Je vains vouos vais, Manon, car je sis bain gêné:
Est-i vrai qu'mes moutons cherchent à s'écappé?

Ah mais oui-guià, Mousieu; mais en êtous surpris?
Ne v'la d'pis si longtemps que je les ai nouorris
Atout des trous de chours, dans un affreux côti,
Qu'ils en son touos enn'yés et r'fusent d'en mangi.
L'temps passé, d'vant qu'John Bull ne vinsse par ilo,
I' trouvaient vouos trous d'chours un excellent frico;
Mais ach'teurre qu'javons les grands moutons anglais,
Ichin de l'autre bord, à paitre dans les prés,
J'ai biau chanté tout haut de ma pus belle voix,
I' n'en mangent pas pus que si ch'tait du mort-bois.

Ch'est qu'i n'ont pas de faim; i vaut mux les laissi
Quiquejours à junné dans le bas du côti.

Chn' est pas mé toute seule, - avec un vier fossé
A l'entour du côti, - qui pouorrais les gardé
Si je n'lus donnais rain: i s'écapp'raient bétôtt!
I faudrait un fossé bain solide et bain haut,
Pour qu'i n's'en iraient pas dans le pré du vaisin.
Le seul autre moyen de les garder ichin,
Che s'rait de l's'enfrumé dans les niers souoterrains
Que Ferdinand d'Sicile a bâti pour les siens.

Je n'vais pas faire ch'la, car je n'érais pas d'laine.
Et mes biaux grands moutons mouorraient par la douzaine.

Si ou n'faites pon r'grès le fossé du côti,
Je ne cré vraiement pas que j'pouorrai l's'empêchi
De sauter par dessus et d's'en aller ailleurs,
Car i n'paraissent pas voulé dev'nin milleurs,
Ne v'là je couors tréjoux, d'pis l'matin jusqu'au sé,
Pour gardé vouos moutons et l's'empêchi d'passé,
Mai j'nen peux presque pus l'rhommatice m'accable,
Et les soucis que j'ai me rendent misérable.

Ou n'avez pas besoin d'paraître si chagrine;
Mettez dans chaque bréque un bouon fagot d'épine.

Ah! mon doux, j'ien ai mins; j'ai même enhallaudé
Touos les pus grands moutons qui voulaient s'écappé;
Mais tout ch'la n'sert de rain; malgré mes gros fagots
I' grimpent sus l'fossé comme de bouons ravauds,
Et si je n'avais pon un long bâton croqui,
Qu'a tait fait tout exprès pour pouvé les houqui,
Il la déjà longtemps qu'i' s'raient de l'autre bord.

Bah! le fossé m'paraît tout aussi bouon qu'd'amord.

Quand même qu'i' le s'rait, i' n'faut pas oublié
Qu'les moutons sont pus forts qu'i' n'taient dans le r'nouvé.
Ne v'là hier, je manqui d'avé le co' rompu
Par le janne bélié qu'ou z-app'lez le têtu.

Et comment qu'i' s'y prins?

J'm'en vais vouos raconté
Comment que ch'la se fit. Je m' en allais porté
Une brachie d'trous dans le bas du côti,
Quand chu p'tit anima, - j'compte qu'il 'tait marri
De m'vais atout mes trous, - i s'en vint bain sly-ment,
Et me bouti si fort que j'pensais quasiment
D'en quais à la renverse et de m'en évani.
Si par malheur sa cône avait seul'ment touchi
Un frouet qui m'est v'nu dépis naguère au g'nou,
J'érais 'tait sous ses pids comme une patouoille à fou.

D'pis qu'il est si rustique i' vaut mux l'i copé
Les cônes tout au ras pour l'empêchi d'bouté.

Ch'la n'empêcherait pas les autres de m' bousqui:
Nou pouorrait même vais les écônés s'paqui,
Entraînant souentre ieux le reste des moutons,
Dam! s'i' vont une fais avec les grands lurons
Qui sont de l'autre bord, ch'est qu'ou n'y gagn'rez pas,
Car le pré de John Bull est rempli de gros rats
Qui mordent les moutons et qui les font maigri;
N'ou-z-y verrait bétôt vouos moutons s'rabougri.

Je n'voudrais vraiement pas qu'les rats à jaune pé
Mordraient mes biaux moutons, car je serais ruiné,
Ch'est la s'maine qui veint que j'érai les tondeurs;
Dès qu'j'aie fait d'largent j'irai siez les forgeurs
Pour avé des railings que j' mettrai sus l'fossé.

Ch'la empêchera bain vouos moutons d's'écappé,
Mais i' n'en mangeront pas vouos trous d'milieu coeu.
S'ils 'taient dans l'clos de la R'forme i trouv'raient d'quai milieu,
Et i n'penseraient pas à s'en aller ailleurs.

Cryious que j'vais donné men biau grand trêfle en fleurs
A un tas de moutons qui n'ont mangé qu'des trous?
Ils en mangeraient tant qu'ils en créveraient tous.
Si j'navais pon d'trous d'chours ocquorre nous dirai!
Mais j'en ai dans l'clos d'Greffe un immense mouochai,
Et i gna q'mes moutons qui piéssent les mangi.

I n'en mangeraient pas s'i n'taient pon dans l'côti.

Ch'est à cause de ch'la que j'veurs les y gardé,
Chain que j'crains ch'e s'rait d'vais les rats à jaune pé
Ramonté le vallon et s'en v'nin par ichin.

I nouos en veint assez des p'tits du vier quemin,
Pour n'en voulé pas vais des chains à jaune pé;
Mais j'n'avons pas besoin de nous en effritté.
Car tandis que l'terrain sera ferme et uni
Je ne cré vraiement pas qu'il y ait du dangi.
Chés horribles rats là sont affrontés assez,
Mai i lus faut des creux pour y muchi lus nez:
Ch'n'est pas comme nouos rats que n'ou vait tréjoux vnin
Sus l'mitan du jour d'vers la fin du mais d'Juin.

Vous en veint-i ocquorre autant comme d'amord?

Ils ne font qu'augmenté, mais i n'troublent pas fort;
J'ai d's'animaux de d hors qui lus donnent la chasse;
Ils en éraient bétôt détruit toute la race
Si n'en revenait pon à mesure qu'nou les mange,
Car i l's'aiment autant que l'milleur grain d'la grange.
Mais dites-mé, Monsieu, quest donc qu'ou-z-allez fairre
De votre biau grand clos, car je ne peux pas craire
Qu'ou-z-allez le laissi paître par les coucous;
J'aim'rais mûx fair' mangi l'herbe et brulé les trous.

Je n'peux pas faire ch'la, car je sis en barguin
Pour vendre men biau clos â men nouviau vaisin.

D'en-piès-mès qu'il me fait une si noble mine!
Il est v'nu me passer men grain par l'étamine;
I'n'cesse de m'env'yé des tas de champignons,
Et i gna que sept jours que deux de ses garçons, -
Que nous vait bain souvent dans les p'tits qu'mins d'travers,
A ramassé d'la bouze et déterré des vers, -
Vinrent d'un grand matin, avant que j'fusse l'vée,
Apporter à m's'éfans une belle boîtée
De grands livres bêlongs et de portraits musquis.

John Bull n'est pas bégaud; ch'est un homme d'avis.
Il a men clos dans l's'yers; s'il en 'tait autrement
I n'vouos érait pas fait un aussi biau présent,
Car le vaisin, d'sa sorte, i n'est guère donnant;
Il a même été veu, - malgré sen biau semblant,
Ses superbes festins et ses belles sornettes, -
Se paqui sans mot dire et sans payi ses dettes.

Je n'vouos ai pas dit tout: les Bull en v'nant siez mé,
Dirent à cheux d'mes p'tits qui savent lus bécé,
Que l'premi qui sairait lus grand livre par coeu,
Et qui pouorrait le dire au compère Matthieu,
Comme qui décont'rait des files de pât'notres,
I' l'i serait donné, pour faire honte ès autres,
Un biau rouoge calobre et p't'être une perruque.

J'sis presque seux que ch'la n'vaudra pas d'la fréluque,
Et que l'rouoge calobre effritt'ra mes moutons.
Mais depis que John Bull aime tant vouos garçons,
Tâchis d'prendre couorage, et de continué
A villi de bain près, comme par le passé,
Sus mes mauvais moutous pour qu'i' n's'écappent pas.
Je trouv'rais bain quiqu'un, sans biaucoup d'embarras,
Qui se f'rait un pliaisir de veni vous aigui,
Mais comme j'n'ai pas d'sous je vouos fr'ais le payi.

I' vaudrait aussi bain m'env'yé, me et m's'éfans,
Tout drait à l'hopita.

Ne v'la d'pis trop longtemps
Qu'ou gardez mes moutons, pour que j'piesse avé l'coeur
De vous faire subir un aussi grand malheur.
Je m'en vais vite faire avertir les tondeurs.
Et c'mandé d's'étoupons siez les milleurs forgeurs.
Ou serez soulagie, ou pouorrez vouos r'posé,
Dès qu'les balustres s'ront sus le haut du fossé.

J'vouos dirai bain, Mousieu, qu'che'n s'ra pon par orgui
Si j'me r'pose un p'tit mio, car j'c'menche à m'fatigui.
Chu malheureux coup d'cone a révilli mes maux;
J'n'ai pas dormi chut' niet de souffrances dans l's'os;
Il a fallu me t'nin, toute la matinée,
A frotter ma pouorr' gambe, atout d'lau d'vie camphrée
De d'siez l'vier Couotumi du bas d'la vielle rue.

Ne vouos effrittez pas; i' n'y'a qu'la mort qui tue.
Ch'e n's'ra pon vouos froués, ni la goutte dans l'pi,
Qui vouos mettront sitot souos les pids du fossi.