Le Compère Grivois (abordant M. Gazette). - Commez qu'ou vos portais, Messe Gâzéte ? J'sis ben aise de vos rencontré. Ou zallez nos dire les nouvelles, j'espère ; car nou dit qu'ille'n a plenty.
M. Gazette. - Qué qu'ou voulèz que j'vos disons, Compère Grivois. L'zélections ont tet gently. Nouz a tet ben kind, ben tranquilles.
Le Compère Grivois. - J'en étions tous surprins. J'nos attendème a vais quique échanges de coups d'poings et de coups d'pis, et des guerres de goule, comme chez la couätume en Jery. Mais y paraît pourtant qu'le giable n'a ren perdu, et qui l'ya yeu du camas, à Saint-Sauveux, à l'occasion d'un d'ses ministres qu'est recteu d'la pâraisse. Ah dam ! chez un gaillard qu'es attachi à la pâresse.
M. Gazette. - Vère ! nou dit qu'le recteu, qui couorait les qu'mins, à onzse heures du sé, a r'chut une morniffle sus l'bras gauche ou l'bras droit ............ je n'sais pon lequel des deux, et qu'san chapé lia servi d'bouclier pour parer les tappes qu'nou liadressait.
Le compère Grivois. - Comment ! ch'nez qu'chona! et mon dou, nou m'avé contait qu'Mousieu l'Révérend avait tet assassinet tout à bon, qu'chetait un coup de désespéré, un crime de parti ; q1nou zavait déjà pétitionnet l'Conseil d'en haut, et qu'nou zallait metre à la question chinq ou siès juges d'là Cour, l'zofficiers du Rouai, toute la bande des écrivains, l'Rédacteux et l'Imprimeux d'la gazéte du Constutionnel, et les deux tiers et d'mi des douze pâraisses d'lîle. Nou dit etout qu'lévêque s'en vain en poste faire zescommuniquer de l'excommunication majeure toute la bande du louori.
M. Gazette. - Entre nous, ômains chez du gnolin tout chonna. L'Recteu d'Saint-Sauveux fait hardi de tintamarre pour ren. Y ne liest arrivé que chet qu'arrive souvent à d'sis honnêtes-gens comme li, sans faire tort à l'honneur que j'li dé, et malgret tout s'nesprit, il a fait une balourdise. Il erait fet mus d's'en taire.
Le Compère Grivois. - Etes-ou ben seûr que c'hnez pon un coup prémédité et commandet par le louori qui a pays un mauvais sujet pour assâilli not' poor giable d'Recteu ? D'ailleurs, chez qu'il est r'connu qu'un rosi n'peut pon attrapé une égratigneure, sans qu'le louori y sait pour quique chose. J'connais plusieurs d'mes enmins qu'ont la colique, et j'sis ben convaincu qu'le grand parti a encore fait d'ses fredaines. Chez des chorchiers.
M..Gazette. - Eh mes mon dou, Compère Grivois! Est-che qu'ous créyis, touos chez contes-là? Chez du gnolin d'avers.
Le Compère Grivois. - Ah ma fé oui j'les crais. Nou m'la dit pus d'une fais à l'Assembliée de Pârraisse, et nos messieurs n'mentent jomés .... Et pis, bah ! y lia long-tems que j'voudremes que l'giable en frait san ballot, car nos perche l'zoreilles touos les dimanches, avec son grais et son lapin.
M. Gazette (l'interrompant) - Dites donc Grec et Latin ...........
Le Compère Grivois. - Grec et latin ! gna pas d'soin. Je n'corrigeons pas comme vous, toutes les s'maines, toutes les lettres de l'A B C. - Mais trejous avec san grais..grec et son lap..latin, y n'peut pon nos bailli un buon sermon. Y n'peut pon lire tant sel ment les prières ; quant y dit l'enterrement ès couples qui vont s'enhalaudé, et le baptême ès siens qui descendent dans la fosse pour regalé les vers. Mais tout comme, ché zan bon homme doux comme un quartron d'gros chucre, et j'sis marri qu'on l'ait frottai avec une canne à tête de pliomb ; j'li souhaite toutes sortes de bonheur, quoiqu'y feche damner sen troupé, toutes les fais qu'il est en kiaire. Mais ou savez on nerait pas dei! l'assassinè.
M. Gazette. - Y n'a pon tet assassinet. Nou lia donnet un coup d'paraplie !
Le Compère Grivois. - Un coup d'paraplie qui lia nierchi l'bras de la largeur d'un penny ! ................... Mais le v'chin sa hardelle, la Commère Carillon, qui li fait ses discours des Etats ..................... Qu'est qu'ou zavès Missis Carillon......................... Ou zêtes toute hors d'haleine!
La Commère Carillon. - N'm'en palez pon. Man maître qu'avait le chervé attaqui, devant lundi au sé, d'la fièvre maline, a affolet mardi matin. Chés son maudit article qu'en est la cause.
Le Compère Grivois. - Y n'est pas possible!
La Commère Carillon. - Si fai dia ! Y crie qu'on l'assassinet et y dit qui fra zun sermon là-dessus.
M. Gazette ( riant ). - Depis que chez de même, y prêchra dans l'désert, comme de couotume.
La Commère Carillon. - Ou riez, vous ! Ou zêtes p't-être ben un des siens qui liont fait du ma .... et les gazetteurs n'sont bons qu'à dire et qu'à faire chet qui lia de plus mauvais.
Le Compère Grivois. - A non découvert l'assazin ?
La Commère Carillon. - Man maître qu'iest à la fièvre, vain de dire tout-à-l'heure qu'chétait Caligeula, Néron et une Cathrine de Médicisse qu'avaient fait le coup ! Chétait Caligeula qui portait la lanterne à onze heures du sé............... ah ! chez dammage qu'nou za renversé la potence du Mont-ès-Pendue ; car nou leurs erait fait passé l'goût du pain.
M. Gazette. - Dit-non chet qui sont chés gens-là ? Estche des ouvriers chassés de quique manifacture d'Anglieterre ?
La Commère Carillon. - For shame ! Apprenez qu'un angliais ne fait pon d'itet. Caligeula est un colporteur bas-normand, Cathrine de Médicine, une fraudeuse basse-bretonne, de George-Street, et Nérou un Jériais, partisan du louori. Chest li qui conspire contre nos privilèges et nos libertès. Chez li qu'a concilli au Roi d'nos censuré.
Le Compère Grivois ( écarquillant les yeux) - Ah my good ! Nérou, Cagilula et Cathrine de Mécidine: y lia d'grands scélérats dans not' P'tit pays ; y n'aiment pon la libertet................. A chet'heure je n'pouvons pas dire rein, ni écrire rein.................... J'n'avons pas même la libertet d'nos faire trainé comme des viaux dans un banné, orné d'girlandes d'roses, ni d'tiré des pétards, ni d'donné processionnellement une boîte à snot à not' bouon Connétable. Ah ! je sommes des pauvres escliaves. Y faut espéré que j'nos rendrons libres, quique jour, en mettant l'feu à la ville et sur tout à chute maudite cohue.
M. Gazette. - Y faut espéré qu'ou zattendrez oquo un p'tit brin, bounnes gens.
La Commère Carillon. - Abétos Messieurs, j'courons d'la part du Révérend, convoqui les omins d'chut pays pour délibéré sur chutte grande affaire et comme y dit si bein, faire avorté un complot giable atique ouordi d'abord contre li quiest la tête du part et pis après contre tous les omins du peuple. La Chronique sonnera cloche d'allarme et tout l'monde se levra en masse pour vengi not' savant Recteu qui n'a pus qu'eune p'tite douleur au bras. J'verrons v'nin bétôt des commissaires des Lords du Conset au bord du Steam pour mettre la pliaiche en etat de siège. Y liaura une grande enquiète, et nou commenchra par les ergots d'la Cour. Les Seigneurs f'ront maison nette, et M. De St.-Ouen s'ra nommé Bailli. Au moins, lcoup d'bâton donné à not' Recteu n'sera pon tout-à-fait sans profit. Y pourra p'têtre devnin Doyen et mé j'érai l'honneu de bouilli la caboche d'Monsieu l'Doyen. Ainsi tout l'monde y ganera. Les aigrefins s'mordront les dés.
M. Gazette (riant). - Va-t-en voir s'ils viennent Jean !
Le Compère Grivois. - Et mé j'cour me met' d'la partie avec la Commère Carillon. Si le Seigneur de St.-Ouen est Bailli, man grand garçon s'ra avocat.
M. Gazette. - Bounes gens, v'là le fin mot ! Quand ou zerais touos des pliaiches, ou n'brairais pus, ou ne crirez pus à la tyrannie. Ou s'rais tous contents chez dommage que nien n'é pon iune pour tout l'monde.
Le Constitutionnel 22.9.1827
Viyiz étout: