Eisteddfod 1998
Dramatis Personae
(L'Chef d'police frappe sus la tabl'ye)
Chef: Comme Chef d'Police, j'vos d'mande achteu, tout l'monde, lev'ous, s'i vos pliaît. Achteu j'veurs d'mander à not' Connêtabl'ye d' entrer
(Il attend tchiques s'gondes mais personne n'entre)
(allant à la porte)
Moussieu l'Connêtabl'ye, s'i' vos pliait...
Le Connêtabl'ye entre
Connêtabl'ye: Mes bouonnes gens d'la pus belle pâraîsse de l'île, assiév-ous, assiév-ous, s'i vos pliaît.
Achteu, ou savez tous qu'j'sommes ichîn pour distchuter la nouvelle taxe, la vente des bannelais, le rât et chutte affaithe d'changi les frontchiéthes d'la pâraîsse. Mais preunmiéthement j'allons suivre l'agenda pour la rêunion; ch'est pourtchi not' ségrétaithe Madame Betsy Badlagoule va liethe les minutes d'la dreine rêunion.
Betsy ouvre sa livre
Betsy: Merci Moussieu l'Connetabl'ye. (liesant) Un mio d'lard salé de Moussieu Ireson dans l'marchi, eune pathe d'drâses en rouoge coton d'siez Hamon... oh, man Doue, ch'n'est pas les minutes, ch'est eune liste d'mes besoins en ville. J'savais bein que j'l'avais pèrdu quand j'étais à boutitchi, mais eyou qu'i' sont, mes minutes?
(ou cherfouille dans san pangni)
Oh Moussieu l'Connetabl'ye, j'craie qu'j'les ai laîssi siez Hamon!
Connêtabl'ye: J'n'sais pas si j'pouvons continnuer sans nos minutes.
Chef: Janmais, j'n'avons ieu eune rêunion sans les minutes.
Recteu: Mais j'mênagînmes la dreine fais quand Betsy pèrdit les minutes - oulle est tréjous chein d'sus d'sous.
Betsy: (mârri) Moussieu le Recteu, j' n'm'en vais pon rester ichîn pour être însultée - j'n'sis pon payi assez pour chenna. J'aim'thais mus vos laîssi à vos affaithes. (Exit)
Connêtabl'ye: Eh bein, j' espéthe qu'ou peut les trouver pour not' préchaine rêunion - mais tch'est qu'j'pouvons faithe pour à ces sé; i' nos faut tchitchun pour prendre un r'cord dé touos chein tchi pâsse ichîn.
Audienche 1: Pas touos, j'espéthe!
Chef: Ah, n'évla Miss Vigot - oulle est ségrétaithe à l'avocat Fripon. P'têtre qu'ou pourrez l'faithe.
Connêtabl'ye: Voul'ous nos aîdgi Miss Vigot et nos prendre les minutes?
Miss Vigot: Ooooh oui, Moussieu, s'j'peux vos aîdgi...
Ou monte sus la strade, et nou lyi donne eune pliume et du papi.
Connêtabl'ye: Merci. Achteu, j'pouvons c'menchi. La preunmiéthe chose sus l'agenda est chutte affaithe des frontchiéthes qué l's Êtats veulent changi. Lé Bailli nos dit qu'i' s'sa bein pus c'mode pour décider l'rât, si toutes les pâraîsses es'sont d'la même grandeur, et i'nos a env'yé chutte carte-ichîn pour nos montrer les changements qui sont nécessaithes.
Protchutheux du Bein Publyi: Comme ou viyiz, les choses sont bein mus pour nous. A la pliaiche d'aver des frontchiéthes qui vont ichin et là, i'sont vont etre tout drait. Comme chennechin, j'pèrdons la maintchi d'nos vertes rues, et n'év'la eune bonne chose étout, car m'n homme a acaté un Ferrari. Et pis, j'allons sauver bein des sou, car j'n'éthons pon autant d'routes a soigni, et j'allons gangni acouo eune autr' aubèrge étout.
Audienche 2: Mais extchusez-mé, Madame lé Protchutheux, i'm'sembl'ye qu'ous avez mantchi eune chose hardi împortante...
Connêtabl'ye: Madame, i'faut addréchi la tchaise..
Audienche 2: La tchaise? Eh bein... ma belle tchaise....
Connêtabl'ye: Nannîn, pas chutte tchaise-là - ichin - mé, j'sis dans la tchaise.
Recteu: J'veurs s'gonder les minutes.
Chef: Tais-té, Recteu. J'n'sommes pas là d'autre.
