|
Caractéthes
Mess Benest |
Lé temps passée - siez Benest et Miché à Dronfield, eune vendue à l'encan
Mess Benest entre dans l'auditouaithe auvec Charlot, san clerc. Les metteux sont dêjà à fourgotter parmi les lots sus la strade.
| Charlot: | Va-t'en, Mess Benest - ou savez bein qu'j'sommes pressi aniet. I nos faut être fini îchin par chîntch' heuthes au pus tard pour la reunion parouaissiale. Ch'est man oncl'ye tchi s'en va prendre pour Connetabl'ye, et i' s'sa bein marri si j'n'sis pon là pour voter. | |
| Benest : | Vèthe, vèthe, Charlot - n'vos genez pon. Ou s'sez là pour l'election. J'avons tout pliein d'temps. | |
| I' montent sus la strade. | ||
| Charlot : | Mais ou'est qu'il est ? | |
| Benest : | Tchi ? | |
| Charlot : | Lé Porteux - i' dait être îchin d'vant les metteux. Theophile ! Theophile ! | |
| Benest : | Il est p'tetre en driethe. J'craie qu'il a eune bouteille muchi là. Va li cherchi. | |
| Charlot : | (criant) Theo! | |
| Metteux #1: | The-e-e-o! | |
| Charlot: | Manniethe d'affronté ! Theophile, ou'est qu'ous etes? Ah vos v'là. Ach't'heu j'pouvons c'menchi. Mais r'garde l'heuthe ! J'sommes dêjà en r'tard. | |
| Benest : | Mesdames, messieux, bouanjour. Ch'est un pliaisi d'vos vaie ichin aniet, especiallement viyant qu'l'temps est si mauvais. Not' vendue aniet est pour argent comptant - pas à la saison ! I'faut payi man Clerc d'vant sorti vos acats. Pas d'snotch'chie, pas d'cratch'chie, s'i' vos pliait. (au Clerc) Man doue d'la vie, man pouorre vyi, tchi longue fache. Calme-ous, Charlot, j's'sons fini par chintch'heuthes. (ès metteux) Il est gené pace qu'i' veurt etre fini d'bouanne heuthe viyant qu's'n oncl'ye est candidat pour Connetablye et j'espethe qu'ou s'en vont tous voter pour li étout. Don 'tais-ous et n'evchin not' preunmyi lot. | |
| Charlot : | Lot neunmetho iun - ch'est eune mangnifique bachin. | |
| Benest: | Oui, ch'est eune superbe bachin - ch'est d' Villedieu et ch'tait fait servi par Missis Le Cherf pour faithe un tas d'nier beurre dans san temps. Ch'est un vraie antichité - | |
| Metteux #1 : | Oui, et Missis Le Cherf en est étout ! | |
| Benest : | Tch'est qu'ous allez m'donner pour chennechin ? Un louis…. dgiex chelins don….. nannin ? un etchu - un chelin - mèrcie madame - un chelin - deux chelins - un etchu ? mercie moussieu - à un etchu - trais chelins | |
| Metteux #3: | Et d'mie ! | |
| Benest : | Nannin - voul'ous m'donner quat' chelins ? | |
| Metteux #3 : | Ah nannin | |
| Benest : | Ch'est acouo auvec vous, moussieu. A trais chelins - a trais chelins - a trais chelins - vendue ! Ch'est Moussieu Syvret d'St. Ouën, n'est-che pon ? | |
| Charlot : | (ecrit l'nom dans san livre) A ch't'eu n'evchin l'deuxième lot. Ch'est tout ches choses ichîn pour la fermethie. I'y a deux ballots d'bamboo - du millieur qualité - un grappin - un raté tchi manque un dent - | |
| Metteux #2 : | V'la tchi m'ramemouaithe d'ma belle-methe | |
| Benest : | Va-t'en, Theo - j'n'voulons pon rester ichin jusqu'à minniet | |
| Charlot : | Et eune hérche à main et eune houette. | |
| Metteux #4 : | Mais j'n'veurs qu'les bamboos pour man gardin, Mess Benest. | |
| Benest : | Nannin, ch'est tout ou rein. Tchi veurt m'sterter pour deux dginnées ? (gasps from audience) Mes bouonnes gens, v'la tchi sont des mangnifiques otis pour un jeunne fermyi. Allons, mes anmins - un louis seulement - un vrai bardgin - nous pouorrait payi des louis et des louis pour un 'té herche à main | |
| Metteux #1 : | Mais j'n'veurs qu'la herche à main. | |
| Metteux #2 : | Et mé, j'veurs acater l'grappin pour man bouonhomme. | |
| Metteux #3: | Tout ches gens m'embete. J' m'en vaie t'bailli un louis pour toute la pecque | |
| Benest : | Bon - si n'y pas d'autres, i'sont les votres pour un louis. | |
| Metteux #3: | Eh bein, m's anmins, tch'est qu'ou s'en vont m'donner pour chutte herche a main | |
| Metteux #1: | Dgiex chelins | |
| Metteux #3: | Voul'ous acater chu grappin - ch'est l'votre pour rein qu'dgiex chelins | |
| Metteux #2: | Oui-dgia! Oh, qu'man bouonhomme va être bein content à ces sé ! | |
| Metteux #4: | J'aim'thais bein acater les bamboos, si vos pliait. | |
| Metteux #3: | Pour dgiex chelins ? | |
| Metteux #4: | Chînq chelins. | |
| Metteux #3: | Sept chelins et d'mie ? | |
| Metteux #4: | Bon, mèrcie bein des fais. | |
| Benest: | Jé n'sis pon trop content d'vos vaie faithe un profit à mes dépenses…… Tch'est qu'est l'prechain lot, Charlot? | |
| Charlot : | Umm, ch'est un c'mode, Mess Benest. | |
| Metteux #1: | Pour tchi qu'ch'est c'mode, Charlot ? | |
| Metteux #2: | J'veurs vaie si ch' s'sai c'mode pour Papa ! (tries it) Ch'est certainement confortable assez pour y lièthe la gazette - man chièthe Papa, il aime les Chroniques. | |
| Metteux #1: | Pas la gazette du sé ? | |
| Metteux #2: | Nannin, i' aime mus lièthe les Chroniques - i' fait servi l'Evening Post pour un autre chose | |
| Metteux #4 : | Si nous l'acate, nou peut faithe des sous d'suss | |
| Metteux #2: | Mais comment ? | |
| Metteux #4 : | Nou pouorrait chergi un penin chaque fais….. | |
| Benest : | J'ouait-i' - j'ouait-i' - vingt louis | |
| Metteux #3 : | Vingt louis ! | |
| Benest : | A vingt louis ! | |
| Metteux #3 : | Nannin-dgia ! j'n'veurs pon acater chu vier c'mode - j'avons eune belle en porcelaine dans not' nouvieau p'tite maison | |
| Metteux #4 : | Ch'est putot vingt chelins qu'ou voulait dithe…. | |
| Benest : | I'y a un r'serve la d'sus | |
| Metteux #1: | J'm'en vais partagi le prix auve té - comme chenna quand tan papa est fini, ma tante Mergot pouorrait en faithe servi. | |
| Metteux #2 : | Bein - j'offrons vingt-chinq chelins | |
| Benest : | Vendue ! Prechain lot | |
| Charlot : | Ch'est un cork-crok-cocoro-coco | |
| Benest : | Ch'est un crocodile ! Chennechin fut trouvé par un janne garçon dans la Mathe de St. Ouen - mais j'n'peux pon m'rappeller san nom….. | |
| Charlot : | Ch'tait le p'tit Mike Stentiford. | |
| Metteux #2: | Mord-t-i' ? | |
| Benest : | Tchi - Mike Stentiford ? | |
| Metteux #2: | Nannin, le corocorococodile | |
| Benest : | Rein qu'eune mauve par jour - comme chenna ch'est eune bouonne chose pour garder Jèrri propre ! Tch'est qu'ou m'donnez pour chennechin - 10 louis - 5 louis - 1 louis | |
| Metteux #4: | 1 chelin ! | |
| Benest : | A 1 chelin - pas pus qu'ch'là? Nannin - ch'est a té a un chelin ! | |
| Metteux #4: | Mangnifique - v'la un nouvieau pagas - et p'têtre eune pathe d'souliers étout | |
| Benest : | Tch'est qu'est l'prechain lot, Charlot ? | |
| Charlot: | Bon - ch'tait eune vase en Ming | |
| Benest : | Ch'tait eune vase ?? | |
| Charlot : | Vèthe - mais ch'n'est pon ma faute - i'fut mins sus la bus a L'Etacq, mais ou savez bein qu'les cacheurs d'bus aniet n'sont pon comme dans nos jannes jours - quand i'arrivit ichin, i'n'y avait que ches bredelles d'restant…. | |
| Benest : | Nous est chanceux si nou peut trouver eune beusse aniet…. Chu vase n'vaut grand'chose ach't'heu. Un chelin, p'têtre. Metteux #1 cahuche la tête Bon, à un chelin Metteux #3 tousse Deux chelins Metteux #4 fait un sîngna Trais chelins Metteux #3 torche san nez Chinq chelins Metteux #1 est troubliée par eune mouque Dgiex chelins - Metteux #4 fait un sîngna Un louis Metteux #1 est troubliée par eune mouque Deux louis Metteux #3 torche san nez Chinq louis Metteux #4 fait un sîngna Dgiex louis Metteux #1 est troubliée par eune mouque vingt louis… vingt louis eune fais - deux fais - trais fais - vendue à la dame et sa mouque - eune vase en Ming pour un vingt louis - j'ai des lermes ès iers. | |
| Charlot : | Ch'est mus qu'un chelin, Mess Benest. | |
| Benest: | J'avons tchiquechose speciale à ch't'heu. Le prechain lot fut trouver à la Destructeu à St. Pierre - et ch'est tchiquechose bein utile pour garder la porte d'vot' établ'ye ouverte - ou freunmée. Va l'cherchi, Theo. | |
| Charlot: | Vite, Theo, j'n'ai pon grand temps à épaingni d'vant la réunion d'pâraisse. | |
|
|
Theo apporte la Masse | |
| Benest : | N'evchin un….. un....... tch'est qu'ch'est Charlot ? Charlot hauchit ses êpaules Ch'est eune machinne-chouette. Ch'est certainement ieune des miyeurs qu'j'en ai janmais veue. ……………. mais combein qu'i' vaut ? (pause) (i'rgarde partout) Nou n'vaie pon ditelle touos les jours, mes gens….. un magnifique présent pour donner à vot' belle-mèthe. | |
| Metteux #4 : | Especiallement si'i' tchiyait sus sa tete un d'ches jours. | |
| Benest : | A trente louis ? | |
| Vibert (d'l'Audienche) : | Arrete là eune minute | |
| Benest : | Tch'est qu'i'y a ? Bonsouair, Connétabl'ye Vibert. Est-che qu'voulez en acater, man vyi? | |
| Vibert: | Nannîn, Mess Benest - mais ous êtes touos blouitchi | |
| Benest : | Mais pourtchi ? | |
| Vibert: | Chette-là, ch'est la Masse d'la Cour Rouoyale. Personne n'la janmais veue d'pis l'Otchupation. V'nez auvec me, touos les deux. Et vous, les témoins. I'm'faut ouï vos explyications. | |
| Charlot : | Et l'election d'm'n onclye ? | |
| Conn : | I' n'y a pon d'souain d' chenna | |
| Exit tout sauf Theo - mais i' laîssent la Masse | ||
| Theo: | J'crai pon qu'i' s'en vont èrvenin aniet - et j'ai besoin de chenna pour garder la porte dé l'êtabl'ye ouverte - ou bein freunmée…… ou pour ma belle-mèthe….. |
Présenté ès Séthées Jèrriaises d'l'Eisteddfod 2001