Les Pages Jèrriaises

Les temps changent, épis d'même i' change, man d'si

Mudão-se os tempos, mudão-se as vontades

Les temps changent, épis d'même i' change, man d'si;
êt' - ch'est d'changi; changeant, ch'est d'nos y fier.
Dé chu changement tout l'monde entchi est grée
en nouvelles qualités, tréjous changi.
J'viyons tout l'temps tout l'tou des niv'lot'ties
tchi n'sont janmais chein qu'j'avons espéthé,
et not' mémouaithe par du ma est grînmée -
du bein (s'i' y'en a ieu), y'a raîque d'l'envie.
Atout un vèrt manté l'temps abrie l'aithe
tchi soulait êt' couèrte dé né en fraide couoche.
Au run d'chanter douochement j'sis raîque à braithe;
chein tchi m'sembliait fitchi, ch'est chein tch'êlouoche.
Ch'est en tchi si tout change s'lon ma mémouaithe,
au temps tchi couort la chang'gie est pus douoche.

Luís Vaz de Camões
Vèrsion Jèrriaise 2019 par Geraint Jennings

 

Viyiz étout:

 

Les Pages Jèrriaises