Audienche 2: Moussieu, èrgardez sus la carte, i'pathaît qué la Salle Pârouaissiale n'est pas acouo dans la pâraîsse.
Audienche 3: Mais Moussieu l'Connêtabl'ye - ou'est qu'est vot' maîson?
Connêtabl'ye: La v'là - là haut - oh! mais! tch'est qu'est chennechîn?Ma maîson s'trouve dans la pâraîsse, mais ma p'tite maîson n'en est pas! Tch'est qu'j' m'en vais faithe dans l'mitan d'la niet - à faithe mes besoins dans eune aut' pâraîsse!
Audienche 3: P'têtre qu'i'vos faut payi des râts pour châque fais.
Connêtabl'ye: J'n'aime pon chutte idee-là du tout
Audienche 4: Et j'allons tchitti, car nos maîsons dans Lé Clos d'la Vase n'sont pas acouo dans la pâraîsse nintout
Audienche 5: Vethe, j'allons à la rêunion d'la pâraîsse à coté!
(i' fichent l'camp)
Connêtabl'ye: Tais'ous, tais'ous, tout l'monde. J' n'gangnons rein si j'continnuons comme chennechîn.
Audienche 1: Logi au greffe, Moussieu l'Connêtabl'ye!
Connêtabl'ye: Bouonne idée - comme châque jour dans l's Êtats, l'affaithe est déféthée. (au ségrétaithe) Déféther, Miss Vlicot.
Miss Vigot: Miss Vigot pas Miss Vlicot! J'n'aime pas m'cliutter sus les rotchièrs!
Connêtabl'ye: Oh, j'm'extchuse.... Tch'est qu'est la préchaine chose à distchutter?
Chef: J'veurs vos pâler sus I'affaithe des bâtons d'justice - i'sont touos pouorris, et mangis dtvers. L'aut' jour, quand iun d'mes officièrs tappit un malfaîteur sus la tête, san bâton tchit en mille pieches. Et i'sont touos d'même. J'veurs c'mander des nouvieaux.
Audienche 2: Tchi qu'i s'en vont payi pour?
Audienche 1: Pouv'ous en acater en plastique?
Protchutheux du Bein Publyi: I'nos faudra trouver les sou tchiquebord - mais véthe, la nouvelle taxe peut l'payi.
Miss Vigot: Tchi taxe qu'ou voulez dithe?
Protchutheux du Bein Publyi: La nouvelle taxe sus les hauts. J'savons bein qu'les Jèrriais n'ont janmais 'té bein grands - ch'est les caboches tchi sont dgiex pids hauts, pas nos gens! Achteu, j'allons taxer touos les siens tch'ont pus de chinq pids et d'mie d'hauteur.
Recteu: Et l'églyise? est-che acouo dans la pâraîsse?
Connêtabl'ye: Tais-té, Recteu; j'n'sommes pas là d'autre.
Protchutheux du Bein Publyi: J'allons m'suther touos les gens tchi sont ichàn à ces sé pour decider combein qu'châtchun faut payi. Lev'-ous, tout l'monde!
Audienche 2: J'm'en vais rester à genouors, mé!
Protchutheux du Bein Publyi: Mais eyou qu'est la relle pour les m'suther?
Connêtabl'ye: Ahem! I' m'faut la rammener pour not' préchaine rêunion - j'l'avais empruntée la s'maine pâssé aupreès la Visite Royale, car ma femme voulait m'suther pour ses nouvieaux ridgieaux. Mes apologies.... J'allons continnuer à ces sé auve l'affaithe des bannelais.
Chef: Nos bannelais sont les miyeurs dé tout l'île!
Audienche 2: Ch'est car j'avons tant dé j'vaux dans la pâraîsse!
Chef: Mais l'prix n'est janmais haut assez. I'y a-t'i tchique moyen dé l'hauchi?
Audienche 2: D'mander ès Êtats d'y ajouôter!
Le Cannon entre auve deux afiches
Audienche 6: Mais tch'est qu'est chenna?
Chef: Ah, ch'est les nouvieaux cannon pour le baté d'sauvetage!
Connêtabl'ye: Véthe, les "maroons" .
Cannon: Moussieu l'Connetabl'ye, i'y'a un baté tchi coule dans la baie
Miss Vigot: À l'aîgue, touos l'monde!
(i' sortent tous pour li aîdgi)
Recteu: J'n'ai qu'chînq pids et d'mi, mé - mais achteu, i'n'sont pon là d'aut'!
RIDGIEAU
Viyiz étout: