J'sommes à la Salle Parouaîssiâle dé St. Oü auve lé présenteux dé Radio Jèrri, Christophe La Pièrre et deux personnes qui s 'en vont rêpondre ès tchestions.
Christophe: Bonsouair bouonnes gens. J'sis Chris La Pièrre et j'ai grand pliaîsi dé vos présenter Tchestions ès Gris Ventres avec not' nouvieau élu Senateux, Mess. Laiêsse Ecobichon et lé nouvieau Recteu dé la Grande Egl'yise, MADANME lé Reverend Lîzabé Carré-A'Court, qui s'en vont rêpondre à, et distchutter j'espethe! - vos tchestchions. Mèrçie et beinv'nus, Senateux et Madanme lé Recteu! Mon doue, tch'est qu' i' y a d'la nouvieauté ichîn à St. Oü!
Senateu Laiêsse: Un pliaîsi, Chris!
Madanme Lé Recteu: (un miot rupée) Ch'est Lîzabé A'COURT-CARRÉ!! Bonsouair, tout l'monde!
Chris: Mes apologies, Madanme!
Un Minnistre dans la Salle: Pas d'femmes en chèrge dans l'Eglyise!
Des Malcontents dans la Salle: Non - pas d'femmes!!
Chris: Ahem! Ahem! Comme d'amors, j'avons Emile auve la preunmié tchestchion Emile.............
Emile: A la fîn, j'sis fache à fache avec un Membre d's Êtats! Dites mé, pourtchi qu'ous avez alloué des nèthes vaques sus l'Ile? Chenna s'en va changi la race dé nos belles petites vaques dé Jèrri. Lé monde n'ont pas les prîncipes comme dans man janne temps! Et pas d'lait pouor les êfants d's êcoles! - tch'est qu'ous allez faithe pouor changi chenna?
Senateu Laiêsse: Emile, ous savez qué j'vînt d'être élu et j'n'ai ieu rein à faithe avec autchuns dé ches sujets-là, mais j'vos asseuthe qué j'm'en vais m'y întérêssi spécialement dé vot' part!
Madanme lé Rev: Et mé, j'm'en vais mentionner l'affaithe dans mes sèrmons ès fermiers dé bestchiaux Dînmanche en huit!
Férmyi dans la Salle: I' n'y a qu' UN fermyi qui garde des vaques à St. Oü et j'n'ai qué des Jèrriaises!
Emile: Bah! Acouo la même chanson!! Pas d'rêponses du tout!
Chris: Et ach'teu, j'avons Bridget! Oui Bridget?
Bridget: Jé n' m'en vais pas vos garder bein longtemps. J'sis toute esouffliée. J'sis v'nue avec mes tchians cherchi eune pann'née d'tardives patates siez la danme-là d'l'Étac et ou m'dit qu' ou n' a pas drouait d'aver d'aut' vrai ch't'année pouor mettre sus sa terre, car lé Conmité d'Agritchultuthe li ont dit qu'oulle en a déjà ieu pus qué s'n allocâtion pouor 2010! Comment qu'ou s'en va craître dé si bouonnes nouvelles patates l'année tchi vînt? Ch'est dégouotant! Lé vrai du Pulé est pouor tous!
Lé F ermyi: Hallez lé vrai et la baie sentitha mus etout!!
Senateu Laiêsse: Ch'n'est pas d'la faute au Conmité, Bridget, ah mais nânnîn! Ch'est la Commeunauté Européenne! Ch'est ieux tchi c'mandent! Et jé d'vons les suivre! I' nos tcheinnent par lé co!
Madanme lé Rev: Oui! J'sommes tous t'nus pas lé co!
Joy: Ch'est vot' dgène tchi vos tchînt, Madanme lé Reverend! Au jour d'aniet, j'sommes tous, hommes et femmes, m'nés par lé but du nez par les Êtats!
Les malcontents: Ch'est vrai, chounna!!!
Chris: Mesdanmes et Messieurs! s'i' vos pliaît!! Ach'teu, j'avons tchiqu'un sus l'téléphone! Bouônjour!
Téléphoniste: Est-ous là? Hello? Ch'est mé sus la lingne! Jé n'peux pas v'nîn à la Salle pace-que j'ai drissé sus d'la fouo ..... um ... figue dé tchian et je m' sis faites grand ma à la gambe! Ch'est tout bein qué l'monde vennent a St. Ouën, mais i'n cliérgissent pas auprés lus tchians!
Madanme lé Rev: Né vos gènez pas! J'veindrai d'main au matîn dé bouonne-heuthe et j'vos f'thai eune tassée d'thée!
Senateu Laiêsse: J'sis bein content qu'ous avez touchi sus chu sujet là, car dans man "Maiden Speech" j'ai pâlé dé l'affaithe! J'veurs qué toutes les Pâraîsses bâtissent des p'tites maîsons pouor les tchians dans chaque route et chenna s'en va resourdre toutes vos peines!!
Les Malcontents: Ha! Ha! Ha! Bâtissez des maîsons pouor les tchians!
Chris la Pierre: Et év-chîn Oscar auve eune tchestion!
Oscar: J'sis bein gené car j'ai veu sus la Gâzette qui s'en vont mettre des machines pouor m'suther ieau dans les maîsons et jé n'sais pas tchi qué j'm'en vais faithe, car j'fais servi la pompe dans l'bel pouor la bouonne ieau. I' faut pomper au mains dgiêx fais avant d'prendre ieau car touos les tuyaux sont en pliomb ou nou s'rai fichus d'être empouaîsonnés! Comment qu'i' s'en vont m'suther chenna quand jé m'sert du grand vièr pot qué j'héthiti dé ma Grand' tante Merienne et jé n'sais pas combein d'pîntes tchi faut pouor lé rempl'yi! J'sais bein qu'ou soulait lé vièdgi eune fais la s'maine et jé n'sais pas si l'bouonhomme lé faisait servi ou pas! Tch'est qué j'm'en vais faithe?
Senateu Laiêsse: Né vos genez pas, ch'est tout m'suthé avec d'la machinn'nie ach'teu, mais j'ouais qu'i' s'en vont c'menchi dans l'Est et par lé temps qu'i' veindront siêz vous - ous ethez p'têtre bouogi d'maîson!
Oscar: Criyous? Et l'pot à Grand' tante Merienne?
Madanme lé Rev: Pliantez des flieurs dédans ou bein gardez-lé souos l'liet!
Les Malcontents: Oui! Eune bouonne idée!
Chris la Pierre: J'avons-t-i' d'autres tchestions?
Eune Femme: Viyant qué j'travale tant d'heuthes par jour sus la ferme et qué j'n'ai pas grand temps d'coutchi, j'veurs Quarante Milles Louis pouor un projet. J'voulons dev'lopper eune faîchon dé craître des patates, dé les mettre en pouques dégradabl'yes, sans les laver, et dé pouver les bouoilli-dans-la-pouque pouor sauver du temps!
Senateu Laiêsse: Mais ch'est eune affaithe de Pâraîsse, pas d's Êtats!
La Femme: Mais pourtchi qué les craîsseurs dé g'zettes ont ieu Quarante Milles Louis pour eune machinne à m'suther les ouongnons des G'zettes? N'ont-i-pas peu vaie combein grands qui sont?
Madanme lé Rev: P'tetre qu'i n'ont pas 'té à Specsavers!!
Les Malcontents: Tchi??
Madanme lé Rev: Ieux, ch'est lus yeux, VOUS ch'est vos ouies!!!
Chris la Pierre: (pointant à eune personne) Av-ous eune tchestchion?
La Personne: Ma télévision né marche pas dépis lé dgiêx-sept dé Novembre! Viyant qué j'l'avais acaté à vot' boutique en Ville i'n'y a qu' tchînze ans, pouv-ous m'dithe tch'est qu'oulle a, Senateux?
Senateu Laiêsse: Mais j'ai vendu chutte boutique-là i' y a dgiêx ans! Ch'est l'age DIGITALLE, et i' faut eune neuve télé ou eune bouete pouor faithe vot' vielle marchi!! Et j'y connais rein, ach'teu!
Madanme lé Rev: Né vos en faites pas! J'm'y connais tout à fait, mé. J'veindrai d'main au matîn siêz-vous vos aidgi!
Senateu Laiêsse: N'oubliez pas, Madanme Lé Recteu, qu'ous allez faithe eune tâssée dé thé siez la personne qui drissi! !
(Madanme lé Rev. fait d'la minne dé n'pas l'oui)
Chris la Pierre: Ch'est't-i' là tout?
(Eune Danme entre la porte dé la Salle, chèrgie d'pagas, et ou couôrre en d'vant)
Sonia: J'sis si contente qué jé n'sis pas trop tard! J'sis èrvenue d'Anglièterre par Condor Vitesse et ou 'tait si tard et si lente - Condor Vitesse!! Ch'est Condor Colînmachon!! Les pliaîntes qué nous a oui! Les avironneurs dé Sèr jusqu' à Jèrri nos ont facilement passés! Et pas d'Officiers dé la Douanne en Jèrri! I' y avait un Dgèrnésiais qu'a entré chèrgi d'GÂCHES pouour vendre ichîn!
Eune disgrace!!
Chris la Pierre: Mais av-ous eune tchestchion, Missis?
Sonia: Oui! Et ch'est à touos les présenteurs dé Radio Jèrri! Ach'teu qué j'appréchons lé temps des Fêtes, all'ous apprendre à dithe: "La Fete dé Noue"? Pas "La Fête dé Noo-way"!! coumme i' y en a qui disent?
Chris la Pierre: La Fête dé Noué? Ch'est-i' bein?
Sonia: Mangnifique!
Les Malcontents: Mangnifique!
Chris la Pierre: (en 'rgardant a sa montre) Mesdanmes et Messieurs, mérçie pouor aver prînt part ichîn à St. Ouën et mes èrmerciments au Senateux Laiêsse Ecobichon et à Madanme lé Recteu Lizabé ACOURT-CARRÉ pouor lus "rêponses"! J'sis Christophe la Pièrre et ch'est ichîn Radio Jèrri. A bétôt!
