par JT.
Les caractéthes (l’ordre dé l’entrée)
Vendrêsse dé Billets Anne Herrod
Jane, femme du Connétabl’ye dé St. Brélade Hazel Lakeman
Merienne Shirley Pirouet
Mathilde Simonne Guégan
Mêlie Barbara Le Geyt
Lîsbette Anne Lowry
L’Homme Graeme Le Feuvre
Oscar J’valyi Oscar Chevalier
Elsie J’valyi Joy Fox
Sonia J’valyi Sonia Ahier-Kerr
Antoine J’valyi Tony Le Geyt
Messire lé Bailli Tony Scott Warren
Moussieu lé Connétabl’ye dé St. Hélyi Colin Ireson
Moussieu lé Connétabl’ye dé St. Brélade Derek Le Cocq
La Scène: J’sommes dans la Salle dé Départ sus la Cauchie Albert à St. Hélyi. Eune pèrsonne, en bouôns habits, est sus la strade.
Jane (bein gènée): Éyou qu’il est don? (Ou’ r’garde sa montre. Mathilde et Merrienne arrivent).
Vendrêsse dé Billets: Par ichîn Mesdames. Av’- ous vos pâsseports?
Merienne: Oui; deux billets pouor lé jour à Granville, si vos pliaît?
Vendrêsse dé Billets: Septante-siêx louis, si vos pliaît?
Mathilde: Tchi? Ch’est un mio chi! Y’a-t-i eune réduction pouor les anciens?
Vendrêsse dé Billets: Mesdanmes! Ch’est lé prix! Lé char-à-banc est inclu. Mais arrêtez! L’année tchi veint, ch’ess’sa trais pour chent dé taxe dé pus à payi – séyiz bein èrconnaissantes!
Merienne: J’ai ouï mé qué j‘allons aver à payi six pour chent! Donnez-nous nos billets, Missis!
Vendrêsse dé Billets: Assiév-ous, si vos pliaît, lé baté ne sort pas d’vant dgiêx heuthes.
(Deux aut’ danmes arrivent. I’s sont agitées).
Mêlie: J’sommes-t-i’ en temps? La fichue beusse ‘tait tard! I’s sont oblyigis dé bârrer la neuve stâtion dé la Libéthâtion au sé et tchiqu’un avait pèrdu la clié! Ch’est la faute és yobs!
Tout lé monde: Ram’nez la badgette! Ram’nez la badgette!
(Lisbette va chèrchi ses billets)
Mélie (Ou s’touonne envèrs la femme en bouôns habits): Bouônjour Jane! Tch’est qu’tu’es à faithe ichîn?
Jane: Bouônjour Mélie! Tu sais bein qué St. Brélade est jum’lé avec Granville, eh bein, j’arrêtons pouor Moussieu lé Maire et s’n êtchippe tch’arrivent sus l’baté pouor l’ouvértuthe dé la neuve Waterfront Hôtel!
Mélie: Ooooh! Jé n’sis pas ravie qu’tu’as mînt tes bouôns habits! Mais, où’est qu’est MOUSSIEU lé Connétabl’ye?
Jane: J’en sis si gènée, ma fil’ye, il a ‘té prînt court et il est hors trouver eune p’tite maîson – mais i’ y a au mains eune heuthe!
Mélie: Né t’en fais pas, ma fil’ye, les hommes sont tout l’temps au mains eune heuthe sus l’trône! (La rith’thie sus la strade).
Jane: J’crais bein!
Lisbette: Mélie! (en chèrfouoillant dans san pagas): Jé n’ peux pas trouver man pâsseport!
Mélie: Pouôrre bête! Tu l’as dans ta pouchette! (Ou l’ramâsse et lus pâsseports sont donnés à la Vendrêsse).
Vendrêsse dé Billets: Mèrcie, deux billets et vos cartes d’embarquément.
(I’ vont pouor lus sieges en d’vant d’la strade) Nou-fait – pas là! Ch’est rêsèrvé pouor les grôsses-têtes tchi lus en vennent à la Salle ichîn, à matîn!
Toutes les danmes: Des grôsses-têtes - tchi toupet!
Un homme arrive.
L’Homme: Un billet si vos pliaît? (I’ s’touonne au monde) Sav’-ous qué la neuve hotel s’en va être ouverte officialement aniet ET lé nouvieau logo étout?
Tous: La banane? Ha! Ha!
L’Homme: Nou-fait, ch’est l’Ouaîsé d’Or!
Tous: Niolîn! Ch’est la banane!
Mathilde: Et oulle a couôtée chi!
Mess et Missis J’valyi arrivent auve lus deux éfants, Antoine et Sonia – la méthe est chèrgie d’pagas et d’valises, Antoine est s’habil’yi dans sa robe et san tôque universitaithe et i’ s’en va s’assiéthe à drouaite et s’met à peindre.
Oscar J’valyi: Par ichîn – gaffe chés tchaises-là, Elsie! Sonia, prends l’pannyi à ta méthe! Oscar s’en va à la Vendrêsse dé Billets avec les pâsseports.
Sonia J’valyi: Danme nânnîn! J’sis à aîdgi à Antoine à porter ses peintuthes!
Antoine J’valyi: Mèrcie Sonia!
Lîsbette: Pourtchi qu’ous avez tant d’bagages don, Missis, vos en all’-ous en France pouor tchînze jours?
Elsie: Nânnîn, pour trais jours – mais j’amène tréjous not’ mangi – tout chu paûtchîn-là en France, dé l’ail, des colînmachons, des gambes dé crapauds!
Sonia: J’veurs des moules et des frites, mé!
Tout l’monde: Des moules et des frites – ah, tchi bouon fricot!
Elsie fait des morgaches!
Oscar: Sav’ous pourtchi qué j’nos en allons en France pouor trais jours? - Ch’est eune célébrâtion!!
Elsie: Oui, ch’est qué not’ Antoine vint d’passer ses examinâtions à l’université! J’sommes si ordgilleux, dit Oscar?
Oscar: Oui, j’sis coumme un tchian à quat’ coues!
Tous les gens: Félicitâtions, Antoine! (Antoine salut les gens).
Un homme: Tchi sujets qu’il a passé?
Oscar: Tu sais bein té Sonia – dit és gens!
Sonia: La Politique, La Finnance … et Les Arts – Antoine est tréjous à peindre!
Mathilde: Veindrais-tu bein peindre ma tchuisine?
Antoine: Chenna depend…i’ y un prix pour tout! Pouv-‘ous m’affaurder? ….(I’ donne un clyîn d’yi) Et ‘ous allez vaie pus tard!
Merienne: Les jannes sont chanceux ach’teu. Dans man temps, rein qu’les riches allaient à l’université!
Les gens: Oui, ch’est vrai chenna!
Oscar (Lé paivre li montant au nez): Bein, Elsie et mé, j’avons contribué gentiment envers s’n educâtion!
Elsie: Oui - et jé n’sommes pas riches! Mais Sonia, tch’est qu’tu’es à faithe souos ches ridgeaux-là?
Sonia: Rein, j’sis à ergarder, mé!
Sonia a l’vé les ridgeaux en driéthe d’la strade.
Lé Bailli et lé Connétabl’ye dé St. Helyi arrivent avec des pliacards auve lé fanmeux logo d’ssus.
Vendrêsse dé Billets: (au gens) Mesdanmes et Messsieurs - Messire lé Bailli et Moussieu lé Connétabl’ye dé St. Hélyi! (Lé Connétablye halle ses ‘clips dé bike’).
Les Deux: Bouônjour, j’vos présentons lé nouvieau logo d’Jèrri!
Lé Connétabl’ye dé St. Hélyi: Tch’est qu’ous en cryis?
Tous: Pas grand chose!
Mathilde: Ch’est d’la folâtréthie! Un vrai fiasco!
Tous: Et bein trop chi!
Lé Bailli et lé Connetabl’ye font d’la minne qui n’ont pas ouï!
Lé Bailli: J’m’en vais dêvailer lé nouvieau logo! Extchusez-mé, bouonnes gens…..
Lé Connétabl’ye dé St. Hélyi: Pas si vite, Messire lé Bailli, j’sis lé Connétabl’ye dé St. Hélyi et ch’est ma pliaîche dé condithe la cérémonie!
Lé Bailli: Puisqu’ous êtes si pliein d’ordgi – allez-y!
Lé Connétabl’ye: J’dêcliaithe lé logo dêvailé! I’ dêcârre les ridgeaux qui muchaient les portraits – mais l’Ouaîsé d’Or n’est pas là!!! – à sa pliaîche est un nouvieau logo, peint par Antoine! Ch’est eune trompe!
Tous: Nou-fait, ch’est parfait!
Sonia: Ch’est l’logo à Antoine!
Mathilde: Et tout peint, sans aver couôter rein!!
Tous: Hurrah Antoine!!
Antoine salut les gens acouo eune fais.
Lé Connétabl’ye dé St. Hélyi: Ch’est dêgouôtant! Mais j’êcoute la vouaix des gens d’Jèrri!...........
Lé Bailli: Chenna tu sais bein – les gens n’aiment pas chu logo-là et ch’t’i-ichîn est miyeu! Et à ch’t heu bonnes gens, j’vos prie dé filer jusqu’au Waterfront éyou qu’ch’est mé tchi s’en va ouvri la neuve hôtel!
Lé Connétabl’ye dé St. Brélade: (il arrive en couorrant) Jane! Jane! Sont-i’ arrivés, les français?
Jane: Nânnîn, mais éyou qu’tu’as ‘té?
Lé Connétabl’ye dé St. Brélade: (papi dé toilette dans eune main et eune beurée dans l’aut’) Jé n’pouvais pas trouver eune p’tite maîson! I’ sont toutes touonnés en cafés! Jé n’sais pas pourtchi qu’les gens s’en vont mangi en France quand nou’ peut mangi en Jèrri – et ‘al fresco’ étout! Et pis ‘take away’ – érgarde! (I’ liet lé patchet d’la beurrée)
‘Ênèrgie – chent nonante-quat’; Gras – ieune pour chent; Sé – nonante-trais grammes’… et du Viagra…..nânnîn, du vinaigre!!!
Jane: Ou’ ouvre sa bourse Met’ chenna dans ma bourse! Ou’ happe lé papi dé toilette Et chenna étout! Ou’ prends lé patchet.
Un homme entre et donne eune affiche à la Vendrêsse
Madanme la Vendrêsse dé Billets(ou’ liet eune annonce): Messire lé Bailli, Messieux les Connétabl’yes – pac’qué i’ y a tant monde abord lé bate dé Granville aniet, ch’est l’aut’ navithe qu’a am’né les gens. MALHEUTHEUSEMENT….oullle hésite un mio et r’garde les gens….lé navithe à ieu înstallé san nouvieau quatrième engîn et lé Capitaine né pouvait pas lé controller à la bride avalée! Les gens montrent lus surprînse chaque fais oulle liet les êvennements du baté… Il a mantchi la Cauchie Albert…..QUÂSIMENT tappé lé Condor……. et il a entré lé Marina Lîzabé, appliâtissant deux’trais bieaux batchieaux ……..ou ‘palais d’gînne’ comme j’dis ………….et il a fini par sé stâtionner en d’vant dé chutte neuve hotel-là! …..Mesdanmes et Messieurs, i’ faut embèrtchi à travers du foyer dé l’hôtel!!!
Lé Bailli: Mais, la cérémonie dé l’ouvertuthe dé l’hôtel??
Oscar (au Bailli tch’est resté plianté là): Messire lé Bailli – carr’ ous, carr ‘ous! J’nos en allons happer lé baté! (Les gens filent par la porte, lé Bailli et lé Connétabl’ye restent sus la strade).
Bailli (au Connétabl’ye dé St. Helyi tchi s’assieds hardi d’sappointé ): Tch’est qu’tu’as fait à ch’t heu? Acouo eune aut’ pêque-mêle!
RIDGEAUX