par A.Vagnini/M. de Bondy
L’êtudgiant: -Jé n’sis pas bein diguant par GO - J’ai la rate tchi s’dilate, - J’ai lé faie tch’est pon drait, etc.
L’adjudicatérêsse: Ch’la suffit, man janne gas, ta pièche ch’est du niolin èrcité à la six, quat’, deux. Infliammâtion d’bouoyaux, d’ponmons, d’rîngnons, oua don !re Mais l’parragrave ch’est tén accent. Nou dithait du Portûngais ou du Polonnais ou du Kéniannais. Ch’est laid comme lé péché du dînmanche. Ch’n’est pon du bouôn pliat Jèrriais, ch’est d’l’Hottentot. I faut l’enraînchi hors ta gorge. J’m’en vais en dithe deux mots à l’Hortitchultuthal Sociêté. I faudra t’met ‘itou à éputher dans un grand lînge. J’m’en vais m’en aller t’aouarder un certificat aluminium. Y’a rein en d’ssous. Tu n’méthites pon aut’chose.
L’étudgiant (à l’assembliée) Ous allez vaie chein qu’ous allez vaie. J’sis un mio chorchi, mé!
L’adjudicatérêsse (dév’nue êtudgiante): If par Rudyard Kipling, èrcité par mé: - Si tu peux êpliutchi des tas d’patates Touos les jours dé ta vie Et feunmer du vrai tailli, Tu s’sas eune bouonne femme, ma fil’ye. Si tu peux suffâtchi tan vyi ouaînâtre Toutes les nyits dans tan liet Et feunmer du vrai tailli, Tu s’sas eune bouonne femme, ma fil’ye.
L’êtudgiant (dév’nu adjudicateu) : Ch’la suffit, ma garcette! Chutte pièche est sans moeurs, èrcitée à la douze, hui’, quat’. Et tén accent, man Dou, tén accent! Ch’est piéthe qué du Portûngais, qué du Polonnais, qué du Kéniannais, qué d’I’Hottentot! Ch’est aussi piéthe qué ………..d’l’Angliais !!!
L’adjudicatérêsse (dév’nue êtudgiante): …qué d’l’Angliais! Respé d’l’honneu! Nânnîn-Dgia, ch’n’est pon pôssibl’ye. Tu vas vaie chein qué tu vas vaie, té. J’m’en vais m’en aller d’mander à l’honorabl’ye assembliée si j’ai l’accent Angliais, mé. Di’-me’, honorabl’ye assembliée, ch’est-t- i qu’j’ai l’accent Angliais, mé? - Si l’assembliée répond: Nânnîn-dgia!
L’adudicatérêsse (érdev’nue adjudicatérêsse): Tu vai! Né v’chin la justesse des bancs d’justice! - Si l’assembliée répond: Oui-dgia!
L’êtudgiant (èrdév’nu êtudgiant): Tu vai! Né v’chin la justesse des bancs d’justice! - Si l’assembliée répond et oui et non
L’êtudgiant (èrdév’nu êtudgiant): Tu vai! Ne v’chin l’galimatchias des bancs d’justice
Viyiz étout: