Lé Sphînx (ou pus à co ch'tait eune sphîntchette)
d'mandit eune d'vinnâle à Édipe lé Rouai:
"Tch'est qu'a quat' gambes, pis deux, pis trais dé siette?"
Édipe, tchi halait d'un pid, y vit cliai:
"Ma chiéthe Sphîntchette, un p'tit êfant grappinne;
un houmme marche drait, mais ajouôte un bâton
quand il est vyi." L'ordgi veint d'vant la ruinne,
et la sphîntchette s'mêfit. Et not' hampion?
Pouor c'menchi, Édipe chèrchait à grappîns
eune fanmil'ye, en dêpit d'ses pids g'vîlyis;
dé but, i' tuit un viageux par les c'mîns;
et bâtonnait duthant s'n aveugliéthie.
I' 'tait bein mus siez li! Nou n'avanche dgéthe
en cliopinnant et mathiant sa méthe.
Geraint Jennings
2009
Viyiz étout: