Mêrrienne

Ont-i' publiyé touos les résultats de l'élection ?

Ph'lippe

Nennîn, ma vielle... i' n'y'en a qu'eune partie. Pour Sénateux y'a le Cap'taine Harry Jenkins, le Colonel Hugh Dickson, et pis Ph'lippe Érnon.

Mêrrienne

Eh bein, en v'la un rêsultat, occouo deux Angliais et y'en a déjà bein trop d'Angliais dans nos Etats. J'en sis enn'yiée de lus bêtises. Crai-mé, man Ph'lippe, les Jèrriais s'én r'pentithons dans le temps à v'nin.

Ph'lippe

Bah! Tch'est qu'tu gagne de t'faithe la bile. Les temps ont changi, pas rein qu'en Jèrri mais partout l'monde.

Mêrrienne

Tu verras man Ph'lippe qu'un mio à la fais s'en trouv'tha de pus en pus de tchi qu'à la fin Jèrri ne nos appartchiendra pas.

Ph'lippe

Bah, je soummes trop viers a-ch'teu pour nos gêner de chein qu'arrivetha dans vingt ans d'ichin.

Mêrrienne

Hier au sé j'étais à êtudier les noms des membres d'y'a chinquante ans que j'ai trouvé dans un vier Almonas de la Chronique et sans exception ch'tait tous des bouons viers noms d'Jèrriais.

Ph'lippe

Mais t'oublie don Mêrrienne, que la crême dé nos Jèrriais fiche le camp faithe fortune ailleurs et qu'y'en a plusieurs qu'otchuppent des postes importalntes, pas seuleulent en Angliêterre mais dans touos les pays du monde et ch'est ocouo les Jèrriais qu'en ont l'honneur.

Mêrrienne

Véthe, v'la tchi s'peut. Mais quand tu pense qu'un Jèrriais ne peut seulement pas adrêchi la Chambre des Êtats en Français, sans qu'un fichu Angliais s'léve et dit au Baillyi qu'i' n'comprend pon le Chinouais.

Ph'lippe

Quant à chonna, Mêrrienne, i' n'y'a rein à faithe. Ch'est nos Jèrriais tchi' faut bliâumer; ch'est d'lus faute que nou ouait pon un mot d'Français dans l's Etats au jour d'agniet et i n'paslent pas même le Jèrriais siez-yeux à lus aviers. Ch'est d'l'angliéchie partout.

Mêrrienne

Véthe, ch'est bein triste, Mais dis mé, man Ph'lippe, y'a eune autre affaithe que je n'comprends pas. Tout chut d'vis d'mandats tch'est que v'la tchi veurs dithe? l' n'y'avait pas ditet dans not' temps.

Ph'lippe

Nan dans not' temps nou s'fié qu'un Député avait assez d'intelligence et de capacité pour saver comment voter, mais grand doux, ch'n'est pas d'même à-ch'teu. Si sa concienche li dit de voter d'un bord et que ses pârroaissiens lî dîsent de voter de l'autre i' faut tchi l'faithe ou bein à la fin de sa gestion i' l'flianque à la porte.

Mêrrienne

A chu compte-là nou' f'thait aussi bein d'y mettre un but d'buais.

Ph'lippe

Ma fé, tu n'en est pon d'liain. Si iun de nos viers députés avait t'i d'mandé d'accepter un mandat i' l's éthait enviès à lus faithe quatorze. Et par chein que j'en vait, ma Mêrrienne, le temps s'en va v'nin qu'autchun Jèrriais d'un charactéthe indépendent prendra pour député souos ches conditions-la.

Mêrrienne

Tu l'as dit et chein que j'peux en vais mé, ch'est qu'à l'av'nin l's hommes que nou voudrait y mettre dithont nennin et qu'nous étha dans l's Êtats du monde tchi n'vallent pas quatre sous.

Ph'lippe

I' s'peut que tu-as raison, ma fille, mais quand à mé, j'espéthe tchi y'étha tréjous assez de bouons Jèrriais pour servi lus p'tit pays.

Mêrrienne

Eh bein pour de mé, j'ai bein d'la peine à craithe que l'monde d'à-ch'teu s'en vont oublier lus anchêtres et la bouonne veille Constitution. Tu verras que Jèrri restétha fidèle à ses traditions.

Ph'lippe

Jé n'crai vraiment pas que les bouons campagnards éthaient si p'tit d'respé pour lus pâraisse et quen nous les verrait mettre un Angliais en poste. A chu compte-là i' s'sait temps de patchi ses telles.

Mêrrienne

Man pouorre Ph'lippe, ch'n'est pou deux viérs bégâuds comme nous tchi s'en vont changi les choses. Mais enfin i' m'semblye que j'pouorrions lus souhaité bouonne chance parcequ'ils en ont besoin.

Ph'lippe

Véthe d'ja, ouvre l'armouaithe, si yen a occouo un lermin dans l'fond d'la bouteille j'allons béthe eune fais à lus santé et à lus grand amandement.