quand j'paye
J'veur avé d't'chi qué nou piesse vaie,
Y'en a t'i douze? Ch'est bein, ch'est bein,
Achteu je m'envais; A-d'main, a-d'main.
Ou s'en va, marchant en grandes engambées, hors du marchi.
J'ai yeu la chance; ou s'est trompée
Et j'ai treize oeux; Né v'là ds braiès,
Ch'est y'i qui m'crie, ou veut sen oeu;
Mais me v'la horte, j'sis sauve achteu,
Et j'lai bein jouëe; vêthe d'g'ha, vêthe d'g'ha,
Oh comme j'en ri, haha! haha!!
Acte II
Scène I: Les Etab'yes
Bonsoër, bouannes gens, v'la du biau temps
Mais t'chi poussièthe; - tout est en blianc.
Oùest qu'est man fils? l'éthaites-ou's veu?
Pas ervenu? Il 'tai tout seu.
S'sait i'perdu? Nennin, nennin
Et mé qu'attends; - Le v'chin. Le v'chin.
Mais oùest que tu t'tcheins don man garçon?
V'la pus d'une heuthe que j't'attendons. -
N'm'interromps pas; oùest don tu'étais?
Là ramasse vite tuos mes patchés.
Noufait, laisse-les; tan g'h'va, tan g'h'va;
Va l'ramassé, mais va, mais va.
T'chest don q'tu dit? Le g'h'va est l'yié
D'pis unquart d'heuthe; - et d'jâtre - pouorté;
Fallait me l'dithe, si j'l'avais su
J'ssaimes à m'yié qu'min, quasi acheteu,
Met mes patchets en d'vant,en d'vant,
Pas souos les pids; souos l'banc, souos l'banc.
L'pann'yi à beurre, va t'en l'cherchi
I dait être là; oui, ch'est là li
Apporte-m'lé, et ne l'châque pas
Car y'a d'z'oeux d'France; tu les cass'as,
Lève le pann'yi, passe-lé, passe-lé
Par en drièthe; à mé, à mé.
Missis Grégesse d'vise entre haut et bas et s'met vite dans un coin.
T'chet qu'ente là? Missis Tcheutreuss,
Pour un passage. Qu'ou prenje la buss.
Où pèze bein trop pour v'nin ov' nous,
L'querre n'est pas fort, i cass'ait d'sous.
N'té montre pas, muche-té, muche-té
Drièthe chutte vanne:... Ou t'vé! Ou t'vé!
Ou n'buoge pas pour deux minutes, et ou'l êpie, et enfin ou r'veint dans l'bel.
Oh par bonheur! la r'véla horte,
Ou n'ma pas veue drièthe chutte porte,
J'tais bein muchie: - Garçon, dêhalle
Dé d'souos ta venne - Oh qué tu'es sale!
Tu'es plien d'poussièthe; va t'en, va t'en
Bein vite t'ess'coué, Rondement! Rondement!
Scène II: Oquo ès Etab'yes
La même et sa couosine qu'oul a veu passè dans la rue. Sans fils l'attend aupi du querre et lis crie d'temps en temps.
Bonsoër couosine, et coummest-que tu'es?
Ch'est un r'nouvé pour mé d'té vais.
Et vos esfants, sont-i' touos forts?
Nou n'vos vait pon, - n'ya q'quant nou sort
Et ch'est sis rare... - M´v'chin, mé v'chin,
Ch'est l'Frank qui m'crie: - J'vais v'nin, j'vais v'nin.
Sus vos patates,avous fait bein?
Car pour de nous, j'n'avons fait rein,
Mais sus nos bêtes? - Oh, pas tant pièthe,
I' n'faut pas s'pliaindre... - Eh peux-tu t'taithe,
Oui don, ouai-tu? J'm'en veins, j'm'en veins.
Veur-tu bein t'taithe? Tchi train! Tchi train!
Et vot' neu g'h'va, coummest qui fait?
Peut-i' trotté? A-t-i' choppé?
D'pis qu'ou l'avez... - N'crie pas si haut
Eche que n'ou n'peut s'entre dithe deux mots
Sans que tu beûles: "Vé t'en, Vé t'en."
Eh bein j'm'en veins: Attend, attend!
Ou châque de main ov' sa couosine qui s'en r'va.
Faut que j'men-âge: A la préchienne...
Mes compliments... - Oh las! Tchi peine
A embertchi; Tchein don le g'h'va
Car s'i bouogeait j'tcherrais à pliat;
Bon, mé v'la bein - Oùest-qu'tu'es? Oùest-qu'tu'es?
Là, i r'est hors; Oh mais! Oh mais!
Mais chu garçon, oùest qu'i s'tchein don?
Mé v'la toute prête et s'il tai bon
D's'en v'nin achteu - Et mais le v'la
Pour tchest q'tu r'garde? tchest qu'il y r'a?
Mais vé t'en don; Ecoute, êcoute,
Vé t'en tout d'suite; à route, à route.
Tête sans chervelle, tch'est qu'tu'oubliyais?
Jamais tu n'prends tout dans une fais.
Ch'n'est pas comme mé, JAMAIS j'n'oublie
La moindre chose... - Man parapluie?
Est-i possib'ye? Perdu! Perdu!
Oh trouve mé lé: L'as tu? L'as tu?
Eche ilo li? montre m'lé don;
Ch'n'est pas là l'mein, mais... - il est bon,
Et quasi neu; - Tu n'as pon l'temps
De le r'porté, met lé souos l'banc.
I'vaut bein l'mein. - Vèthe d'g'ha, vèthe d'g'ha,
Ch'n'est qu'une êchange - I f'tha, I f'tha.
Viyiz étout: