GIALOGUE ESCRIT À CHU SUGET LÀ PAR UN GESRIAIS.
JEANTON.
Halos! Halos! Moman as tu ouï les nouvelles,
La Reine s'en va v'nin ses fils et ses demoiselles
I s'ront toues ichin d' main avec le Prince Albert
J'lai veu sus la gazet au Couësin Philip Vibert.
Yien érati du trains à chain qu'nou dit en ville
Ouest qu'tout est chain d'sus d'sous, sifaut en criaiz la fille
Qui vain d'qu'rir un bennett pour la Suzon Erthu
Quira vais chonna d'main ovec Jeanton Esthu.
J'irai et tou ma fé, j'mettrai ma belle robe
Mes toues biaux fins saulairs que vlo sus man wardrobe
Et j'corlerai mes g'veux et j'y mettrai des flieurs
Et jt'rouvrai un galant parmi toues les promeneurs!
MANON.
J'irai et tout ma fille en ouvrant à ma cauche
Dans l'traisné du Couësin d'ma Couësinne Esthé Bauche
Va et lus dit Jeanneton de v'nin au co d'canon
Et d'nos esviltonner, mé et man vier garçon.
JEANTON.
Eh bain et qui o'quo à huiptant deux ans d'asge,
Tu veux aller en ville et quitter ton mesnage
Pour aller galvauder et vais tout chu floquet
Qui riront ent'viyant ouvrer à tan blianchet,
Sans robe, ni bennett, ni polka! ni bosselle!
Ni mantlet, ni biaux gants, ni saulairs à sandelle.
MANON.
Qu'est qu'tout chon chin veux dire est quj'ai besoin d'piaux d'cat!
De touas chest flans flus là, chest d'sorguiers tout chonna
V'la bétôt vingt chinq ans, que j'nai pon veu la ville
Tu veux que j'niale pon, et qui oquio ma fille,
J'irai, j'lai dit Jeanton, j'en jure et pon n'en men
Quand j'devrais en mouozir.
JEANTON.
Mais pense a t'nenterment.
MANON.
Ah tu voudrais m'fair poeux, sorte de'rainquivaille;
J'irai et j'en verrai toute la des finissaille
Et si j'en meurs ma fille, ergarde v'la un jambon
Qui fra pour l'enterment, oui guia car il est bon.
JEANTON EN SOUPIRANT.
Assais d'chugnolin la, j'irons nos deux ma mère,
Quand j'devrais t'y porter et man bouanhom de père;
T'uiras - tu la verras; car j'irai li crier
Que tués venue à la ville exprès pour la saluer,
Que tan coeur est loyal et que t'nâme est sincère,
D'pis qu'tu n'crains pas la mort......
MANON, PLIEURANT.
Mais tait té, v'là tan père.
In faut pas dire un mot de ch'qui vain de spasser.
Embrache me Jeanton et jurons d'nos aimer.
ME. PHLIP, ENTRANT.
Et bain pargui, houras! v'la qui fait bain mes filles
Il m'en faut iun et tout sou nestes pon difficiles,
Car je sis tout barbu, d'pis bétot quinze jours
Que j'nai veu man razeu ni d'barbi à man s'cours.
(Les viers s'embrachent, et Jeanton rit.)
ME. PHILIP, FI COMME UN PINCHON.
Ah v'là qui r'assouvain, dit manon, nouet gennesse.
Et fait v'nin l'iau au bec; ah sinon ma foiblesse...
J'en r'paslons une aut fais; d'visons un mot d'la Reine
Qui vain la s'maine préchaine.
JEANTON EN RIANT.
On pustôt chut semaine.
MANON, À LA F'NESTRE.
Phlip, Jeanton, vite, allons et viyiez les skeam boet.
Car la Reine est a bord, les v'la tout près d'la Couet.
Yun, deux, trais, quatre, chinq, qui numéro chière doueche,
Va cherchi mes soulairs à bliouque et à galoche;
Car si ou vain ichin, j'irai me mettre a g'noux,
Et f'rai tout ch'que j'pouerai pour qu'ou vainne siez nous.
Les v'la à la Corbière I s'en iront en ville.
In vaindront pas ichin, j'en pleurrais bain ma fille.
ME. PHLIP.
Ne dit mot ma Manon ou vaindra p'têtre ichin,
Pour les vais au Mangni bain heur d'main au matin.
MANON.
Et ma fé j'compte qu'et tout, cré tu que j'sis si bête,
J'nos n'allons d'main en ville exprès pour vais la fête.
Y vaindrais tu ov nous, j'avons un biau hernais
Et dès que l'cocq chan'tra......
ME. PHLIP.
Tu n'en r'vaindras janmais;
Pense à mes nonante ans, quest qu'nou dirait en ville
De vais un vier bouane homme et sa femme et sa fille,
Dans d'shabits du vier tems à battre les pavés,
ECOUTEZ QUEST QU'NOU OUET?
Né v'la un co d'canon, il en tirront deux, trais,
Tout en triemble, ma fé; Manon, chonna rappelle
Le jour quand les Normands......
JEANTON, TOUTE ESSOUFFLAIE.
Ne v'là une Demoëselle
Qui m'a dit en passant, que chest d'main au matin,
Que la Reine atter'ra pour nos vais par ichin;
D' même Papa et Maman faut nos couechi d'bouan heur
Pour nous l'éver matin et aller bain vite queure
Le c'h'va et l'biaux hernais qui nos portera tous
A vais Victoria que j'aimons bain mus qu'nous.
MANON.
Faut nos couechi, bon soir, et j'irons tous eusemble,
Vais comme est qu'ou paraît, savé à quest qu'our semble.
(Ils se couechent en attendant l' co d'canon et l'chant du grand gnier cocq.)
JEANTON.
Papa v'la l'co d'canon, es tu esviltonnai,
Frotte tes yiers deux cos et ôte tan bonnet.
ME. PHILIP.
Et chest té ma Jeanton, ah! tu pense à tan père,
Mais i faut a man tou que je crie à ta mère.
Manon, ouët-tu, Manon.
MANON.
Ah! oui guia man garçon,
Je pense bain à la Reine, ouest man biau cotillon
Et ma coëffe à longs buts......
JEANTON.
Les v'la, despêche té vite,
Le hernais s'en va v'nin et couësinne Merguitte,
Man père a deja mins ses braies et ses saulairs,
Qui craquent et sont si duers comme des viers roquiers:
Dam j'paraîtrons toues bain, le Bennett à ma mère.
Esgalue de biautai; et mé jen sis pas mal
Car ma robe et mes pumps, pouëraient faire pour un bal,
Ouest qu'est le p'tit mireux? vraimment je si bain belle
La Reine me prendra pour iune des d'mouëselle.
Ah bon ne v'là Merguitte avec le biaux traisné,
Jindons-nous d'dans bain quick, ah! nos y v'là ma fé.
MANON.
Va au fin feu d'galop, ma pouere chière Merguitte:
Fait tan Bidet aller pour que j'y siyons vite,
Et j'te la montrerai toute habillie en or,
Dans sa véture d'argent qui l'attend là sus l'Port.
MERGUITTE, FOUETTE SAN BIDET EN CRAINT:
Veux-tu aller têtoigne, ouet-tu, affrontaie bête;
Ach'teu qu'tuas lboudin plain tu t'en fichi bain d'la fête,
Ah sa tu galop bain......
MANON.
Way, way, back, ah mon gui
Phlip, mam Phlip, Jeanton, high, j'nen peux pus pargui,
Arrestais j'men risrai.........
PHLIP ET JEANTON.
Eb nou fras guia sans doute,
Et nos v'la bétost venus, je sommes pus d'amié route,
J'allons vais la cauchie et toues chais biaux batiaux,
Qu'ont de grandes chimnais et qu'ont l'air de chastiaux
Et tu verras lus reux qui touesnent par sus les louesmes,
Comme les reuz du moulin au fils au Couësin Jesmes.
JEANTON.
Mais nos v'la desjà venus, viyis chu tas d'couleurs,
Et chest mastas d'Louri, des V et d's A en flieurs,
Des couronnes par tout; v'la qui craist dans les rues
J'en plaintai à Saint-Ou pour faire des av'nues
Quand la Reine vaindra pour vais chu vier Grosnez,
Et Monsieu au Mangni et les Doms à Vinchlez.
MANON, TOUTE MASRIE.
Assais de chu Saint-Ou, filons à la Cauchie
Et en nos yen allant mangeons une bouchie:
J'avons de la galette et du cidre coeuru
Qui nos f'ra bain du bain oprès avé coueru.
Jeanton, Jeanton, di lé chonchi est-i la ville,
Je n'y r'connais pus rain, oh qui biautés ma fille.
Vait qui tas de chest Doms et d'chest biaux officiers,
Ov lus sabres à la main et lus airs si guierriers,
N'en v'là à roueges cloaks, qu'ont l'air de faire garde.
JEANTON.
Et chest nos Magistrats, Gieu les sauve et les garde.
Et n'erconnai-tu l'on l'couësin Fransais Erthu,
Qui queur comme un cherf pour faire san salut
Maia oué-tu, v'là l'canon, chest signe que v'la la Reine,
Ou s'ra bétot ichin, v'la le skeam bouet qui l'ameine.
Ah le v'la z'arrivai, vait tu chest biaux batiaux,
La Reine est dans chtichin et ses grands généraux;
Viyous la v'là au d'gré parmi les Demouëselles
Qui l'y donnent la main tandi qu'les p'tites hardelles
Chantent de biaux versets et la couvrent de flieurs,
En marchant sus l'tapis, sus de belles couleurs.
Viyiez où va monter dans sa belle véture,
Avec le PRINCE ALBERT. Oh qui noble picture:
Restons ichin au coin arrangis dans l'hernais,
Et j'les verrons passer, n'manquons pas à les vais.
Moman, Papa, Merguitte - ah les v'chin là tout près,
Criais - Vive la Reine! où nos paslla zoprès.
(La Reine passe et ergarde avec bontai chest pouers viers et les salue gracieusement; et la hernachie ne pousse qu'un cri: " LA REINE GIEU SAUVE ET GARDE!" VIVE LA REINE!)
(Me. Phlip, et sa bouenne femme s'ergardent en lermant.)
MANON.
Ah man Phlip, j'nen peux pus, man bonheur est complet
As tu veu chu doux regard, et la fête qu'ou m'a fait;
Jen l' oublierai jamais, j'en sis toute ra-vie,
Mes jours en s'ront pus doux - et j'fini-rai ma vie
En pensant......au bonheur d'avé veu ses biaux yeux,
Et je prierai qu' oul ait un règne glorieux.
(Pouere Manon est si en joie qu'ou n'peut dire un p'tit mot; Me. Phlip, Jeanton et Merguitte sont toues esmues.)
JEANTON.
La joie à bain d'leffet, pronons toues bouan conrage,
Et allons nos prom'ner et vais tout chu resmuage.
J'men vais vos m'ner à vais chu biaux p'tit pavillon
Ouest qu'oul à tai s'assez ovec la procession;
Là, prend man bras Moman - Papa, crochte Merguitte
Et j'verrons chu biaux quai; pis j'ervaindront bain vite
Pour la vais erpasser, pour aller s'emberqui
Dans chest biaux p'tits batiaux que v'lo zoprès l'roqui.
Nos v'chin an Pavillon, v'lo le Prince et la Reine
Plaichis des deux costés, chest juste comme ieux même,
R'gardais bain les couleurs chest chain qui ya d'pus fin
Faites exprès pour angniet, chain qu' a dit Jean Voisin.
Mais entrais par dedans, ou verrais bain des choses,
Viyiez chu biau tapis oquo tout couert de roses,
Et chu biau grand fauteuil ouest qu'ou s'est minse dedans
Touchis y tous achteu, car j'en pasllons long tems;
Mais ne v'lo la musique estche qu'oul est desjà v'nue,
Allons vite au hernais devant quou sait d'scendue,
J'marchons comme à quinze ans, et je jouissons de tout,
J'avons veu les biautais qui sont pliantais partout,
Ah nos v'chin au quériot, montons y tout de suite
Et j'la verrons oquo passer ovec sa suite.
Mais les v'lo v'nin Papa, allons d'la fermeté
Et saluons la Reine admirons sa bonté.
(La Reine et sa suite erpassent, en saluant la quériotaie des patriotes, qui l'y lanchent forche de complimens, de bouans souhaits, de bénédictions et de houras.)
ME. PHLIP.
Et bain mes pouer zesfans, ou nos à erconnues,
Ou r' gardait pour nos vais, j'en sommes esperdues
Oul a souri si blanc en faisant ses agieux,
Et m'a dit en passant: "Vieillard soyez heureux."
S'oul avait arrestai j'lyairais dit bain des choses
Et j'lyairais bain offert un biau bouquet de roses;
Mais ourvaindra nos vais dans le Stembre qui vain,
Et j'maprestrai bain d'seux pour que je chasquions d'main,
Ah on n'merfusera pon, ou n'est pon orguilleuse
Bévons à sa santai, piesse talle être heureuse.
JEANTON
Ah sa faut nos naller, j'avons un but d'qu'min;
Merguitte prend tan bridot, la gniet s'en va r'venin
Ya zillumination assessé dans la ville,
Mais ov de vielles gens n'on n'peut rester ma fille
Man Papa et Moman sont lassais de lus jeu,
Faut nos rader siez nous et mettre l'geon à feu;
Et j'pasllons à'VICTORIA quand je s'rons sus la veille
A grisli des paids ronds et viégui la bouteille.
Ah sa montons ichin - nos y v'la bain juindais;
Fait trotter tan Bidet j'iron es Quenvais,
Lus dire tout chu qué bé que j'avons veu en ville,
Et que tout s'y est passai si bain et si tranquille;
Janmais nou n'avait yeu rain d'si bé zen Gesri,
Tout de Roses était couert et chergi de Louri,
Et toutes les maisons paraissaient animées
Ov lus grandes couleurs, jusque sus les chimnées:
Et toues ches biaux soudards qu'avaient l'air si contens
Les uns sus de biaux ch'vaux......
MANON.
J'n'avons pon tai long tems
Nos v'la au pid d'notre us, mais je sis bain lassaie
Allume le crasset, - ah je sis essouflaie,
Mais je me resjouis bain que Phlip sait v'nu ov nous:
J'en pasllons dans nouet liet quand ou dormirais tous;
Car à notre asge zesfans les gniets sont si longuettes
Que nou zaime à conter de ches vielles historiettes,
Qui font tant de plaisir et qui rendent contens,
Et qui font rire, et tout, ches pouers vielles gens.
Mais, ah sa, ma Jeanneton, pour finir la journaie,
Chante-nous la chanson que nou nos a donnaie;
Tu nos l'as tue si bain, et nos a fait plaisir,
Que quand tu la chantras, je voudrais m'y en dormir.
(Jeanneton qu'menche.)
VIVE LA REINE - Air: "Jersiais, voici le jour de gloire."
"Jersiais, vive la Reine auguste,"
Cet ange protégé des cieux;
Ceint du diadème du juste,
Qui rend toujours victorieux,
Chantons des hymnes d'allégresse
Pour cette Reine de sagesse,
Que nous chérissons,
Ainsi, tous chantons
VIVE LA REINE! l'orgueil de Césarée,
Pour toujours adorée. - (Bis).
J'nai chantai qu'un verset et la v'là zendormie
En disant: ma Jeanton, qui biau jeu dans ma vie.....
ME. PHLIP.
Escoute, ma Jeanton, un coup d'cidre et houras,
Devant que j'nos coucchons; mais crie au coësiu Phlip Le Bas.
Ah, te v'là, man garçon, prendras-tu un p'tit verre
A la santai d'la Reine, à la Reine d' Angleterre?
Vive la Reine! houras! crie oquo, man fistaux,
J'la verrons passer d'main dans ses biaux grands batiaux.
Ervain d'main o matin pour pasler d'la journaie,
La plus belle que j'éyons janmais, janmais passaie.
Merguitte et té, Jeanton, ov nous deux viers garçons,
Crions, houras, houras, et, d'un accord, chantons
" Vive la Reine, l'orgueil de Césarée."
Pour toujours adorée. - (Bis.)
Houras! bravo! Vivent les Viers! houras!
VIVE LA REINE!
Viyiz étout: